Pytaja kreatiwne projekty za wobydlerski etat
Budyšin (SN/MWj). Wobydlerjo sprjewineho města maja nětko zaso móžnosć z mjeńšimi předewzaćemi swoje město porjeńšić. Tole zmóžnja wobydlerski etat, kiž kóždolětnje pjenjezy přewostaji, zo móhli so mjeńše naprawy zwoprawdźić. W tymle lěće steji dohromady 20 000 eurow k dispoziciji. Budyski wyši měšćanosta Karsten Vogt (CDU) so na prawje wjele próstwow wjeseli. Kaž wón w nowinskim wozjewjenju zdźěli, skića 20 000 eurow tójšto kreatiwnych móžnosćow we wobłuku wobydlerskeho etata. „Hižo małe ideje móža wulke wuskutki měć a zhromadnosć wobydlerjow w měsće zesylnić.“
Zo bychu w lěće 2025 dosć časa za zwoprawdźenje jednotliwych projektow měli, měli wobydlerjow swoje namjety hač do 31. januara zapodać. Na internetnej stronje pod nadeńdu zajimcy wuměnjenja za zapodaće próstwow a tež wotpowědny formular.
Radźićeljo wuradźuja
Pančicy-Kukow. Přichodna zjawna zhromadźizna zarjadniskeho zwjazka Při Klóšterskej wodźe wotměje so jutře, 14. januara, w 19 hodź. w sydarni zarjadniskeho zwjazka w Pančicach-Kukowje. Na dnjowym porjedźe stejitej mjez druhim hospodarski plan 2025 a přistup k zaměrowemu zwjazkej Komunalne předźěłanje informacijow Sakska.
Přihotuja wustajeńcu
Radwor. Spěchowanski kruh za serbsku ludowu kulturu a Dwórnišćo inkluzije Radwor přihotujetej tuchwilu wuměłsku wustajeńcu. Pod hesłom „Dwórnišćo pisanosće“ wotewru pjatk, 17. januara, w 17 hodź. přehladku na něhdyšim dwórnišću w Radworju. Wot 16 hodź. su zajimcy na kofej přeprošeni. Po tym je składnosć sej ekspoziciju wobhladać. Twórby dorostowych kaž tež nazhonitych lajskich wuměłcow z cyłeje Łužicy pokazuja widy na Radwor, kiž su w lěću 2023 na kónctydźenskej dźěłarničce pod nawodom Maje Nagloweje we wsy nastali.
Zetkaja so na nowym městnje
Dotwar gratownje so dlije
Dnowneje platy dla molerjo z dźěłom pokročować njemóža
Dźěwin (AK/SN). Dotwar noweje wohnjowoborneje gratownje w Brězowce w Dźěwinskej gmejnje so wo něšto tydźenjow dlije. Prěni předwidźany termin kónc lěta 2024 njejsu dodźeržeć móhli. Tole zdźěli twarski nawoda Slepjanskeho zarjadniskeho zjednoćenstwa Steffen Seidlich na zašłym posedźenju Dźěwinskeje gmejnskeje rady.
„Někotre dźěła njejsu hišće zakónčene“, Seidlich rjekny a naliči nutřkowne wuhotowanje, kładźenje kachlicow, elektriku a molerske dźěła. Problemy maja z lěwej dnownej platu z betona. Wona jenož pomału schnyje a je hišće přewłóžna. Tohodla molerjo w tym dźělu twarjenja hišće dźěłać njemóža. Zhromadnje z planowanskim běrowom a gmejnu chce twarski nawoda rozrisanje namakać. Tež wonkowny areal hišće dočinjeny njeje. Kromy, terasa a přechod k Dwórnišćowej dróze drje su hotowe, někotre městna pak maja so hišće wuplestrować. „Nadźijamy so, zo najwjace dźěłow hač do kónca januara wotzamknjemy. Wosebje problem włóžneje dnowneje platy dyrbimy rozrisać“, tak Seidlich.
Dwójnikaj předstajitaj dwójnikow
Dorostowej talentaj Anton a Richard Fuchs z Łutow předstajitaj w filmje jimacu stawiznu dwójnikow Johannesa a Philippa Mickenberger, kotrajž staj přez swój widejowy kanal znataj.
Wojerecy (SiR/SN). Druhdy móžeš dwójnikow Antona a Richarda Fuchsa ryzy optisce derje rozeznawać. Tuchwilu pak je to najskerje trochu ćešo. To móhło na tym zaležeć, zo staj bratraj z Łutow w zašłosći husćišo hromadźe byłoj a so intensiwnišo wudospołnjałoj. Powołansce bratraj po rozdźělnymaj pućomaj kročitaj. Anton je kulturny wědomostnik a dźěła w Krabatowym młynje jako kulturny manager. Richard je wukubłany musicalowy dźiwadźelnik a spěwny pedagoga. Mnozy znaja jeju z Čornochołmčanskich Krabatowych swjedźenskich hrow, kotrež so nětko jako Krabatowa saga dale wjedu.
W połnje wobsadźenej Róžeńčanskej putniskej cyrkwi je so wčera ...
Dom Měrćina Nowaka-Njechorńskeho zachować a dale wuwiwać
Domowinska župa „Jan Arnošt Smoler“ Budyšin zjednoća 12 Domowinskich skupin z cyłkownje 438 čłonami. Dwaj serbskej chóraj staj tu doma a dwaj rěčnej motiwatoraj projekta ZARI tu skutkujetaj.
Budyšin (SN/MiP). Županka Leńka Thomasowa zhladuje pozitiwnje na lońše lěto. „Nanajwjetši dźěl našich Domowinskich skupin prawidłownje a aktiwnje dźěła“, wona praji. W Budyskej župje jara aktiwnej spěwnej cyłkaj staj Chór Budyšin a Radworski chór Meja, wona podšmórnje. Nazymske koncerty w Malešecach, Bukecach, Radworju a Budyšinje su tež loni zaso wjele dźakownych wopytowarjow přićahnyli a zahorili. Z tójšto serbskorěčnymi poskitkami běštaj tež rěčnej motiwatoraj Raphaela Wićazowa a Lucian Kaulfürst w župje jara aktiwnaj.
Krótkopowěsće (13.01.25)
Wo čěskim towarstwje zhonili
Chrósćicy. Předsyda Towarstwa přećelow Serbow Lukáš Novosad je zawčerawšim w Chróšćanskej putniskej hospodźe přednošował. Něhdźe 35 zajimcow zhoni wo serbsko-čěskich stykach, stawiznach a angažemenće towarstwa. Nawoda skupiny Lidová muzika z Chrástu Vojtěch Kouba je wječor hudźbnje wobrubił.
Šěsć mortwych wohenja dla
Most. W nocy wot soboty na njedźelu je w hosćencu w čěskim Mosće blisko němskeje hranicy šěsć ludźi wo žiwjenje přišło. Wosom dalšich so ćežko zrani. Swědkojo rozprawjeja, zo je w škleńčanej wonkownej terasy hosćenca płunowa bleša mobilneho tepjenja rozbuchnyła a jara spěšnje wulki woheń zawinowała. Čěski nutřkowny minister Vit Rakušan je městno njezboža wopytał.
Budyske narěče pokročuja
Kak dale z domom?
Njechorń. Domowinska župa „Jan Arnošt Smoler“ přeprošuje wšitkich zajimcow dźensa, pjatk, w 19 hodź. do Domu Měrćina Nowaka-Njechorńskeho na rozmołwu. W srjedźišću ma prašenje stać, kak ma z domom dale hić.
W Delanach do šule pohladać
Ralbicy. Serbska wyša šula Ralbicy přewjedźe wutoru, 14. januara, dźeń wotewrjenych duri. Dopołdnja wopytaja šulerjo wokolnych šulow kubłanišćo. Wuknjacy z wučerkami a wučerjemi jim swoju šulu předstajia, jim wopyt wučby zmóžnja a wo cyłodnjowskich poskitkach informuja. Wot 17 do 19 hodź. su wšitcy zajimcy přeprošeni sej šulu wobhladać. Za staršich přichodneho 5. lětnika zarjaduja we 18 hodź. wosebite informaciske zarjadowanje na 1. poschodźe.
... a tež w sprjewinym měsće
Budyšin. Hižo dźeń do Ralbičanskeje wyšeje šule přewjedźe Serbska wyša šula Budyšin dźeń wotewrjenych duri, potajkim póndźelu, 13. januara. Wot 15.30 do 18 hodź. móža zajimcy kubłanišćo wopytać, so z wučerkami a wučerjemi rozmołwjeć a so wo šulskim žiwjenju na Friedricha Listowej dróze 8 informować.
Dobyćerjo hodowneje křižowki
Lěto wužadace a napinace było
W měrcu chcedźa nowu pěstowarnju w Ralbicach oficialnje přepodać
Róžant (JK/SN). Na poslednim lońšim posedźenju gmejnskeje rady Ralbicy-Róžant bilancowaše wjesnjanosta Hubertus Ryćer (njestronjan) skutkowanje gmejny w lěće 2024. Zahajiwši swoju rozprawu wšak rjekny, zo přewobšěrna njebudźe. Wuspěchi gmejna zatajeć njetrjeba, byrnjež so wšitko tak poradźiło njeje, kaž běchu sej to w Delanach přeli.
Hłowny nadawk, nowu pěstowarnju w Ralbicach dotwarić, hač do kónca lěta přewahowaše. Twarske dźěła po planje postupowachu, jeničce na polu financow bě gmejna přewšo wužadana. Wjele dźěła a politiskeje podpěry bě trěbne, zo bychu pjenjezydawarjo tež přidatne wudawki we wobjimje nimale 1,5 milionow eurow z 90 procentami spěchowali. Tutón měsac přewjedu w pěstowarni probowy přechod. Zdobom wonkowny teren dotwarja, tak zo móžeja kubłanišćo w měrcu oficialnje a swjatočnje přepodać.
