Liča z přiběracym dołhom
W Njebjelčanskej gmejnje lětsa hišće někotre inwesticije móžne
Njebjelčicy (SN/MWj). Prjedy hač změje Njebjelčanska gmejna přichodne lěta dale a mjenje pjenjez, so wjesnjanosta André Bulank lětsa na měrne lěto nadźija, w kotrymž móža hišće něštožkuli inwestować. Tole znajmjeńša wuchadźa z hospodarskeho plana za lěto 2026, wo kotrymž je gmejnska rada w januaru wuradźowała a wo kotrymž chcedźa spočatk měrca wothłosować. Chcyjo nochcyjo radźićeljo potom wobzamknu, zo změja lětsa něhdźe 200 000 eurow wjace wudawkow hač dochodow.
Z wotstawkom najwyše wudawki we wobjimje 650 000 eurow zawinuje swójski přinošk gmejny za jeje pěstowarnju. Dale dyrbja wokrjesej 450 000 eurow wokrjesneho wotedawka płaćić. Přinošk gmejny za zarjadniski zwjazk Při Klóšterskej wodźe wučinja 290 000 eurow.
„Swětło nalěća“ w parku dožiwić
Wochozy (AK/SN). Z instalaciju „Swětło nalěća“ Choćebuskeho wuměłca Jörna Hanitzscha zahaji Wochožanski park błudźenkow wot 14. hač do 29. měrca lětušu sezonu. Na 16 wječorach móža wopytowarjo w 25 hektarow wulkim parku swětłowu instalaciju dožiwić. Za to budźe park hač do 22 hodź. wočinjeny. Za mjenowany poskitk změja cyłkownje 2 000 zastupnych lisćikow. Zajimcy měli sej swoju zastupjenku sčasom skazać, praji wčera jednaćelka parka Anita Schwitalla. Za swětłowu instalaciju płaći regularny zastupny lisćik.
Zdobom předstajichu wčera dalše wjerški programa tohole lěta. Jutrownu póndźelu wuhotuja program za dźěći. 18. apryla wotměje so třeći Běh po parku błudźenkow. Z němsko-pólskim lěćnym swjedźenjom wočakuje wopytowarjow njedźelu, 14. junija, nowy format zarjadowanjow. Mjez druhim wustupi chór filharmonije z pólskeje Zieloneje Góry. 6. septembra přeprošuja na serbske popołdnjo. Z hosćom budźe Serbski ludowy ansambl ze swojim programom „Wot dudow hač k tarakawje“.
Po tójšto šěrych dnjach je wčera skónčnje zaso raz słónco na ...
Krótkopowěsće (11.02.26)
Awdienca live na sćelaku
Rom. Skupina serbskich družkow z jich hotowańčemi kaž tež wjacori serbscy duchowni přebywaja tuchwilu w Romje (SN rozprawjachu). Dźensa su so na generalnej awdiency bamža Leja XIV. wobdźělili. Tutu bě sćelak EWTN live přenjesł. Na kónc awdiency bě Drježdźansko-Mišnjanski biskop Heinrich Timmervers bamža w mjenje putnikow postrowił.
Žurnalisća z woporom njeskutkow
Berlin/Drježdźany. 82 njeskutkow přećiwo žurnalistam z politiskim pozadkom w Sakskej su w běhu lěta 2025 pola Zwjazkoweho kriminalneho zarjada přizjewili. Sakska je z tym w cyłoněmskim přirunanju na druhim městnje. Jenož w Berlinje bě wjace padow, dohromady 406. Informaciju je zwjazkowe knježerstwo na małe naprašowanje frakcije Lěwicy podało.
Planuja dobywanje litiuma
Při camprowanju najrjeńše kostimy mytowali
Mułkecy (JoS/SN). Nic jenož na maskowym balu w Kulowje a na póstnicach žonow w Njebjelčicach najrjeńše kostimy mytuja. W Mułkecach činja to tež při camprowanju.
Minjenu sobotu je tamniši wjesny klub na tónle póstniski wjeršk we wsy přeprosył. Něhdźe 30 dorosćenych a 15 dźěći bě wot ranja po wsy po puću, zo bychu zymu wuhnali. Byrnjež z tym wuspěch njeměli, je jim camprowanje přiwšěm wjele wjesela wobradźało. Zwjetša wobydlerjo na statokach pisanu cwólbu hižo wočakowachu. Mała skupina Rakečanskich dujerjow jich přewodźeše a na jednotliwych dworach k rejce zapiska, jako dźak za přewostajene pjenjezy, jeja, a dalše dariki.
Při wječornej zabawje mytowachu skupinku młodostnych. Z pomocu žerdźow a wulkich klankow běchu sej woni njewšědny kostim spaslili. To njeje jim jenož myto, ale tež wjele připóznaća wjesnjanow wunjesło.
Tež lětsa zhromadnje štomiki spalili
Wonjaty swět zelow zeznać
Stróža. Za dźěći a młodostnych w starobje 6 do 16 lět maja zamołwići biosferoweho rezerwata Hornja Łužica zajimawy prózdninski poskitk. W Domje tysac hatow w Stróži chce jim zelowa pedagogowka Anja Ludwig 13. februara wonjaty swět zelow a płodow předstajić. W dźěłarničce móža sej wobdźělnicy po swojim słodźe wosobinski čaj změšeć a zhonja připódla tójšto wo wužitnych wuskutkach najwšelakorišich rostlin a płodow. Popłatk za wobdźělenje wučinja 4,50 eurow. Organizatorojo proša wo přizjewjenje pod čo. 035932-3650 abo z mejlku na: .
Póstnicy w bibliotece
Wostanje z jězorom zwjazany
Wjelelětny wotnajer stanowanišća při Slěbornym jězoru so rozžohnuje
Bjedrichecy (AK/SN). Stanowanišćo při Slěbornym jězoru pola Bjedrichec změje wot apryla noweho wotnajerja. To budźe firma Stefana Menzela a Ringa Kloßa z Wysokeje pola Łaza. Tole je Łazowska gmejnska rada na zašłym posedźenju wobzamknyła. „Dyrbju tónle rozsud akceptować“, praji Falk Nowotnick. Wón je stanowanišćo wot 2011 wotnajał a so tež na nowym wupisanju wobdźělił. Gmejna pak je so přećiwo njemu rozsudźiła. Z płakacym wóčkom drje, ale bjez hněwa 56lětny tónle nadawk nětko woteda.
Worklečenjo přetwar šule podpěruja
Worklecy (SN/jp). Hižo znazdala widźiš, zo so we Worklečanskej šuli twari. Na dworje steji kran, kotryž mjez druhim za zatwarjenje lifta trjebaja. „Hinak hač su mnohe medije rozprawjeli, njepřetwarimy šulu za dohromady 3,4 miliony eurow jenož wotpowědujo němskim předpisam wohnjoškita, ale saněrujemy ju dospołnje a zaručimy tu bjezbarjernosć“, praji wjesnjanosta Clemens Poldrack (njestronjan), kotryž projekt minjeny pjatk našemu wječornikej předstaji. „Njebychu-li nas Worklečenjo spochi tak podpěrowali, njebychmy z přetwarom dawno tak daloko byli“, rozprawja wón. Tak su na přikład hižo při wurumowanju šule do zahajenja twarskich dźěłow mócnje sobu pomhali.“
