Worklecy (SN/lmc). Z mjenje abo bóle spontaneje ideje na jězbje z busom je nowy medijowy produkt nastał: Serbski podcast „Tak a znak – Štóž ma wuši k słyšenju, słyš“ (Mt 13,9). „Prěni impuls nasta na swětowym zetkanju młodźiny w Lissabonje, hdźež přewzachmoj kapłan Florian Mróz a ja zamołwitosć za jedyn z dweju serbskeju busow“, dopomina so Gloria Lanzyna w dźesać mjeńšin trajacej předpowědźi, tak mjenowanym teaseru, podcasta. W busu je wona z pomocu digitalneje sćěnowiny anonymnje prašenja młodostnych wo wěrje zběrała. Temy sahachu wot cyle wšědnych prašenjow hač k zakładnemu rozmyslowanju wo Bohu, cyrkwi a žiwjenju. Z rozmołwow nasta skónčnje ideja, so z tutymi myslemi nic jenož w busu, ale w šěršim kruhu zajimcow rozestajeć. W lěće 2024 započachu so wobdźěleni prawidłownje zetkawać a wobsahi za to přihotować.

Witschas chce wospjet nastupić

Budyšin. Krajny rada Budyskeho wo­krjesa Udo Witschas (CDU) je w interviewje ze Sakskej Nowinu připowědźił, zo 2029 zaso k wólbam nastupi. Wón drje rjekny, zo bě CDU přeco jeho politiska domizna, zdobom pak připowědźi, jako swobodny kandidat za zastojnstwo krajneho rady kandidować, jeli jeho „CDU w lěće 2029 hižo měć nochce“. Swój rozsud wopodstatni z tym, zo tójšto wulkich inwesticijow 2029 hišće zdokonjanych njebudźe.

Zjawny bliskowobchad stawkuje

Pirna. Dotal njewuspěšnych tarifowych jednanjow dla je dźěłarnistwo Verdi po cyłej Sakskej warnowanske stawki w regionalnym zjawnym bliskowobchadźe připowědźiło. We wokrjesu Sakska Šwica-wuchodne Rudne horiny su seriju stawkow wčera zahajili. Dźensa pokročuja w Šwikawje. Na nowy tydźeń stawkuja mjez druhim tež w Zhorjelskim a Budyskim wokrjesu.

Nowotwar železnicy wot 2032?

Njedawno su na přitwarje Kamjenskeho Lessingoweho muzeja zběhanku swjećili. To bě rjana składnosć, raz za kulisy twarnišća pohladać. Muzej ma so zaso z wuznamnym kulturnym srjedźišćom města stać.

Kamjenc (UM/SN). Rumnosće a chódby Kamjenskeho Lessingoweho muzeja su tuchwilu chětro prózdne. Hdźež běchu hišće před něhdźe lětom portrety wu­znamneho, 1729 w Kamjencu narodźeneho rozswětlerja wisali a we witrinach eksponaty wo jeho tworjenju swědčili, widźi wopytowar aktualnje nahe sćěny, kotrychž wobmjetk je zdźěla wotklepany. Wulke wokna, z kotrymiž sy dotal na dwór a mały park hladać móhł, su swoju funkciju zhubili. Před nimi dźě je zašłe měsacy nowy přitwar dowysoka rostł. „Wot časa jeho natwara njeje so za naš dom hišće ženje telko pjenjez nałožiło“, rozłoži dr. Sylke Kaufmann, nawodnica Kamjenskich měšćanskich zběrkow, ­kotrymž tež Lessingowy muzej přisłuša. „W nowym twarjenju změjemy městno za wosebite wustajeńcy, kajkež je hišće nihdy měli njejsmy. Dom budźe wjele atraktiwniši hač dotal.“

Pěskecy. Towarstwa, iniciatiwy a wšitcy dalši zajimowani wobydlerjo su jutře, wutoru, we 18 hodź. do Pěskečanskeho sportoweho domu na wobydlersku zhromadźiznu přeprošeni. Tam informuja kulturna załožba Swobodneho stata Sakskeje, krajnoradny zarjad, Towarstwo za wuwiće Hornjołužiskeje hole a hatow, Domowina a Załožba za serbski lud wo swojich móžnosćach spěchowanja. Nimo toho předstaja projekt přetwara Pěskečanskeho sportoweho domu.

Stipendije za kurs čěšćiny

Budyšin. Štóž ma zajim za rěčny kurs ­čěšćiny w Praze wot 16. julija do 13. awgusta 2026 abo w Čěskich Budějovicach wot 2. awgusta do 24. awgusta 2026, ­njech w Rěčnym centrumje WITAJ hač do njedźele, 15. měrca, swoje přizjewjenske podłožki woteda (Póstowe naměsto 2, 02625 Budyšin, e-mail: ). Wotpowědny formular a dalše informacije su na internetnej stronje přistupne. Sobudźěłaćerjo RCW na prašenja rady wotmołwja.

Nagel, Janáček, Bulank w koncerće