Hač do póndźele móža so zajimcy za konferencu „Domoj do přichoda – dwurěčna Łužica 2100“ 13. nowembra přizjewić. Hišće je swobodnych městnow za wuměnu wo wšědnym serbowanju.

Budyšin (SN/mb). Nawjazujo na někotre ćežišća swojeho akciskeho plana wuhotuje syć za serbsku rěč a regionalnu identitu ZARI w nošerstwje Domowiny tutu konferencu wo „wiziji, zamołwitosći, zhromadnej syći“ w Smochčanskim kubłanišću swjateho Bena. Wosebje prěnja a pjata dźěłarnička móhłoj tež maćernorěčnych Serbow z tak mjenowanych jadrowych kónčin zajimować. „Kak docpějemy dwurěčnu normalitu?“ rěka prěnja tema. Nawodnica ZARI Diana Pawlikowa na naprašowanje Serbskich Nowin na to skedźbni, zo je tež serbskim zarjadowarjam hustodosć ćežko, spokojacu dwurěčnosć zwoprawdźeć. Druhdy je wabjenje ryzy němske abo serbske přinoški na zarjadowanjach so prosće němsce wo­spjetuja, štož Serbam na čuwy pada. Tohodla je wuměna wo inteligentnišich formach wažna.