Krótkopowěsće (02.12.25)
Na fachowej wuměnje w Berlinje
Berlin. Sobudźěłaćerjo Serbskeje centralneje biblioteki a Serbskeho kulturneho archiwa při Serbskim instituće su tele dny archiw a biblioteku Berlinskeho Židowskeho muzeja wopytali. Zajimowachu so za zběrki, projekty digitalizacije a nazhonjenja z přećahom muzeja před dźesać lětami. Serbska centralna biblioteka a Serbski kulturny archiw matej na Lawski areal přećahnyć, ručež budźe natwarjeny.
Prawicarjo klub nadpadnyli
Choćebuz. Prawicarjo su kónc tydźenja młodźinski klub „Chekov“ w Choćebuzu napadnyli a na sćěnach parole kaž „Cottbus bleibt deutsch“ a hrónčka přećiwo žonam a queernym ludźom zawostajili. Do kluba tež serbscy młodostni rady chodźa. Rěčnica kluba Carolin Andres praji, zo njedadźa so zatrašić. Při akciji wobškodźichu skućićeljo nasćěnowe wobrazy młodostnych, kotrež mnohotnosć symbolizuja.
Zjězd budźi kontrowersu
Zhromadnje spěwać
Budyšin. Zwjazk serbskich spěwarskich towarstwow (ZSST) přeprošuje na decemberske zhromadne spěwanje. Wone wotměje so jutře, wutoru, we 18 hodź. w chórowej rumnosći Serbskeho ludoweho ansambla. Wšitcy zajimcy su wutrobnje witani!
Radźićeljo wuradźuja
Worklecy. Přichodne posedźenje Worklečanskeje gmejnskeje rady wotměje so srjedu, 3. decembra, w 19 hodź. w horće „K wódnemu mužej“. Mjez druhim chcedźa wo planowanju ponowjenja mosta nad Klóšterskej wodu mjez Worklecami a Lejpoldom rozsudźić. Dale steja wustawki wo wotškódnjenju čłonow dobrowólneje wohnjoweje wobory na dnjowym porjedźe.
W hosćencu zaso warja
Do „Klóšterskeje stwički“ w Pančicach-Kukowje nowe žiwjenje zaćahnyło
Pančicy-Kukow (SN/MWj). Po wjacorych lětach přestawki je do „Klóšterskeje stwički“ w klóštrje Marijina hwězda w Pančicach-Kukowje zaso žiwjenje zaćahnyło – nic pak w formje klasiskeho hosćenca, ale jako kantina za wšědny wobjed wotydźenja. Wot dźensnišeho Helery Hančik „Klóštersku stwičku“ wjedźe a w njej ze swojimi přistajenymi wari, wopytowarjow pohosćuje a ludźom wobjed tež domoj dowožuje.
Twórba Jana Hanskeho widźeć
Tepjenje drje budźe dróše
Wojerecy (KD/SN). Zo móhli wobydlerjo Wojerec swoje tepjenje tež přichodnje zapłaćić a zo by wone dale zaručene było, je předewzaće Tilia za komunu tak mjenowane ćopłotne planowanje zdźěłało. Tónle plan su wobydlerjam nětko předstajili. Tam je zapisane, zo chcedźa hač do lěta 2045 za tepjenje jenož hišće wobnowjomne energije wužiwać.
Hač do lěta 2027 milinarnja w Čornej Pumpje nowe město hišće z dalnoćopłotu zastaruje. 46 procentow stareho města tepi tuchwilu ze zemskim płunom. Tele mnóstwo chcedźa hač do lěta 2035 wo połojcu znižić. Hač do 2045 dalnoćopłotnu syć na nakromne kónčiny noweho města kaž tež na stare město sewjernje železniskeje čary rozšěrja.
642. Wjacławske wiki zahajene
Budyšin (CS/SN). Po tym zo běchu předawanišća na Budyskich 642. Wjacławskich wikach hižo pjatk připołdnju wotewrěli, wiki při ćmičkanju tež oficialnje zahajichu. Kral Wjacław zhladowaše na započatki wikowanja w sprjewinym měsće a kak je so wone pozdźišo wuwiło. Wyši měšćanosta Karsten Vogt poda wuhlad na lětuše wiki. Hwězdowy muž na štabrach wulki hodowny štom symbolisce zaswěći.
W tym času so hižo wjele ludźi na Hłownym torhošću tłóčeše a sej prěnju kołbasku a horce wino słodźeć da. Za wyšeho měšćanostu bě to dobre znamjo za to, zo ličba wopytowarjow tež lětsa hranicu 200 000 překroči. Wo hudźbne wobrubjenje starachu so mali spěwarjo kurendy pod nawodom Michaela Vettera.
Kóžde lěto so sobotu do prěnjeho adwenta Chróšćanki a ...
Adwent z wikami na nawsy witali
Krótkopowěsće (01.12.25)
Preuß zastojnstwo nastupił
Kamjenc. Michael Preuß (bjezstronski) wukonja wot dźensnišeho zastojnstwo wyšeho měšćanosty w Kamjencu. Roland Dantz (Swobodni wolerjo) je so po 21 lětach na zasłuženy wuměnk podał. 44lětny Preuß bě dotal twarski decernent w měšćanskim zarjadnistwje. Preuß je wólby w nowembrje z jasnymi 73,4 procentami dobył.
Za hłubši zwisk ze Źarami
Budyšin. Nowy krajny rada pólskeho wokrjesa Żary, Bogdan Kępiński, a jeho naměstnik Wojciech Kasprów staj zašły tydźeń Domowinu wopytałoj. Chcetaj stare styki regiona ze Serbami wožiwić. Předsyda Domowiny Dawid Statnik widźi krótkodobnje móžnosće kulturneje wuměny. Zastupjerjo gmejny Żary přijědu kóžde lěto w aprylu do Chrósćic, zo bychu padnjenych wojakow spominali.
Nimale 18 000 potrjechenych
Kulturna zyma w hospodźe
Chrósćicy. Monika Gerdesowa zarjaduje w swojej putniskej hospodźe w Chrósćicach w přichodnych měsacach zaso tak mjenowanu kulturnu zymu. Zarjadowanja za dźěći a dorosćenych w serbskej a němskej rěči wotměja so wot soboty, 29. nowembra, do soboty, 7. februara, nimale tydźensce. Na prěnim wječoru su wot 18 hodź. dźěći přeprošene na bajku słuchać. W 19.45 hodź. přizamknje so knižne čitanje za dorosćenych pod hesłom „Z Prahi do Palestiny“ z Friedrichom Pollackom a Michałom Nukom. Přehlad wšitkich zarjadowanjow nadeńdu zajimcy internetnje pod .
Porěči wo serbskim molerju
