Zdźěr (CS/SN). Nowu wuchowansku stražu su předwčerawšim w Zdźěri swjatočnje poswjećili. Z tym je w Budyskim wokrjesu hižo 18 tajkich nowonatwarjenych wuchowanskich stražow. Krajny rada Udo Witschas na přepodaću zwurazni, zo je to za wokrjes dobry dźeń. Wón chwaleše, zo su twar dypkownje wotzamknyli. Hakle před njecyłym lětom běchu zakładny kamjeń połožili. Wosebje wuzběhny Witschas wulkotnu podpěru Holanskeje farmy jako bjezposrědnjeho susoda při přizamknjenju medijow a kładźenju wopłóčkowych rołow.
Nowa wuchowanska straža stara so sobu wo to, zo dóstawaja ludźo spěšnu pomoc tam, hdźež je wona trěbna. Předewšěm wobydlerjo gmejnow Wulka Dubrawa, Radwor a Malešecy budu z toho profitować. Dalšej wuchowanskej straži nastanjetej klětu w Zejicach a 2028 we Wojerecach. Z tym wokrjes do wuchowanskeje słužby inwestuje kaž lědma druhi. Zdźěrjanska straža płaćeše 1,93 milionow eurow.
