Budyšin (SN/MWj). Hižo do lońšich Budyskich Wjacławskich wikow je město Budyšin připowědźiło, zo chce najstarše hodowne wiki Němskeje wobšěrnje posudźować. Za to přepodachu towaršnosći za přeslědźenje wikow a wotbytka (GMA) nadawk, wšitke wobłuki Budyskich hodownych wikow přepytować. Mjez druhim mějachu so wotmołwy na prašenja namakać, hač su poskitki načasne, što móža wikowarjo za přijomniše wiki činić a hač wabjenske naprawy města wšitke wotpohladane cilowe skupiny docpěwaja.

Zajimawe přednoški na konwenće pčołarjow w Budyšinku

Budyšink (Ł/SN). „Hadam Bohuchwał Šěrach, kotryž je tule w Budyšinku 25 lět jako serbski farar spomóžnje skutkował, je nestor moderneho pčołarstwa, wusahowacy přirodospytnik a awtor wěcywustojnych knihow. Tute su so do wjacorych rěčow přełožili a wjele diskusije zbudźili.“ Takle je wjelelětny iniciator wopomnjenskich zarjadowanjow na česć Hadama Bohuchwała Šěracha, Günter Sodan, zańdźenu sobotu na druhi konwent do Budyšinka witał. Tež županka Budyskeje župy „Jan Arnošt Smoler“ Leńka Thomasowa je hosći serbsce a němsce postrowiła kaž tež na Šěrachowy wuznam za nas Serbow pokazała.

Ralbicy (JaW/SN). Cyrkwinski chór Lilija Ralbičanskeje wosady je minjeny kónc tydźenja w čěskich Hejnicach zwučowanske lěhwo přewjedł. Pod nawodom dirigentki Bernadet Šołćineje su sej spěwarki a spěwarjo w tamnišim putniskim klóštrje zakłady wjacorych nowych pěsnjow přiswojili. Mjez druhim su twórbu „We Łazku we lěsku“ z pjera Jana Wornarja na hudźbu Achima Dučmana nazwučowali. W intensiwnych probach, dźělene po muskich a žónskich hłosach, su tež nowu cyrkwinsku twórbu „Popule meus“ – serbsce: „Ludo mój“ zwučowali.

Skrućili su tohorunja pasion po swjatym Mateju, kotryž je Bernadet Šołćina spisała. Jón chcedźa lětsa w dojutrownym času w Ralbičanskej cyrkwi předstajić. Runje tak su so nadrobnje twórbje „Ralbicka misa“ z pjera wjelelětneho přećela chóra njeboh Petra Palki a fararja Michała Nawki wěnowali.