Rakecy (SN/MWj). Techniski wuběrk Budyskeho wokrjesneho sejmika je nětko zelenu swěcu za dróhotwarskej naprawje dał. Na kromje Rakec wutwarja wot septembra 2025 hač do nowembra 2026 na dołhosći 600 metrow puć z Rakec do směra přemysłoweho parka. Při tym tež křižowanišćo Trupinskeje a Jitkowskeje dróhi ponowja a znowa wuhotuja. Dale połoža nowy wopłóčkowy kanal a saněruja kolesowansku šćežku, kotruž w tym zwisku podlěša. Busowe zastanišćo tohorunja ponowja. Naprawa płaći cyłkownje něhdźe 2,2 milionaj eurow. Tři štwórćiny z toho zapłaći Swobodny stat Sakska, wokrjes přida 550 000 eurow. Podźěl Rakečanskeje gmejny wučinja 50 000 eurow.