Njeswačidło (JK/SN). Na poslednje lětuše posedźenje je so wutoru Njeswačanska gmejnska rada znowa pod nawodom ­zastupowaceho wjesnjanosty Franka ­Korenga zetkała. Drje najwažniši dypk dnjoweho porjada bě wuradźowanje wo popłatkach za wotnajeće zjawnych ležownosćow. Hižo w nowembru běchu wo tym debatowali a namjet, za twarske a wobtwarjene ležownosće lětnje štyri eura na kwadratny meter wobličić, měješe so kalkulować. Nawodnica twarskeho zarjada gmejny Katrin Ullrich kalkulaciju předstaji. Wot njeje předstajene ličby ­radźićelki a radźićelow wostrózbnichu, ­dokelž běchu so na mnohich pozicijach drastisce zwyšili, zdźěla wo 400 procentow. To njeje realne, radźićel Norbert Braun rjekny a na to skedźbni, zo móhli wotnajerjo wysokeho popłatka dla zrěčenja wupowědźić a potom njeby gmejna scyła dochody měła. Tuž so na to doje­dnachu, zo dotalne popłatki wobcho­waja, dokelž maja so hač do kónca decembra zrěčenja za klětu rozesłać. Tak wostanje popłatk za zelenišća 0,60 eurow na kwadratny meter, za twarske ležownosće 2,20 eurow a za zahrodki pola 0,15 eurow wob lěto.