Juliana Macalina bě překwapjena, zo je wólby Njeswačanskeje wjesnjanostki w druhim přechodźe tak jasnje ­dobyła. Nětko chce so połnje swojemu nowemu zastojnstwu wěnować.

Njeswačidło (UM/SN). Nowowuzwolena wjesnjanostka Njeswačanskeje gmejny Juliana Macalina je po swójskim wuprajenju derje na swoje zamołwite skutkowanje přihotowana. „Runje hladajo na tuchwilnu situaciju z hospodarskim konsolidowanjom budźe přichodny čas jara napjaty. Njeswačanska gmejna ma potencial, so z tohole połoženja zaso wudrapać. Wo tym sym přeswědčena. Za to je najprjedy raz dobra komunikacija trěbna“, wona měni.