Policija (26.03.25)
Twarskeho dźěłaćerja ćežce zranił
Budyšin. 65lětny šofer, kotryž běše wutoru popołdnju na Budyskej Lubijskej z města won po puću, je ze swojim nakładnym awtom zběhacu dźěłowu platformu při křižowanišću Lubijska/Wósporska potorhnył. Při tym zrani so 46lětny muž, kotryž běše na platformje stejo dźěłał, ćežce. Wuchowanska słužba dowjeze jeho z helikopterom do chorownje. Wobchadna słužba je přepytowanja přewzała.
Gmejnska rada so schadźuje
Pančicy-Kukow. Wjesnjanosta gmejny Pančicy-Kukow Markus Kreuz přeprošuje wšitkich zajimowanych wobydlerjow na zjawny dźěl posedźenja gmejnskeje rady a to štwórtk, 27. měrca, w 19 hodź. do něhdyšeje Wotrowskeje šule. Na dnjowym porjedźe steji mjez druhim diskusija wo hasnjenju nadróžneho wobswětlenja we wšěch wjesnych dźěłach gmejny.
Nalětnje spěwanje
Budyšin. Někotryžkuli Budyšan znaje krasnu přehladku kamelijow Steglichec zahrodnistwa. Hač do 10. apryla móža zajimcy w tutych tydźenjach krasnje kćějace rostliny wobdźiwać. Sobotu, 29. měrca, přeprošuje Hudźbny kruh Consonare swj. Pětra w 15 hodź. do zahrodnistwa na swój wustup, na kotrymž zanjese nalětnje pěsnje, je-li słónčne wjedro wonka, je-li so dešćuje, w rostlinarni. Zastup je darmotny.
Maćica Serbska přeprošuje
Spjatnišćo w Ratarjecach poswjećili
Stawizna Jakuba Pawluška hnuła
Na přednošk Eckharda Klimana pod titulom „Stawizna Jakuba Pawluška – zapaler a posledni zasudźeny, kotrehož su na Chróšćan Šibjeńcy wotprawili“ běše minjeny pjatk wječor dohromady 40 připosłucharjow do swjedźenskeje bróžnje Měrka Šołty we Wudworju přichwatało. Referent, wjesny chronist a wurjadny znajer stawiznow wokoliny, předstaji w róli rychtarja dóńt z Kozarc pochadźaceho Jakuba Kmjeća, kotryž so w swojim času do Pawluškec dwora w Baćonju woženi a so wot toho časa Jakub Pawluška mjenowaše.
Paduši znowa cyrkej „wopytali“
Chrósćicy (SN/VaŽ). We Łužicy pokročuje trend: Zadobywanja do cyrkwjow. Tež Chróšćanska cyrkej je potrjechena. Hakle minjenu njedźelu běchu so njeznaći skućićeljo z namocu do Božeho domu zadobyli, póndźelu su to wospjet činili. Na woběmaj dnjomaj spytachu zadobywarjo wopornik rozłamać. Na prěnim dnju so pospyt njeporadźi, město toho su wołtarny křiž pokradnyli.
Póndźelu su skućićeljo wopornik dospołnje zničili, w nim pak su jenož 10 eurow nadešli. Nimo toho spytachu trezor na informowanišću w cyrkwi wočinić, štož so jim njeporadźi. Durje trezora pak při tym chětro wobškodźichu. Wěcna škoda wobeju zadobyćow wučinja cyłkownje něhdźe 3 000 eurow. Zastojnicy policajskeho rewěra w Kamjencu padaj přepytuja.
Farar Chróšćanskeje wosady Měrćin Deleńk je podawkow dla jara zludany. Dokładny čas njeskutka njejsu dotal zwěsćić móhli. Zwóńk wosady je škodu wutoru rano nadešoł. Napadne je, zo slědźachu paduši wospjet na samsnych městnach za „dobytwu“.
Insektam biotop stworili
Přirodoškitna stacija renaturěrowanje hatow w Koslowje zakónčiła
Njeswačidło (SN). Haty Budyskeho wokrjesa njejsu jenož wažny biotop za amfibije a libele, ale tež za druhu skupinu zwěrjatow, kotraž fascinuje: wódne bruki. Na dobro tutoho wosebiteho žiwjenskeho ruma je Njeswačanska přirodoškitna stacija nětko wosebitu naprawu kołowokoło łučneju hatow w Koslowje zakónčiła, w kotrejž je při pobrjohach nowe pasma z niłkej wodu stworiła. Larwy wódnych brukow a libelow w tajkich płonych, słónčnych pasmach blisko přibrjoha wotrostuja. Přez renaturěrowansku naprawu stupaja šansy na znowazasydlenje nurjenskeho bruka (Tauchkäfer) abo wot wutupjenja wohroženeje bahnoweje holanskeje libele (Sumpfheidelibelle).
Krótkopowěsće (26.03.25)
Olympiada rěče zahajena
Wodowe Hendrichecy. Na swoju tradicionelnu centralnu olympiadu serbskeje rěče je Serbske šulske towarstwo tež lětsa zaso šulerki a šulerjow 6. lětnikow serbskich šulow přeprosyło. Hač do pjatka wubědźuja so dźěći wo prěnje městna. Wobšěrnu rozprawu čitaće w jutřišim čisle Serbskich Nowin.
Mortkow mjez kandidatami
Lipsk. Rozhłosowy sćelak MDR Jump chce lětsa zaso jutrowny woheń zarjadować. Wo městnosći maja připosłucharjo wothłosować. Mjez šěsć městami a wjeskami w Sakskej, Durinskej a Saksko-Anhaltskej je lětsa tež Mortkow pola Łaza, hdźež móhł so swjedźeń ćichu sobotu, 19. apryla, na twjerdźiznje wotměć. Na koncerće chcedźa mjez druhim spěwarja Maxa Giesingera witać.
SSW chce wjac prawow w sejmje
Na „Kofej w třoch“ do muzeja
Budyšin. Serbski muzej w Budyšinje přeprošuje srjedu, 26. měrca, w 15 hodź. na „Kofej w třoch“ wo temje „Swójbne slědźenje za započatkarjow“. Biskopstwo Drježdźany-Mišno je cyrkwinske knihi katolskich wosadow hač do lěta 1875 zjawnosći online spřistupniło. Nětko móže kóždy zajimc w katolskej Hornjej Łužicy za swójbnymi stawiznami slědźić. Na přikładźe swójskich rešeršow prezentuje referent Alexander Pólk přistup a wužiwanje zjawnych žórłow, pomocny grat za systematizowanje wuslědkow a tón abo tamny kuriozny zadźěwk při slědźenju.
Dalši casting za lěćne dźiwadło
Budyšin. Němsko-Serbske ludowe dźiwadło wuhotuje jutře, srjedu, dalši casting za lětušu inscenaciju pod hołym njebjom „Alice im Wunderland“. Wot 17 hodź. móža zajimcy w starobje znajmjeńša 18 lět we wulkim domje swoje rejowanske kmanosće předstajić. Wobknježić měli zakłady stilow modern dance, jazzowa reja a/abo neoklasiska technika. Proby zahaja so 28. apryla, předstajenja wotměja so wot 12. junija do 20. julija na Budyskim hrodźe. Přizjewjenja su z mailku na móžne.
Wudworčenjo w campje zwučowali
Swjedźeń 650. róčnicy wuhódnoćili
Smjerdźečanska wohnjowa wobora je hromadźe z wjesnej radu tydźenja sobotu wšitkich wjesnjanow do tamnišeho kulturneho domu přeprosyła. Wjace hač sto zajimcow je přeprošenje sćěhowało, zo bychu zhromadnje na wulki swjedźeń składnostnje 650. róčnicy prěnjeho naspomnjenja delanskeje wjeski zhladowali. Jón běchu kónca awgusta a spočatka septembra zašłeho lěta woswjećili.
