Biskopicy. Dyrdomdejski camp w Němskich Pazlicach njeje hišće wukniho­wany. Wot 8. do 14. julija wotměje Syć za dźěło z dźěćimi a młodostnymi ­(KiJu) přirodny camp za dźesać- do 16lětnych. Wot 16. do 20. julija su potom šěsć- do dźewjećlětni na camp za dźěći pře­pro­šeni. Zajimcy njech přizjewja so te­lefoni­sce pod čisłom 03594 07460 abo w interneće pod . Tam nańdu tež dalše informacije.

Mjećenska mašina so paliła

Wojerecy. Srjedu popołdnju dóńdźe wokoło 14 hodź. k alarmowanju Wojerowskeje powołanskeje wohnjoweje wobory a dalšich dobrowólnych wohnjowych woborow. Zasadźenske mocy na B 97 mjez Wojerecami a Njedźichowom buchu alarmowane. Na městnje móžachu we wobłuku twarnišća na B 97 palace so mjećadło zwěsćić. Šofer je so do přijězda wohnjoweje wobory z jězdźidła wuswobodźił a njebu zranjeny. Z kotreje přičiny bě woheń wudyrił, njeje dotal jasne.

Desorientowany na awtodróze

Wóspork. Patrulja awtodróhoweje policije je póndźelu rano na A 4 njedaloko Wósporka na kromje jězdneje Opel Movana wuhladała. Motor běžeše, 26lětny pólski šofer bě sej wusnył. Po klepanju za wokno so wón stróži a spytaše šaltować. Spěšnotest na drogi bě pozitiwny.

Tež w Sakskej płaća zakonje a krute postajenja

Budyšin (jp/SN). Na čo maja šulerjo při prózdninskim dźěle w Sakskej dźiwać a što su jich prawa? Wuspać młodostni njemóža. Dźěłodawar smě šulerjow a šulerki wot rano w šesćich hač do 22 hodź. zasadźić, w starobje wot 13 do 14 lět pak jenož wot 8 do 18 hodź. Młodostni wot 15 do 17 lět smědźa za prózdninski čas jeničce štyri tydźenje wob lěto dźěłać, na dźeń pak wosom hodźinow, štož wučinja na tydźeń potom w cyłku 40 hodźinow. Dźěłowy čas ma mjez rano w šesćich a wječor w 20 hodź. być.

We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (8)

Stawizny Domu Zejlerja a Smolerja we Łazu sahaja wróćo hač do spočatka 17. lětstotka. Hižo w lěće 1619 je tam knježk von Löwenstein dał šulu z jednej rjadowniskej stwu, w kotrejž jedyn wučer wuwučowaše, natwarić. Ani lětdźesatkaj pozdźišo je woheń wulki dźěl Łaza zničił, tak tež tykowane šulske twarjenje. Šula bu na samsnym městnje zaso natwarjena. 1763 dyri do njeje błysk a šula so znowa wotpali. W nowej natwarjenej šuli bu 1782 druhi wučer jako pomocnik přistajeny. 1821 přińdźe Korla Jan Smoler, syn tkalca a šołty w Złyčinje a nan Jana Arnošta Smolerja jako wučer do Łaza. Wón bě sobuzałožer Maćicy Serbskeje a spěwaše na prěnich spěwanskich swjedźenjach w lětach 1845 do 1848 sobu. Kruće spřećeleny bě z Handrijom Zejlerjom, kotryž bě wot 1835 hač do 1872 z fararjom we Łazu.