Pančicy-Kukow. Młodźinu a staršich přeprošuja srjedu, 8. oktobra, wot 13 do 17 hodź. do zahrody klóštra Marijineje hwězdy w Pančicach-Kukowje na pisany nazymski dźeń połny dožiwjenjow. Při wšelakich paslenskich stejnišćach móža wopytowarjo z drjewa a płodow swójske dekoracije paslić a mjez druhim nazymske wěncy, swěčniki a podobne zhotowić. Lubowarjam hribow rozprawja fachowc zajimawostki wo swěće prawakow, brězakow a co. Mjez druhim wón rozłoži, kak hriby za jědź spóznawaš, kak je prawje wurjedźiš a konserwuješ. K tomu přidruži so přehladka běrnow. Tuta informuje wo tym, kak rozdźělnje běrny słodźa a kak jednotliwe družiny prawje wužiwaš. W kuchni přirodoweje a wučbneje zahrody warja z nazymskich płodow słódne poliwki a jědźe z běrnami. Tež małe zakuski tam zhotowja, kotrež móža wo­pytowarjo wězo woptać. Młódši wopytowarjo móža při hrach swoje fitnesowe kmanosće dopokazać. Čłonojo Jaworskeho motorsportoweho kluba přijědu z někotrymi dźěćacymi motocrossowymi motorskimi, na kotrychž smědźa so mali zajimcy wuspytać.