Spěchowanski šek přepodali
Bydyšin/Biskopicy (SN). Němska telewizijna loterija je minjeny pjatk Budyskemu wokrjesnemu zwjazkej Ludoweje solidarity spěchowanski šek w hódnoće 29 000 eurow za wuhotowanje jeho bydlenskeje zhromadnosće za seniorow z ambulantnym hladanjom w Biskopicach přepodała. To je šwarna podpěra za naprawu, za kotruž su zamołwići cyłkownje 58 000 eurow kalkulowali.
„Dźakowano pjenježnej podpěrje móžemy nětko rumnosće w tuchwilu njewužiwanym, prózdnym twarjenju w Biskopicach tak zarjadować a přetwarić, zo změjetej tam nimo bydlenskeje zhromadnosće tež socialna stacija a naš wobchodniski běrow swoje městno“, praji jednaćelka Budyskeje Ludoweje solidarity Romy Pietsch. Wona doda: „Chcemy za našich seniorow přijomny bydlenski poskitk stworić, w kotrymž so tak prawje doma čuja, w kotrymž ma kóždy jednotliwy swój wosobinski rum, runje tak pak tež móžnosće za zhromadne žiwjenje ze sobuwobydlerjemi.“
Po swojim wukubłanju na blidarja je Hawštyn Smoła dlěje hač 15 ...
Krótkopowěsće (17.03.25)
Drews kritizuje Vogta
Budyšin. Budyski wyši měšćanosta Karsten Vogt (CDU) je město w zjawnej wotmołwje na naprašowanje wobydlerja „nadregionalny hotspot prawicarskeje sceny“ mjenował a sej wjac akcije „srjedźišća towaršnosće“ kaž demonstraciju spočatk 2024 přał. Měšćanski radźićel a šef firmy Hentschke Bau, Jörg Drews, jemu na to wumjetowaše, zo hinak myslacych potłóčuje. Wón rjekny, zo bě na demonstraciji „namócna a teroristiska antifa“ prezentna.
Wědomostnica z Łužicy dobyła
Choćebuz. Dr. Charlotte Gerling z Braniborskeje Techniskeje uniwersity Choćebuz-Zły Komorow je jedyn milion eurow dóstała. Z pjenjezami chce wona slědźensku skupinu wutworić. Zhromadnje z teamom chce so wona ze škitom družinow a z ratarstwom w zwisku ze změnu klimy zaběrać. Pjenjezy je wona we wobłuku wubědźowanja „Postdoc Network Braniborska“ dobyła.
Insolwency wospjet přiběraja
Poskićujetaj rěčnu hodźinu
Kamjenc. Zapósłanča Sakskeho krajneho sejma Elaine Jenčec přewjedźe zhromadnje ze zastupjerjom frakcije CDU Kamjenskeje měšćanskeje rady Frankom Küsterom swoju přichodnu wobydlersku rěčnu hodźinu we wólbnym wokrjesu. Wona wotměje so póndźelu, 17. měrca. W času wot 17 do 19 hodź. změja wobydlerjo móžnosć, w Kamjenskim wólbnym běrowje na Zapadnej čo. 4 swoje naležnosće přednjesć. Přizjewić móža so zajimcy pod telefonowym čisłom 03578 305383 abo e-mailnje pod . Běrow je za naležnosće wobydlerjow wot póndźele hač do pjatka stajnje wot 8 do 14 hodź. docpějomny.
Dr. Kemlein w srjedźišću
Budyšin. Přichodny koncert w awli Budyskeho Schilleroweho gymnazija jutře, sobotu, w 17 hodź. wěnowuje so dr. Magdalenje Kemlein (1930–2024). Wot 1958 hač do 1997 je wona njeličomnych šulerjow Budyskeje wokrjesneje hudźbneje šule w teoriji a praksy wuwučowała. Koncert wuhotuja chóry hudźbneje šule kaž tež solisća a instrumentalisća, hódnoćo tak skutkowanje njewšědneje wosobiny. Zastup je darmotny.
Wo Ochranowskich tekstach
Sportowy dom dale ponowja
Njebjelčanska gmejna z energijoweho drustwa wustupiła
Njebjelčicy (JK/SN). Naćisk za lětuši hospodarski plan po wuprajenju Njebjelčanskeho wjesnjanosty Andréja Bulanka (njestronjan) srjedu na posedźenju gmejnskeje rady tuchwilu w Budyskim krajnoradnym zarjedźe pruwuja. Zaměr je zwěsćić, kak móže gmejna dale swoje nadawki a winowatosće spjelnić, hdyž je na poziciji likwidnych srědkow minus 800 000 eurow zapisany. Tutón deficit so po wuprajenju Bulanka w přichodnych lětach hišće powjetši. Najebać to pak ma gmejna swoje nadawki spjelnić, a to tež zaměrnje čini. Najwažniši nadawk drje je lutować, ale z k dispoziciji stejacymi srědkami hodźi so to a tamne zwoprawdźić. Po pruwowanju krajnoradneho zarjada chce so gmejnska rada na klawsurnym posedźenju hišće raz z hospodarskim planom a z potom předležacymi pokiwami wokrjesa zaběrać.
Wulke plany za Čorny Halštrow
Hózk (AK/SN). Krajny zarjad rěčnych zawěrow Sakskeje (LTV) chce Čorny Halštrow w Hózku renaturować. Tole zdźěli Kulowski měšćanosta Markus Posch (CDU) na zašłym posedźenju měšćanskeje rady. Při tym jedna so wo 1,7 kilometrow dołhi wotrězk wot Koćinskeje hatneje wodočisćernje hač k mostej nad wokrjesnej dróhu w Hózku. Projekt wopřijima wjacore jednotliwe naprawy.
Kedźbliwej wobydlerce so dźakowali
Radwor (BB/SN). Jenož derje, zo njeje so Inga Lischka loni 17. měrca k připołdnišemu sparej lehnyła. Město toho jědźeše wona tehdy z kolesom po wokolinje. A jako bě runje we Wjeselu, w małej wsy na kromje Radworskeje gmejny, stupaše z dwora při puću dźiwny kur. „Pojědu dale, abo póńdu tola raz pohladać?“ Hakle po třećim abo štwórtym energiskim klinkanju a kłapanju wo durje jej něchtó wočini. Wobydlerjo běchu sej po njedźelnišim wobjedźe kruće wusnyli ... – Zawčerawšim na zeńdźenju Radworskeje gmejnskeje rady dósta Inga Lischka wulki prezent a zjawny dźak. „Běchmy tehdy z 80 kameradami z cyłeje wokoliny na městnje. Hdyž pak njeby knjeni Lischka tak energisce reagowała, by žiwjenje potrjecheneje swójby chutnje wohrožene było“, je sej gmejnski radźićel a wohnjowy wobornik Thomas Scheffel tež lěto po tym hišće wěsty.
We wobłuku Radworskeho wosadneho misiona mějachu zmandźeleni wčera ...
Krótkopowěsće (14.03.25)
Mjeztym 32. jutrowne wiki
Budyšin. Spěchowanski kruh za serbsku ludowu kulturu jutře a zajutřišim (10–18 hodź.) w Budyskim Serbskim domje mjeztym 32. serbske jutrowne wiki zarjaduje. Nimo debjerjow jutrownych jejkow wustajeja tam Birgit Patokowa wudźěłki ze škleńcy a Weronika Suchowa a Adelheid Herrmanowa tykawčki. Andrea Pawlikowa na temu „Purpurčerwjene a pisane“ wo serbskich jutrownych jejkach přednošuje.
Čara je dale zawrjena
Budyšin. Železniska čara mjez Rychbachom, Lubijom a Budyšinom wostanje dlěje zawrjena hač bě planowane. Přičina toho su dlijace so twarske dźěła, zdźěla Krajna železnica. Poprawom mějachu tam dźensa připołdnju zaso ćahi jězdźić. Sobujěducy měli so informować, kotre linije móža wužiwać. Mjez Budyšinom a Lubijom su busy zasadźene.
Testuja ćiche hodźiny
