Historiska kołopěc přistupna
Mały Kólsk (JoS/SN). Štóž za podlěšeny kónc tydźenja z jeho připowědźenym rjanym wjedrom hišće zajimawy cil pyta a so zdobom za to zajimuje, kak su něhdy cyhele palili, njech dojědźe sej do Małeho Kólska (Klein Kölzig) w braniborskim wokrjesu Sprjewja-Nysa. Tam móžeš sej w bywšej cyhelerni Hoffmannowu kołopěc (Ringofen) z lěta 1892 wobhladać. Po saněrowanju je pěc wopytowarjam nětko zaso přistupna. Nimo toho su tam njedawno nowu trajnu wustajeńcy „Na slědach kamjenjow“ wotewrěli. Wona dokumentuje historiski proces zhotowjenja cyhelow a wukon Friedricha Eduarda Hoffmanna, kotryž bě za kołopěc w lěće 1858 patent přizjewił.
W lěće 2002 měješe so stara cyhelernja w Małym Kólsku wottorhać, doeklž běše dospołnje dodźeržana. Tomu pak móžachu zadźěwać a inwestowachu wot toho časa něhdźe 2,1 milion eurow do kompleksa a jón jako pomnik saněrowachu.
Galeriju na wsy wotewrěli
W Miłoćicach maja wustajeńcu z fotografijemi a drjewjanymi skulpturami
Miłoćicy (SN/MiR). Na wšěch 40 zajimcow je wčera wotewrjenje galerije towarstwa Kamjenjak z.t. na Lipowym puću w Miłoćicach dožiwiło. Wustajenišćo w twarjenju něhdyšeje hródźe štyristronskeho statoka korjeni w idealizmje Miłočana a něhdyšeho předewzaćela Klausa Neumanna a jeho mandźelskeje Brigitty. Wonaj běštaj ležownosć z wjacorymi twarjenjemi přetwariłoj. W něhdyšej hródźi a bróžni njejstej dźensa jeničce ekologisce wuhotowanej bydleni. Hródź z wjelbom skići lubowarjam wuměłstwa w přizemju nětko přihódne zetkanišćo. Klaus Neumann přeješe powšitkownowužitnemu towarstwu Kamjenjak z darmotnym wužiwanjom hródźe wjele wjesela a wjele wuspěcha.
Na mejemjetanje
Radwor. Připowědźenych dróhotwarskich dźěłow dla přewjedu mejemjetanje w Radworju lětsa zašo hač hewak, mjenujcy njedźelu, 3. meje. Započatk na nawsy budźe w 15 hodź. Program wuhotuja holcy a hólcy Radworskeje katolskeje pěstowarnje a dujerjo z Wulkeje Dubrawy. Tomu slědujetej reja wokoło meje a žortny program. Wšitcy wjesnjenjo a dalši zajimcy su wutrobnje witani.
Zhromadnje spěwać
Budyšin. Zwjazk serbskich spěwarskich towarstwow (ZSST) přeprošuje na dalše zhromadne spěwanje. Wone wotměje so wutoru, 5. meje, we 18 hodź. w chórowej rumnosći SLA.
Rěčna hodźina zapósłanče
Kamjenc. Zapósłanča Sakskeho krajneho sejma Elaine Jenčec (CDU) přewjedźe přichodnu wobydlersku rěčnu hodźinu póndźelu, 4. meje, w swojim Kamjenskim běrowje na Zapadnej 4. Wot 15 do 17 hodź. móža wobydlerjo tam swoje naležnosće přednjesć. Termin njech dojednaja sej zajimcy pod telefoniskim čisłom 03578 305383 abo z mejlku na .
Křesćan Krawc čita
Mikławš Zahon škotowy turněr dobył
Lokomotiwa so bórze zaso błyšći
Parna lokomotiwa z čisłom 528056 ma cyle wosebity zwisk z městom Budyšinom. Tohodla dóstawa wona nětko wonkownje takrjec kuru, kotraž je tohorunja wosebiteho razu.
Budyšin (UM/SN). Budyšin bě wjele lětdźesatkow centrum železniskeho wobchada. Wot tudyšeho dwórnišća su ćahi do wšitkich směrow wotjězdźowali. Hišće hač do 1980tych lět zasadźichu při tym parne lokomotiwy. Mjez nimi bě tež ta z čisłom 528056. Kay Weißflog z Towarstwa wuchodosakskich přećelow železnicy rozłoži, čehodla je wona wosebita. „Tule parnu lokomotiwu mnozy Budyšenjo znaja. Wona steji hižo nimale 40 lět jako pomnik při dwórnišću. Hižo spočatk 1960tych lět je wona do Budyšina přišła a bě tule často zasadźena. 1988 su ju jako pomnik při dwórnišću stajili. Wona prosće do města słuša.“
Krótkopowěsće (30.04.26)
„Herbstwo Łužicy“ předstajili
Drježdźany. Nošerjo imaterielneho kulturneho herbstwa Sakskeje su so wčera w Drježdźanach zešli. Cyłkownje 21 kulturelnych formow ma w Sakskej tónle titul, mjez nimi su tež Serbja. W twarskej hěće Zwingera předstaji Susann Troppa projekt ,,Herbstwo Łužicy“, při čimž wosebje rólu imaterielneho kulturneho herbstwa Serbow wuzběhny.
Wulki nowy dołh za Saksku
Drježdźany. Načolni politikarjo koalicije CDU a SPD w Sakskej su so wčera (po redakciskim kóncu SN) tola hišće na kompromis za zakłady etata swobodneho stata za lěće 2027/28 dojednali. K tomu słuša přidatne zadołženje Sakskeje we wysokosći 1,4 miliardow eurow, štož bě CDU do toho wotpokazała. Nimo toho chcedźa hač do lěta 2040 w krajnej słužbje 8 773 dźěłowych městnow wottwarić.
Dźěławosć derje zaběžała
Dubrjenske bahno: Mnóstwo spadkow dawno njedosaha
Dohromady 1 260 hektarow wulke Dubrjenske bahno njedaloko Kulowa je najwjetše zwisowace bahno w Sakskej. Wot lěta 1972 steji wone pod škitom přirody. Hydrologowka Karin Keßler a přirodoškitar Herbert Schnabel so za zachowanje tuteje jónkrótneje krajiny zasadźujetaj.
Při horće natwarja cisternu
Delanska gmejnska rada so z wjacorymi twarskimi nadawkami zaběrała
Róžant (JK/SN). Nowotwar horta při Ralbičanskej šuli nabywa poněčim jasne kontury. Na wčerawšim posedźenju tamnišeje gmejnskeje rady informowaše wjesnjanosta Hubertus Ryćer (njestronjan) wo aktualnym stawje přihotow. Tučasnje dochadźeja prěnje poskitki za wupisane hłubokotwarske dźěła. Na přichodnym posedźenju gmejnskeje rady w meji chcedźa firmam konkretne nadawki přepodać. Wčera dorozumichu so wo nadawku za planowanje nutřkowneho wuhotowanja. Na wupisanje je zarjadniski zwjazk tři poskitki dóstał. Hospodarsce najlěpši bě inženjerski běrow pwd z Kamjenca zapodał. Samsny běrow je nowotwar horta planował a cyły twarski projekt přewodźa. Tak jemu nadawk we wobjimje 20 000 eurow přepodachu. Twarske dźěła maja so w lěću zahajić. W zwisku z twarom chcedźa při horće mobilnu cisternu za hašensku wodu nastajić. Woda z hydrantow w Ralbicach za hašenje wohenjow njedosaha. Tuž je přidatny skład hašenskeje wody trěbny.
Policija (29.04.26)
Diesel pokradnyli
Nowa Łuka. Tuchwilne wysoke płaćizny za diesel při tankownjach drje chcychu njeznaći w gmejnje Halštrowska Hola wobeńć a wobstarachu sej město toho ćěriwo na twarnišću pola Noweje Łuki. Kaž policija rozprawja, wuklumpachu woni z rawpy kaž tež z dweju bagrow dohromady 950 litrow diesela. Škoda wučinja něhdźe 2 100 eurow. Nimo toho naparachu skućićeljo wěcnu škodu, kotraž pak njeje hišće powobličena. Kriminalna słužba Wojerowskeho rewěra pad přepytuje.
