Grodk (JoS/SN). Towarstwo MC Grodk je kaž kóžde lěto w lěću minjeny kónc tydźenja hižo 36. raz na zetkanje oldtimerow z wikami za narunanske dźěle přeprosyło. Stawizny zarjadowanja sahaja wróćo hač do časa NDR, hdźež běše wone tehdy hižo chětro popularne a woblu­bowane, nic jenož mjez wopytowarjemi, ale tež mjez wobdźělnikami. Prawidłownje přijědu woni z cyłeje Němskeje a w zašłych lětach tež z Pólskeje. Měrna a swójbna atmosfera njeje za wopytarjow jenički pozitiwny dypk. Tež přijomna městnosć direktnje při braniborsko-sakskej hranicy, hdźež bě jónu wuhlowa milinarnja Dubrawa (Trattendorf) stała, je dalša přičina za wopyt.