Płaćizny loni stupali

Kamjenc. Płaćizny za přetrjebarjow w Sakskej su loni wo 2,9 procentow stupali, zdźěli wčera krajny statistiski zarjad w Kamjencu. Płaćizny za posłužby a hladanje stupachu přerěznje wo 9,7 procentow a w ambulantnych hladanišćach wo dźewjeć procentow. Wotnajerjo bydlenjow dyrbjachu 2,4 procenty wjace po­druže płaćić hač lěto do toho. Tež płaći­zny za energiju su přerěznje wo 1,7 procentow přiběrali. Ćěriwo pak bě loni tuńše hač 2023.

Twornja wažne stejnišćo

Choćebuz. W Choćebuskej nowej tworni ICE ma so lětsa dwójce telko ćahow hladać a reparować kaž loni. Tohorunja ma so stejnišćo w měsće cyle na to wu­směrić, zo tam wšitke ćahi typa ICE 4 Němskeje železnicy hladaja. Tole Němska železnica nětko zdźěli. Choćebuska twornja wobsteji jedne lěto. Cyłkownje su tam loni 13 ćahow hladali.

Prezident na rallyeji

Strašne rozestajenje

Wojerecy. Mjez mužomaj w starobje 36 a 40 lět je wutoru na Lipjeckim naměsće we Wojerecach werbalne rozestajenje eskalěrowało. Młódši z wobeju Němcow staršeho z nožom atakowaše a jeho ćežko zrani. Na to tež 40lětny nóž wućahny a do tamneho kłóješe. Tón bu při tym snadnje zranjeny. Po tym zo bě so starši kontrahent k lěkarskemu zastaranju do chorownje podał, policija wo padźe zhoni. Jako chcychu zastojnicy 36lětneho blisko městna njeskutka zajeć, wón jim napřećo chětro agresiwnje wustupowaše. Tež přećiwo trěbnemu lěkarskemu ­zastaranju so wón masiwnje wobaraše. Na to jeho nachwilnje zajachu a na Wojerowski policajski rewěr dowjezechu. Přećiwo woběmaj mužomaj přepytuja nětko strašneho zranjenja ćěła dla. 36lětny změje so nimo toho skřiwdźenja policistow dla zamołwić.

Mały Wjelkow (SN/MWj). Mały Wjelkow je dźensa daloko za mjezami Budyskeho wokrjesa a Swobodneho stata Sakskeje znaty. Tu ma prazwěrjenc swój domicil, Budyski žonop so tu zhotowja a tež Ochranowska wosada měješe tu wotnožku. Ale kajke bě poprawom wuwiće bywšeje gmejny Mały Wjelkow? Za přeslědźenje jeje stawiznow steja Budyskemu archiwnemu zwjazkej nětko přidatnje k wobstejacym podłožkam dalše akty k dispoziciji, kotrež su w lěće 2024 wotkryli a za wužiwanje přihotowali, kaž archiwny zwjazk w nowinskim wozjewjenju zdźěli.

W lěće 1999 bu Mały Wjelkow do Budyšina zagmejnowany. Z tym tež wšitke zarjadniske pisma do přisłušnosće Budyskeho archiwneho zwjazka přeńdźechu. Dalše akty přidružichu so 2023 w zwisku z přerjadowanjom Budyskeho wokrjesneho archiwa. W archiwnym zwjazku maja dźensa cyłkownje 650 zapiskowych jednotkow wo Małym Wjelkowje, kaž z nowinskeje zdźělenki dale wuchadźa. Zajimcy móža w nich internetnje rešeršować abo je w čitanskej žurli čitać. Mjez druhim stej dwaj zwjazkaj chroniki stawiznow Słoneje Boršće přistupnej.

Chrósćicy. Serbsko-čěske styki, serbsko-čěske přećelstwo, wěda wo Serbach w Čěskej – kak je so tole wšo w běhu lět wu­wiwało? A što so na tutym polu aktualnje hiba? Aktiwity Towarstwa přećelow Serbow w Praze (SPL) su mnohostronske –to njeje jenož kultura, ale tež turistika, šulstwo abo konkretna pomoc serbskim přećelam w nuzy. Na to skedźbnja předsyda towarstwa Lukáš Novosad, kotryž so hižo 20 lět za čěsko-serbske zwiski angažuje. Wo tym přednošuje wón sobotu, 11. januara, wot 19.45 hodź, w Chróšćanskej putniskej hospodźe. Najradšo chce z wopytowarjemi do žiweje rozmołwy přińć, na přikład wo něhdyšej ideji, po přikładźe Goethoweho instituta Němskeje sej za serbsku rěč załožić „Brězanowy institut“ Serbow. Abo snano Towarstwo přećelow Serbow po zmysle mjeztym hižo tajki kulturny institut je?

Nimo přednoška a bjesady tež live-hudźba zaklinči. Sobotny wječor wu­hotuje spěwar, hudźbnik a nawoda skupiny Lidová muzika z Chrástu Vojtěch Kouba sobu. Popołdnju pokaza so na samsnym městnje w 16 hodź. serbske dźěćace kino.