Na swjedźenišću na kromje Sernjan su zašły tydźeń ponowjenske dźěła zahajili. Tam chcedźa wjesne towarstwo a wobydlerjo zhromadnje staru kehelowansku čaru a předawanske budki ponowić. Ze spěchowanskeho programa Leader su pjenjezy za to dóstali.

Sernjany. (SN/jp) Hižo wjacore lěta njejsu kehelowansku čaru w Sernjanach wužiwać móhli, kotruž běchu wjesnjenjo něhdy natwarili. Podłoha bě skóncowana. Nimo toho pobrachowachu twarske dźěle, zo móhli ludźo tam kehelować. „Zaměr wjesneho towarstwa je, kehelowansku čaru sporjedźić a dźěl čary z třěchu škitać“, čłon wjesneho towarstwa André Kober wuswětli. Ponowjenu kehelowansku čaru chcedźa w přichodźe zaso na generacije přesahowacych zarjadowanjach, na přikład na wjesnym swjedźenju, wužiwać.