Ćisk (JT/SN). Na mału swjatočnosć, kotruž je Janina Sulk hudźbnje na akordeonje wobrubiła, je čłonka Ćišćanskeje wjesneje rady Brunhilde Richter minjenu njedźelu do Ćišćanskeho parka dźěćacych štomow přeprosyła. Tam sadźichu štom za loni we wsy narodźene dźěći. Mjez hosćimi běchu nimo swójbnych nowonarodźenych dźěći tež dalši čłonojo wjesneje rady.

Je to mjeztym hižo pjatnaty tajki štom a poněčim była wusko na městnje pódla wohnjoweje wobory, kotrež za tule tra­diciju wužiwaja. Brunhilde Richter do­pominaše na prěnje prócowanja Dory Gebaueroweje: Wona chcyše, zo nastanje na njewužiwanej płoninje nahladny park. Mjeztym so tu mnozy wjesnjenjo kaž tež jich hosćo wočerstwjeja a sej jabłuko, wišnju abo krušwu wotšćipnu. Lětsa wosebje požadane běchu pšeńčnaki ze štoma, kotryž běchu 2020 sadźili.