Morjenje zjawnosć dale zaběra
Mortwa młodostna blisko Łužnicy policiju a ludnosć dale zaběra. K mnohim dypkam, kotrež nadal jasne njejsu, so poněčim tež wěstosće a dalše wuslědźenja přidružeja.
Łužnica (dpa/SN/MG). Prěnju powěsć wo mordarstwje na 21lětnej w lěsu blisko Łužnicy bě němska powěsćernja dpa wčera krótko po 10 hodź. wozjewiła. Policajska direkcija w Zhorjelcu bě w tutym času mjenujcy wozjewiła, zo běchu „zastojnicy policajskeho rewěra Kamjenc nježiwu wosobu“ nadešli. W prěnjej zdźělence hižo rěka, zo su 16lětneho, kiž je młodu žonu pozdatnje zamordował, zajeli. Wčera připołdnju policija potom wozjewi, zo je sudnik přikazał, zo ma skućićel za čas přepytowanjow w „fachowej chorowni“ přebywać.
„Młynska reja“ wjeršk była
Ćisk (JT/SN). Wot někotrych šwihelow dešća njejsu so młodostni w Ćisku zatrašić dali a přewjedźechu sobotu mejemjetanje. Wobdźěliło je so 14 porow. Holcy běchu so serbsku drastu woblekli. Hižo před tydźenjemi běchu štom wobstarali, kónc apryla pletwu zwili, meju stajili a ju pozdźišo wobstajnje stražowali. Nětko móžachu ju skónčnje powalić.
Na swjedźenišću bě wšitko přihotowane a meja wuryta. 34 metrow wysoka wona do předwidźaneho směra padny. Najspěšniši při wjeršku bě Carlo Nitzsche, kiž sej swoju partnerku Lisu Caban za mejsku kralownu wuzwoli. Druhi dźěl zarjadowanja zmištrowachu młodostni ja jewišću. W połhodźinskim programje pokazachu serbske reje, kotrež běchu ze Susann Sulkowej wot Ćišćanskeje rejwanskeje skupiny nazwučowali. Wjeršk bě „Młynska reja“. Ju bě Helga Hanšowa před lětami choreografowała.
Přeprošuja na solarnu party
Pančicy-Kukow. Towarstwo Ostsachsen wechselt a VEE Sakska přewjedźetej srjedu, 4. junija, wot 17 do 20 hodź. tak mjenowanu solarnu party w gmejnje Pančicy-Kukow. Za nju móža so zajimcy pod adresu přizjewić. Potom zajimcam tež zdźěla, hdźe so zarjadowanje dokładnje wotměje. Myslene je wone za wšitkich wobsedźerjow domow, kotřiž rozmysluja, kak móhli so přichodnje z pomocu wobnowjomnych energijow z milinu a ćopłotu zastarać. Wobdźělnicy wobhladaja sej solarnu připrawu z bateriju kaž tež ćopłotnu klumpu za přemysłowu jednotku. K tomu poskićuja organizatorojo krótke přednoški w němskej rěči. Wobdźělenje je darmotne.
Literarnje po Łužicy pućować
Jubilej dušu kemšerjow jimał
W Slepom na wosebitu róčnicu cyrkwinskich zwonow dopominali
Slepo (JR/SN). Byrnjež minjenu njedźelu tež nad Slepom ćmowe mróčele dešća wisali, bě tón dźeń za wosadu njewšědny swjedźeń. Mały zwón tamnišeje cyrkwje swjećeše takrjec 450. narodniny, jeho młódšej towaršej zhladowaštej na 100lětne wobstaće. Wšitke tři zwony su swědki wotměnjawych stawiznow. Bjez dźiwa, zo bě wjele Slepjanow na swjedźenske kemše přichwatało. Zwony su za nich wjace hač jenož nastroje, kotrež zwuki wuprudźeja. Wone su skerje dźěl identity, proša k modlitwje, přewodźeja křćeńcy, kwasy a rozžohnowanja – a dušu stajnje znowa jimaja.
Hudźbny wjeršk njedźelnych swjedźenskich kemšow bě kanon „Bruder Jakob“, nawjedowany wot kantora Björna Soboty. Kemšerjo zahoriće sobu spěwachu, najprjedy cunjo, pozdźišo ze sylnym hłosom. Při tym so zwony z melodiju zjednoćichu a po wšěm Božim domje klinčachu.
Łužiske wosebitosće předstajili
Nic jenož programy na jewišćach su minjeny kónc tydźenja wjele ludźi do Kamjenca na 800. jubilej města přiwabili. Tež kulinarisce skićeše Lessingowe město někotružkuli wosebitostku. Łužiscy producenća běchu při jewišću blisko Čerwjeneje wěže zaměstnjeni.
Kamjenc (BG/SN). Hłódny kónc tydźenja w Kamjencu nichtó wostać trjebał njeje. Mjeztym zo móžachu wopytowarjo mjez radnicu a Klóšterskimi wrotami předewšěm mjezynarodne speciality woptawać, woni při Čerwjenej wěži zhonichu, što wobydlerjo dwurěčneje Łužicy rady jědźa a pija. Iniciatiwa „Łužica słodźi“ prezentowaše kónc tydźenja słódnosće z Kamjenskeho, Wojerowskeho a Budyskeho regiona. Tak njeposkićowaše klóšterska pjekarnja z Pančic-Kukow jenož słódny tykanc, ale tež hejdušny chlěb. Krabatowy mlokowy swět z Koćiny prezentowaše wjacore družiny swójskeho twarožka, mjez druhim Čorny młynk mjenowany kurjeny twarožk. Mnozy zajimowachu so za aromatizowany měd. Pčołar Hubert Lange wudospołni sortiment z jónkrótnymi kreacijemi ze swojeho domu.
Po 37 lětach wotmě so minjeny pjatk zaso mejemjetanje w Komorowje ...
Kretschmer wosobinsce gratulował
Krótkopowěsće (20.05.25)
Pieniekowa w PENje
Darmstadt. Dr. Christianu Piniekowu, basnjerku a wudawaćelku wosebje delnjoserbskeje literatury z Choćebuza, přiwzachu minjeny pjatk do zwjazka spisowaćelow, kotremuž rěkaja PEN-Zentrum Němskeje. We wopodstatnjenju k přiwzaću z pjera profesora dr. Ottmara Ette z Podstupima a Benedikta Dyrlicha z Drježdźan so mjez druhim basniske dźělo a zasłužby trojorěčneje awtorki wuzběhuja.
Přetwar muzeja wčera zahajili
Kamjenc. Ze symboliskim prěnim zarywom je so wčera přetwar Kamjenskeho Lessingoweho muzeja zahajił. Zwjazk a Sakska projekt zhromadnje z cyłkownje 2,5 milionami eurow spěchujetej. Pjenjezy su z hornca zakonja za inwesticije w brunicowych regionach. Muzej dyrbi moderne wuhotowanje za swoje prezentacije dóstać. Płoninu za wustajeńcy powjetša.
Slědźi wo žiwjenju młodostnych
Policija (19.05.25)
16lětneho podhladneho zajeli
Łužnica. Po pokiwje wobydlerja su zastojnicy wčera rano mortwu wosobu w lěsu pola Łužnicy (Lausnitz) namakali. Přiwołany nuzowy lěkar móžeše jenož hišće jeje smjerć zwěsćić. Prěnje přepytowanja wujewichu podhlad morjenja a wjedźechu k 16lětnemu podhladnemu. Kaž Zhorjelska policajska direkcija zdźěli. Němskeho staćana nachwilnje zajachu. Dźensa měješe so rozsudźić, hač wón do přepytowanskeje jatby přińdźe. Wopor je 21lětna němska staćanka. Kak je młoda žona žiwjenje přisadźiła, komisija za mordarstwa nětko přepytuje. Hdźež su wopor namakali, móžachu kriminalni technikarjo slědy zawěsćić.
