Pančicy-Kukow (SN/MWj). Serbske kubłanske temy stejachu pjatk w srjedźišću zeńdźenja dźěłoweho kruha za šule a kubłanje frakcije CDU Sakskeho krajneho sejma w Pančicach-Kukowje. Čłonka dźěłoweho kruha Elaine Jenčec chcyše swojim kolegam z druhich kónčin Sakskeje rozłožić a na městnje pokazać, kak so serbske a dwurěčne kubłanje zwoprawdźa.
Prěnja stacija bě Pančičanska pěstowarnja w nošerstwje Křesćansko-socialneho kubłanskeho skutka. Tam sobudźěłaćerka Rěčneho centruma WITAJ Jadwiga Kaulfürstowa metodu imersije předstaji. Při tym pokaza wona na rozdźěle mjez serbskimi pěstowarnjemi, Witaj-pěstowarnjemi a Witaj-skupinami. Hosćo chcychu mjez druhim wědźeć, hač je dosć kubłarkow, kak naslědna tale forma nawuknjenja rěče je a kak so we wšědnym dźěle zaruča, zo dźěći z rozdźělnymi kubłarkami w rozdźělnymaj rěčomaj rěča. Nawodnica pěstowarnje Petra Bačcyna rozłoži, kak je so dźěło po metodźe imersije wot lěta 2006 hač do dźensnišeho wuwiło.
