Bóšicy (BB/SN). Honda Jakobs F2 z lěta 1982, Yamaha R1 F3 z lěta 1989 abo 1978 natwarjena BMW R 100 Kneeler – mnohim so woči błyšća, hdyž tajke a podobne daty čitaja. Wětrow bě sobotu a njedźelu tajke něšto kaž Mekka fanow motorsporta. Gmejna Bóšicy je na 4. Bóščanski třiróžk prosyła, a něhdźe 2 500 ludźi je přeprošenje rady sćěhowało.
Něhdźe 80 startowacych – mjez nimi tež někotre žony – je w třiróžku Wětrow, Bóšicy a Nowe Bóšicy po krajinje smaliło. Wosebje mjez Bóšicami a Wětrowom pokazowachu někotre tachometry něšto wjac hač 200 km/h! Zo je Bóščanske zarjadowanje mjez přiwisnikami tak popularne, zaleži tež na jeho zažnym terminje. Po zymskej přestawce dźě je to daloko a šěroko jedne z prěnich tajkich zetkanjow.
