Nowa štwórć na kromje wsy
Bluń (AK/SN). W gmejnje Halštrowska Hola wutworja twarsku płoninu za ludźi, kotřiž chcedźa sej nowy dom natwarić. Na wuchodnej kromje Blunja ma bydlenska štwórć za dźesać jednoswójbnych abo dwójnych domow nastać. Prěni naćisk projekta je gmejnska rada na swojim zašłym posedźenju schwaliła.
Lětsa w aprylu su radźićeljo wobzamknyli, twarski plan nastajić. Kaž Heidrun Eger z gmejnskeho twarskeho zarjada nětko rozłoži, ma so nowa štwórć paralelnje k zwjazkowej dróze B 156 rozpřestrěć. Předwidźane su dwuposchodowe twarjenja. Hač do 60 procentow jednotliwych ležownosćow smě so zazyglować. Na ležownosćach smědźa so tež carporty a garaže natwarić. Nimo toho maja tam zelenišća kaž tež wobchadne płoniny nastać, Heidrun Eger rozjasni.
Přichodne měsacy smědźa wobydlerjo kaž tež potrjechene zarjady a dalši nošerjo zjawnych zajimow swoje stejišćo k planowanej bydlenskej štwórći zapodać. Jich pokiwy a přispomnjenja maja so do dalšeho planowanja zapřijeć. Na kóncu plan wužiwanja ležownosćow přiměrja, kaž na posedźenju gmejnskeje rady rozłožichu.
Jubilej z nowej gratownju
Slepjanska wohnjowa wobora 100. róčnicu załoženja swjećiła
Slepo (AK/SN). Z tři dny trajacym swjedźenjom je Slepjanska dobrowólna wohnjowa wobora minjeny kónc tydźenja 100. róčnicu swojeho załoženja woswjećiła. Mnozy wužichu składnosć a sej při tym nowu gratownju wobornikow wobhladachu. „Z gratownju su so naše wuměnjenja wo tójšto polěpšili“, praji nawoda gmejnskeje wobory Max Gleisberg.
Jedyn z wjerškow bě sobotu mila módreje swěcy z policiju, zwjazkowej woboru, techniskim pomocnym skutkom a wuchowanskej słužbu. Młodźi wobornicy demonstrowachu hašenje a dorosćeni wuchowanje zatłusnjeneje wosoby z awta. Njedźelu wjedźeše swjedźenski ćah wot noweje gratownje do wsy a wróćo. Wobdźělili su so wohnjowe wobory z cyłeje Slepjanskeje wosady. Tež historisku hašensku techniku su pokazali.
Přichod widźi we Łužicy, kotraž jeho přićahuje (9)
Domowina je spočatk apryla we Wulkich Zdźarach rěčny projekt DOMOJ zahajiła. To je intensiwny kurs serbšćiny, kotryž dźewjeć měsacow traje. Dohromady dwanaće wobdźělnikow wuknje zhromadnje w tak mjenowanym rěčnym hnězdźe. Woni so w našim wječorniku předstajeja. Jakub Čornak njeje nihdy na swoje korjenje we Łužicy zabył, w kotrejž swój přichod widźi.
Čehodla runje ja serbsce wuknu?
Sym Jakub Čornak z Njebjelčic. Jako hudźbnik a spěwotwórc skutkuju we wšelakich skupinach a projektach. Koncerty a wustupy mam po cyłej Němskej, druhdy tež we wukraju. Někotři znaja mje pod mjenom Jacke Schwarz. Prawidłownje je moja hudźba w braniborskim/delnjoserbskim programje słyšeć. Wukubłanje sym jako hladar za zbrašenych złožił. Wotrostł sym w serbsce rěčacej swójbje, ale najwjac žiwjenskeho časa njejsym w serbskim rěčnym rumje přebywał. Na přikład wopytach gymnazij w Kamjencu a pozdźišo we Wojerecach, hdźež přebywach tři lěta w internaće. Wot lěta 2009 bydlu w Berlinje. Dyrbjach won do swěta. Daloko preč pak njejsym był, stajnje sym swójbu a Łužicu wopytał.
Krótkopowěsće (23.09.25)
Wohenjej škody zawinowałoj
Wojerecy/Kulow. Při wohenju minjenu nóc we Wojerowskim nowym měsće staj so mužaj w starobje 29 a 52 lět zraniłoj. Dom z wjacorymi poschodami při Budyskej aleji su zamołwići ewakuěrowali. 33 wobydlerjow je potrjechenych. Bydlenje w štwórtym poschodźe so dospołnje wupali. Po tuchwilnych informacijach njemóža wobydlerjo domu nachwilnje tam bydlić. Tež w Kulowje je so w prózdnym domje paliło. Tam tukaja fachowcy na zapalerstwo.
Wotpušća wodu
Budyšin. W prědnim dźělu Budyskeje rěčneje zawěry blisko Wownjowa wotpušća w přichodne dny tři metry pegela wody. Přičina toho je kontrola twarjenjow na kromje zawěry. Hač do pjatka ma pegel wody 165 metrow nad nulu docpěć. Někotre dźěle zawěry tohodla wusuša, na tute pak njesměš stupić abo tam běhać.
Konjaca tramwajka zahoriła
Woltižěrowarki wjesnjanow zahorili
Kóždy móže druhemu žiwjenje wuchować
Kamjenc (SN/MWj). Wot dźensnišeho hač do 26. septembra wotměje so po wšěm kraju tydźeń wožiwjenja. Tohodla přewjedźe Kamjenska chorownja swjateho Jana štwórtk, 25. septembra, wot 9 do 12 hodź. zhromadnje z wuchowanskej słužbu Falck wosebitu akciju. Wosrjedź města, před Kamjenskej radnicu, chcedźa medicinscy fachowcy a wuchowanscy sanitetarjo wo wožiwjenskich naprawach informować a zajimcam rozłožić, kak móža z masažu wutroby sobučłowjekam žiwjenje wuchować.
Wólbny bój w Serbach
Koslow. Kandidatka za zastojnstwo wjesnjanosty w Njeswačidle, Anett Pötschke ze Šešowa, přewjedźe dwaj ze swojich pjeć terminow wólbneho boja w serbskimaj wjeskomaj. Dźensa, póndźelu, w 17 hodź., předstaji so bjezstronska gmejnska radźićelka a mišterka za wóčnu optiku wobydlerjam Koslowa a wšitkim zajimcam w domje wjesneho towarstwa. Jutře, wutoru, we 18.30 hodź. pak móža ju wobydlerjo w Dobrošicach na dworje Róžeńčanskeje dróhi 2 zeznać, jeje so prašeć a z njej diskutować. Na wobě zarjadowani su wobydlerjo wutrobnje přeprošeni.
Radźićeljo wuradźuja
Nowoslicy. Přichodne posedźenje gmejnskeje rady Ralbicy-Róžant wotměje so jutře, wutoru, we 18.30 hodź. w kulturnym domje w Nowoslicach. Kaž z dnjoweho porjada wuchadźa, chcedźa předewšěm wo hłownych wustawkach gmejny diskutować. Nimo toho dorozumja so wo přichodnych terminach a wjesnjanosta poda swoje informacije.
Policija (22.09.25)
Njewjedro zachadźało
Hornja Hórka. Sylne njewjedro je wčera wječor něhdźe w 20 hodź. w Hornjej Hórce južnje Budyšina zachadźało. Tam so tak mócnje dešćowaše, zo z wokolnych polow błóto do wsy ćečeše. Na to alarmowachu wohnjowych wobornikow z wokolnych wsow, kotřiž błóto z pućow rumować započachu. Při tym wobydlerjo pomhachu. Najbóle potrjechenej běštej Hłowna a Wjelečanska dróha. Tam so błóto jenož na ležownosćach njerozpřestrěwaše, ale tež do pincow běžeše. Dobrowólni wobornicy běchu wjacore hodźiny zasadźeni.
Při nowej budce pozastać
Dalši dźěl turistiskeho koncepta třoch gmejnow zwoprawdźeny
Miłkecy (SN). Wo mozaikowy kamušk bohatša je nětko turistiska infrastruktura Radworskeje gmejny. W Miłkecach přepodachu njedawno nowu škitnu budku za pućowacych a kolesowarjow zjawnosći. Hač dosrjedź lěta steješe na městnje při hłownej dróze dodźeržane a njenahladne busowe zastanišćo. Nětko wita tam nimo jěducych domoródnych a hosći moderna hěta. Projekt, kotryž bu we wobłuku regionalneho budgeta 2025 spěchowany, skići pěškam a kolesowarjam runje tak kaž na bus čakacym škit. Nimo toho polěpši so z tym turistiski poskitk we wobłuku regiona Hornjołužiska hola a haty, praji Radworska wjesnjanostka Madeleine Rynčowa při přepodaću hěty.
Gymnaziasća w Radworju kermušowali
Radwor. Minjeny pjatk prošachu dwanatkarjo Serbskeho gymnazija na motowy swjedźeń z pisanym programom – na swoju tradicionalnu kermušku. Lětsa wotmě so wona pod hesłom „Časowa jězba“ w Radworskim hosćencu „Meja“. Zarjadowanje je jedyn z wjerškow maturantow, kotryž je z wulkim předwjeselom, ale tež stresom zwjazany.
