Pobrachowacych přinoškow dla měsačnik w Delanach dlěje njewudawaja

Łazk (jh/SN). Poslednje posedźenje gmejnskeje rady Ralbicy-Róžant do lěćneje přestawki bě wčera wječor w towarstwowym domje we Łazku po hodźinje zakónčene. W prěnim z dweju hłowneju dypkow dnjoweho porjada přepodachu radźićelka a radźićeljo hnydom šěsć nadawkow za najwšelakoriše dźěła za nowotwar jednoposchodoweho hortoweho twarjenja w Ralbicach. Tak mjez druhim za třěchikryjerske dźěła, wokna, wonkowne durje, suchotwarske dźěła, te­pjenje, přewětrjenje, sanitarne připrawy a estrich. Nimo toho předstajichu sobudźěłaćerjo planowanskeje firmy muster drjewjaneje fasady. Konstrukcija wobsteji z larikoweho drjewa a budźe ze swětło­šěrej barbu wobarbjena.