Krótkopowěsće (08.04.25)
Projekt DOMOJ zahajili
Wulke Zdźary. Domowina je dźensa we Wulkich Zdźarach rěčny projekt DOMOJ zahajiła. To je intensiwny kurs serbšćiny, kotryž dźewjeć měsacow traje. Dohromady jědnaće wobdźělnikow pod nawodom wučerki serbšćiny Jadwigi Brězanoweje zhromadnje w tak mjenowanym rěčnym hnězdźe wuknje. Woni pochadźeja z wšelakich kónčinow Hornjeje Łužicy.
Přepytowanje zakónčene
Kamjenc. Při saněrowanju spěchowanskeje šule w Kamjencu su so škódne maćizny do powětra dóstali, čehoždla bě strowota wučerjow a šulerjow wohrožena. Statne rěčnistwo je na to přepytowanje zahajiło a pad nětko wotzamknyło. Wumjetowany njeskutk njekedźbliweho zranjenja ćěła dla njehodźi so dopokazać, je wuslědk slědźenjow.
Galicisko-łužisku hru předstajili
Dopominaja na wojerske stawizny města
Kamjenc (BG/SN). Wjele lětdźesatkow bě Kamjenc garnizonske městno. Nětko móžeš sej tamniše nimale stolětne wojerske stawizny zbližić. Minjene dny su něhdźe 4,5 kilometrow dołhi garnizonski puć po měsće zjawnosći přepodali. Dohromady 40 stacijow je z QR-codami wuhotowanych, z kotrychž pomocu móžeš so ze šmóratkom wo stawizniskich zajimawostkach městnow a twarjenjow wobhonić. „Na te wašnje stawizny žiwe zachowujemy“, praji wyši měšćanosta Roland Dantz (njestronjan).
Ideju tajkeje šćežki zrodźił je hižo před wjele lětami Ernst Ferdinand Egel. Nětko je Kamjenska EWAG jeho nastork přewzała a jako hłowny akter zwoprawdźiła. K tomu wudaštaj brošurce, w kotrejž su wšitke informacije wo wojerskich stawiznach Lessingoweho města zjimane. Tak zajimc mjez druhim zhoni, kak je so wójsko lětdźesatki na město hospodarsce a kulturelnje wuskutkowało. Wojakow a oficěrow, kotrychž su tu wukubłali, dźě dyrbjachu tež zastarać. Z tym mějachu ratarjo a rjemjeslnicy krute dochody. Hač do kónca NDR bě armeja najsylniša hospodarska móc w měsće.
Wobydlerjo wjes wurjedźili
Chcedźa šulu přetwarić
Malešanska gmejna dyrbi hoberski podźěl sama zapłaćić
Malešecy (UM/SN). Lěto 2025 steji w Malešanskej gmejnje w znamjenju přihotow za přetwar dotalneje wyšeje na zakładnu šulu. „Tomu je wšitko druhe podrjadowane“, praji wjesnjanosta Matthias Seidel (CDU). Gmejnska rada je nadawk za planowanje we wobjimje 1,6 milionow eurow Budyskemu běrowej Bauplanung přepodała. Cyłkowne kóšty trochuja na něhdźe 11,5 milionow eurow. Z toho Swobodny stat Sakska 6,9 milionow eurow spěchuje. To woznamjenja, zo ma Malešanska gmejna swójski podźěl 4,6 milionow eurow zapłaćić. Hladajo na powšitkownje ćežku pjenježnu situaciju komunow je to hoberska suma. „2025 chcemy projekt planować a twarske dźěła wupisać. Klětu w februaru chcemy twarić započeć. Naš cil je, zo zakładna šula w lěću 2027 z Hućiny do Malešec přećehnje“, wjesnjanosta rozłoži. Wažny wobstatk projekta je centralny hort za cyłu gmejnu. Wón ma dotalne jednotliwe hortowe stejnišća narunać. Cyłkowne maja tuchwilu pjeć tajkich stejnišćow.
Policija (07.04.25)
Na awtodróze mórali
Słona Boršć. Kedźbliwi šoferojo policiju w nocy na njedźelu informowachu, zo při awtodróze A 4 mjez Słonej Boršću a Hornim Wujězdom něchtó škitne sćěny pomóra. Na městnje zwěsćichu zastojnicy dwě wosobje, kotrejž pěši ćeknyštej. 22lětneho hišće w bliskosći dosahnychu. Wón swój njeskutk hnydom přizna. Dalši 20lětny so sam wot so k městnu njeskutka wróći a móranje tohorunja přizna. Wobaj běštaj wjacore metry wulke pismiki na sćěny napryskałoj a tak něhdźe 5 000 eurow škody načiniłoj. Jedyn z njeju steješe pod wliwom drogow.
Móst pola Hućiny ponowjeja
Hućina (SN/MWj). Spočatk měsaca su na statnej dróze S 109 móst nad Nowej hrjebju pola Hućiny ponowić započeli. Pod pomnikoškitom stejacy twar bě chětro wobškodźeny, tak zo dyrbja jón saněrować. Twarske dźěła maja hač do oktobra 2025 trać, krajny zarjad za dróhotwar a wobchad w nowinskim wozjewjenju zdźěli.
W tym zwisku wudospołnjeja wjelby pod mostom z nowej platu, kotraž poćežowanja lěpje rozdźěli. Móst ma přichodnje sydom metrow šěroki być. Do njeho budźe wotwodźowanje dešćikoweje wody zapřijate. Puć před mostom a za nim tohorunja wutwarja, a to na cyłkownej dołhosći 60 metrow.
Za čas twarskich dźěłow budźe S 109 dospołnje zawrjena. Sewjerna wobjězdka powjedźe wot Budyšina přez zwjazkowu dróhu B 156 hač do Lěskeje, wottam dale po S 121 hač do Mikowa a skónčnje wróćo na S 109. Južnje powjedu wobchad přez B 156 kaž tež B 6 dale na S 111 pola Wósporka a po S 55 sewjernje Wysokeje Dubrawy wróćo na S 109. Busy pojědu po hinašej wobjězdce. Pěškow a kolesowarjow po lěsnych pućach nimo twarnišća powjedu.
Nowa kreatiwnosć napadnyła
Slepo (JoS/SN). Ze 26. serbskimi wikami jutrownych jejkow bě Slepo minjeny kónc tydźenja jedyn z najwjetšich wopytowarskich magnetow we Łužicy – runje tak kaž w zašłych lětach. Hižo sobotu dopołdnja hosćo do Serbskeho kulturneho centruma (SKC) přichadźachu, jako wiki scyła hišće wotewrjene njeběchu. Přiwšěm smědźachu sej woni wšitko wobhladać, wšako mějachu debjerjo a wikowarjo swoje stejnišća hižo natwarjene. Hołk a tołk na woběmaj dnjomaj njepopušći.
Zwjeselace, zo běchu mjez debjerjemi nowe wobliča. Mjez dorostom běštej młodej žonje z Mikowa: Rita Schletze a Lisa Sachse. W zašłosći běštej so hižo jeju maćeri na wikach wobdźěliłoj, Beatris Sachse tež lětsa. Sachsec mać a dźowka běštej lětsa znowa mjez wuznamjenjenymi wubědźowanja wo najrjeńše serbske jutrowne jejko. Napadnyła je tónraz wěsta nowa kreatiwnosć. Tak běchu pinkbarbne jejka ze serbskimi mustrami wudebjene. Tež motiwy po wšěm zdaću žane hranicy njeznajachu. Mnozy wopytowarjo sej tajke a hinaše debjene jutrowne jejka kupichu.
Syłu wopytowarjow móžeštaj Frenclec mandźelskaj Angelika a ...
Krótkopowěsće (07.04.25)
Krimi posledni raz předstajili
Budyšin. Błótowski krimi „Smjerć po štučkach“ su dźiwadźelnicy Němsko-Serbskeho ludoweho dźiwadła zawčerawšim posledni raz předstajili. Cyłkownje šěsć hornjoserbskich předstajenjow je sej něhdźe 850 ludźi wobhladało. Krimi staj Alexander Marusch a Madleńka Šołćic napisałoj. Fabian Kaulfürst je inscenaciju zeserbšćił.
Chcedźa syć spěšnišo wutwarić
Šwikawa/Pirna. Něhdźe 128 000 dalšich domjacnosćow a předewzaćow chce Telekom hač do kónca lěta na swójske kóšty spěšnej internetnej syći přizamknyć. Po zymskej přestawce z wutwarom syće pokročuja. Z toho maja mjez druhim tež domjacnosće a předewzaća w Zhorjelskim a Budyskim wokrjesu profitować, koncern Telekom wčera zdźěli.
Přijeće za dźěći
