Budyšin (SN/mb). Zarjad za prawniski dohlad nad komunami w krajnoradnym zarjedźe pruwuje tuchwilu interview Budyskeho wyšeho měšćanosty Karstena Vogta (CDU) ze Sakskimi Nowinami (SZ). Wobšěrna rozmołwa z nawodu Budyskeho zarjadnistwa bu zašły štwórtk online a pjatk w ćišćanym wudaću wozjewjena. To wobkrući nam wčera rěčnica krajnoradneho zarjada Sabine Rötschke. Wona pak připowědźi, zo njebudu wo wuslědkach přepruwowanja informować, dokelž je to personalnoprawniska naležnosć.

Interviewa dla su samo komunalni politikarjo CDU z hłowu wili. W nim wužiwaše Vogt składnosć, so wo detailach njezjawneho posedźenja měšćanskeje rady srjedu, 29. oktobra, wuprajić, měšćanosće za financy, porjad, kubłanje a socialne, dr. Robertej Böhmerej (bjezstronskemu) pozdatnje předobre personelne wuhotowanje měšćanskich pěstowarnjow wumjetować a swój wid na ličby pruwowanskeje rozprawy šěrić. Vogt chce 30 połnych dźěłowych městnow wottwarić, štož wotpowěduje něhdźe 40 wosobam resp. pjećinje kubłarkow.