Theo Hensel ze Zubornički je „Čestnohamtski měsaca“

Zubornička (SN/MWj). Za jeho wjelelětny wurjadny angažement jako wjesny chronist a jeho wobšěrne dźěło za zachowanje a posrědkowanje stawiznow swojeje domjaceje gmejny je Budyski krajny rada Udo Witschas (CDU) Thea Hensela ze Zubornički jako Čestnohamtskeho měsaca wuznamjenił.

Theo Hensel je so wjele lět z wulkej zahoritosću stawiznam Zubornički wěnował. Jako wjesny chronist njeje wón jenož historiske žórła wotkrywał, ale tež swójski muzej załožił. Tónle muzej dokumentuje wuwiće wsy a zachowuje dopomnjenki za přichodne generacije. Wosebitu kedźbnosć wěnuje wón w swojim dźěle industrijnej zašłosći Zubornički, jako bě wjes wuznamne městno, hdźež su brunicu wudobywali. Spočatk 20. lětstotka wjedźeše Hornjołužiski brunicowy zawod Olba brunicowu jamu a briketowu fabriku. To je stawizny wsy sylnje wowliwowało.