W starowni wjeselo wobradźili
Njebjelčicy (AKr/SN). Póstnicy žonow su njedawno zaso tójšto norow zbliska a zdaloka do Njebjelčic přiwabili. Pod hesłom „Wječor holcow“ su sej čłonki Serbskopazličanskeho karnewaloweho towarstwa pisany program wumyslili. Tak so někotre žony na swojich mužow wupěrachu a skoržachu, što jich lubušcy w šmjatkach wšědneho dnja wšitko prawje nječinja. Skónčnje pak so jim jandźel zjewi a do swědomja rěčeše, zo su ze swojimi mužemi tola derje wutrjechili. Štyri wudowy (Diana Hanušowa, Lilo Bulankowa, Janina Mikławškowa a Antje Kovaczowa) w žortnym spěwje zjimachu, kak su swojich muži wotbyli. W běhu wječora je amtěrowacy princowski por najrjeńše kostimy mytował.
Wobhrodźenje w stadionje zaručene
Běła Woda (AK/SN). Wo financowanju noweho fleksibelneho wobhrodźenja Běłowodźanskeje lodoweje areny stej sej město Běła Woda a tamniši lodosportowy klub EHC přezjednej. Na wurjadnym posedźenju měšćanskeje rady su radźićeljo zrěčenju z EHC přihłosowali. Po nim płaći wobhrodźenje dohromady 405 000 eurow. Z toho je hižo 181 000 eurow w měšćanskim etaće zaplanowanych. Za tamne 224 000 eurow chcedźa so wo połojčne spěchowanje prócować. Połojcu tuteje sumy, 112 000 eurow, chcetej sej město a EHC dźělić, potajkim płaći kóžda strona 66 000 eurow. Financne zrěčenje rjaduje, zo EHC swój podźěl hišće raz dźěli a 33 000 eurow hač do kónca septembra zapłaći, zbytk wotpłaća hač do lěta 2030 z 6 500 eurami wob lěto.
Pisany spektakl ludźi zwjazał
319. sezona Kulowskeho karnewala je róžowu póndźelu wjeršk docpěła
Kulow (SN/MG). Tradicionelny wjeršk Kulowskich póstnic je wulki pisany přećah róžowu póndźelu. Tež lětsa běchu młodźinske kluby z wokoliny města za tutu paradu zaso kreatiwne wozy natwarili. Nimo tutych ćehnjechu kostiměrowane skupiny žonow po póstnisce wupyšenych hasach města. Dypkownje w 13.30 hodź poda so ćah noricow a norow na puć, kotryž wjedźeše jich po znatej čarje po měsće. Moto bě lětsa „Swět je pisany – Wšitko so wjerći!“. Motu wotpowědujo běchu cyłki swoje wozy a kostimy wuhotowali. Tysacy přihladowarjow dachu sej spektakl rady lubić a swjećachu měrliwje a wjesele sobu. Chwalili su sej wopytowarjo wosebje prócu, z kotrejž žony a wjesne cyłki kóžde lěto znowa kreatiwne ideje na technisce naročne wašnje zwoprawdźeja. Po přećahu hejsowachu noricy a norojo hišće hač do nocy w přewšo wušiknje wuhotowanych barach.Druhi rěčny semester zahajili
Kónc měrca dalše kroki jasne
„Pad Monika“ sudnistwa mjeztym hižo nimale tři lěta zaběra. Za financielnu situaciju modoweho labela LABA bywa tale zwada poněčim strašna, zwěsća mějićela předewzaća.
Zhorjelc (SN/MG). Prawniska zwada wokoło T-shirta modoweho labela LABA, kotraž je mnohim jako „pad Monika“ znata, pokročuje. Po tym zo bě krajne sudnistwo w Berlinje 24. januara rozsudźiło, zo smě wobsedźer labela Gerhard Zschau T-shirt dale předawać, so nětko dale wadźa. Na T-shirće je linolorězba Hanki Krawcec wotćišćana. Twórba z titulom „Monika“ zwobraznja młodu serbsku holcu. Tuta młoda holca, kotraž dźensa hižo młoda njeje, znapřećiwja nětko wusudej z Berlina.
Něhdźe 12 000 přihladowarjow je sej wčera, róžowu póndźelu, do ...
Krótkopowěsće (04.03.25)
Digitalne wodźenje po jastwje
Budyšin. Wopomnišćo Budyšin poskića wopytowarjam mjeztym nimo wosobinskich tež digitalne wodźenja. Ze šmóratkom abo tabletom hodźitej so trajnej wustajeńcy bywšeho jastwa za čas nacionalsocializma resp. NDR bjez instalacije přidatneje software wotkryć. Dopomnjenki něhdyšeje jateje „Budyšina II“ Siggi Grünewald wirtuelne wodźenje wudospołnjeja.
Pruwowanje dale wužadowace
Drježdźany. Dwaj wot pjeć jězbnych šulerjow njejstaj loni w Sakskej praktiske pruwowanje jězbneje dowolnosće wobstałoj. Tohorunja njeje 44 procentow šulerjow teoretiske pruwowanje zmištrowało. Tole wuchadźa z datow techniskeje pruwowanskeje organizacije (TÜV). Kwoty su na samsnym niwowje kaž lěto do toho. Přirunujo z tamnymi zwjazkowymi krajemi su ličby w Sakskej přerězne.
Hač do jutřišeho jejka zapodać
Mali camprowarjo w Delanach
Tropy so nam bliža
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (52)
W zašłym lěće rozprawjachu medije přeco časćišo wo infekcijach west-Nil-wirusa, wosebje tež we wuchodnej Němskej. Njeschorichu pak jenož konje, ale tež w přiběracej měrje ludźo.
West-Nil je typiska coonosowa chorosć, kotraž so wot natyknjeneho zwěrjata na čłowjeka přenjese. Ptaki z tropiskich kónčin su ju do Europy zanjesli. Prěni króć wudyri tu west-Nil před sydom lětami pola konjow a ptakow.
West-Nil-wirus tči w schorjenych ptakach. Domjaca šmica přija wirus přez krejcycanje chorych ptakow a móže wirus na konje a čłowjeka přenjesć.
Poprawom staj kóń a čłowjek wopačnej hosćićelej (Fehlwirt) za wirus. Tola hdys a hdys pokazuja so pola konjow symptomy kaž třepotanje stawow, wiće z hłowu, pohłušenosć (Benommenheit) abo zlemjenja. Eksistuje šćěpiwo za konje a radźi so nuznje, tute tež nałožować.
W tunlu połčas twarskich dźěłow
Zhorjelc (SN/MWj). Po tym zo je modernizowanje sewjerneje roły tunla pod Limasom wotzamknjene, poćahnu twarscy dźěłaćerjo 6. měrca wječor do južneje roły. Tole zdźěli Awtodróhowa tzwr minjeny pjatk, jako wuslědki dotalnych dźěłow zjawnosći předstajichu. Po wšěm zdaću wostanje južna roła nětko hač do nowembra 2025 za wobchad dospołnje zawrjena. Awta móža potom jenož do wobeju směrow w sewjernej role jězdźić.
Kaž předewzaće dale zdźěli, wostanje awtodróha A 4 pod Limasom wot jutřišeho ranja 8 hodź. hač do 6. měrca 22 hodź. dospołnje zawrjena. W tym času změnja techniske připrawy tak, zo přepołoža wobchad z južneje do sewjerneje roły. Runočasnje hišće raz wšu zašłe měsacy instalowanu nowu techniku dokładnje přepruwuja, zo by wot 6. měrca wječor porjadnje fungowała. Mjez druhim su nowe kabiny za nuzowe telefonaty připrawili, nowe LED-wobswětlenje zatwarili a wótřerěčaki wuměnili. Sćěny tunla dóstachu nowu swětłu barbu. Dale maja w sewjernej role tunla nětko wjace sensorow za spóznawanje wohenjow a wjace widejoweje techniki za kontrolu wobchada.
