Předstaji Bamborak
Budyšin. Maćica Serbska přeprošuje na wječorny přednošk, kotryž planuja štwórtk, 15. meje, w 19 hodź. w Budyskim Serbskim domje. Korla Baier předstaji swój TTS system (Text to speech) Bamborak, kotryž je w zašłych lětach wuwił. Z nim móže kompjuter hornjoserbske teksty awtomatisce předčitać. System dźěła z neuronalnymi syćemi. Trenowali su jón z wjacorymi tysac sadami. System předstaja live a to serbsce.. Zajimcow wutrobnje witaja.
Premjera z elewomaj
Budyšin. Hrajkajo serbsce nawuknyć a při tym samo swoju stwu zrumować, je wobsah studijoweje inscenacije „Zhubjene a namakane“ serbskeho činohrajneho studija. Hračko změje jutře, 15. meje, w 19.30 hodź. swoju premjeru w Budyskim Dźiwadle na hrodźe. Originalnu němsko-jendźelsku hru awtorki Rike Reiniger su do wjele rěčow přełožili. Tež we Łužicy měješe hra hižo w lěće 2005 w hornjoserbskej a w delnjoserbskej rěči wulki wuspěch z NSLDź. Po dwaceći lětach móže publikum hru nětko znowa dožiwić, a to z elewomaj Bernadet Šnajderec a Ole Schmidt. Režiju ma Torsten Schlosser.
Młodźinski festiwal Youco
Překwapjenka k dnjej maćerjow
Wola noweho wjesnjanostu
Gerd Schuster po wjace hač 20 lětach swoje zastojnstwo złoži
Njeswačidło (JK/SN). Wčerawše posedźenje Njeswačanskeje gmejnskeje rady nawjedowaše zastupowacy wjesnjanosta Frank Koreng. Njeje drje ničo njewšědneho, zo druhi muž gmejny tajke posedźenje zastupujo nawjeduje. Přičina njepřitomnosće wjesnjanosty Gerda Schustera (CDU) pak přeradźi wotběh dnjoweho porjada, hladajo na přihoty za wólby wjesnjanosty. Schuster mjenujcy po wjace hač 20 lětach swoje zastojnstwo 31. awgusta złoži. Radźićeljo dojednachu so na termin njedźelu, 7. septembra 2025. Jeli budźe druhi wólbny přechod trěbny, planuja tutón njedźelu, 28. septembra. Nawodnica gmejnskeho twarskeho zarjada Katrin Ullrich na to skedźbni, zo termin za přizjewjenje kandidatow hišće wozjewja. Čehodla Gerd Schuster swoje zastojnstwo złoži, wčera rjekli njejsu. W aktualnym hamtskim łopjenje susodneje gmejny Rakecy tamniši wjesnjanosta Swen Nowotny (CDU) swoje zrozumjenje za rozsud kolegi wupraji a so jemu za dotalne dobre zhromadne dźěło dźakuje.
Dopominaja na stawizny zwonow
Slepo (AK/SN). Na originelne a wosebite wašnje dopominaja přichodny kónc tydźenja w Slepom na stawizny swojich cyrkwinskich zwonow. Mały mjedźany zwón nasta před 450 lětami. Nowej wjetšej zwonaj ze železa přichadźeštej před 100 lětami do Slepoho.
Za čas Prěnjeje swětoweje wójny je wjele wosadow w Němskej swoje drohotne mjedźane zwony statej wotedać dyrbjało. Tute zeškrěchu, zo móhli z nich brónje twarić. Tónle wosud poćerpještej tohorunja zwonaj w Slepom. „Na zbožo mały zwón tehdy na cyrkwinskej wěži wostajichu. Wón je w lěće 1575 prěni raz zwonił, potajkim před 450 lětami“, rozprawja wosada w aktualnym hamtskim łopjenje Slepjanskeho zarjadniskeho zjednoćenstwa. Za zebranej zwonaj wosada po wójnje narunanje wobstaraše. Za 3 323 reichsmarkow, štož wotpowěduje dźensa něhdźe 14 000 euram, je firma Schilling & Lattermann w Apoldźe nowej železnej zwonaj zhotowiła. W septembru 1925 wonej na Slepjanske dwórnišćo dojědźeštej. Pokutny dźeń samsneho lěta jej poswjećichu.
Z koncertom Slepjanskeho folklorneho ansambla w Delnjowujězdźanskej ...
Krótkopowěsće (14.05.25)
Wjace jězbow na jubilej města
Kamjenc. Na swjedźenskim kóncu tydźenja składnostnje 800. narodnin města Kamjenc zhusća Wobchadny zwjazk Hornje Łobjo (VVO), DB Regio a Regionalny bus Hornja Łužica (RBO) swoje jězbne plany. Z wjace busami, přidatnymi wagonami na železniskich linijach a přidatnymi zwiskami po połnocy zaručeja zamołwići wot 16. do 18. meje přijomny při- a wotjězd za wopytowarjow swjedźenja.
Dóstanu wyšu mzdu
Budyšin. Přistajeni zawoda Budyski žonop tzwr dóstanu w přichodnych dwanaće měsacach wo 16 procentow zwyšenu mzdu. Na to stej so dźěłarnistwo NGG a nawodnistwo předewzaća w druhim kole jednanjow wo tarifowe zrěčenje dojednałoj. To je zwyšenje mzdow wo přerězne 413 eurow. Wot spočatka přichodneho lěta zawjedźe předewzaće 38hodźinski tydźeń bjeze zniženja mzdow.
Twórba z łatow po přećach
Dźěći a młodostni rejwali
Wobornicy so dźakowali
Přeprošuja na cyrkwinski dźeń
Zelena swěcaza nowu dróhu
Hamor/Čorna Pumpa (AK/SN). Druhi wotrězk Sprjewineje dróhi K 9281 wot Hamora do Čorneje Pumpy smě so twarić. Za to je krajna direkcija nětko twarsku dowolnosć dała, zdźěli jeje nowinski rěčnik Ingolf Ullrich. Jedna so wo 5,2 kilometraj dołhi wotrězk wot Sprjejc do Noweho Města.
„Z tutej twarskej dowolnosću móže so nětko dołho wočakowany zwisk mjez industrijowymaj centrumomaj Hamor a Čorna Pumpa dotwarić“, praji prezident krajneje direkcije Béla Bélafi. „Nowotwar wolóža zdobom wobydlerjow w Nowym Měsće, Nowej Wsy a Sprjejcach wot poćeženjow ćežkich nakładnych awtow na dróhach.“ Prěni wotrězk Sprjewineje dróhi wjedźe wot Hamora do Mułkec.
