Spušćomny partner biblioteki
Kamjenc (SN). Zarjadowanja, kotrež Spěchowanske towarstwo Lessingoweje biblioteki w Kamjencu přewjeduje, su stajnje zajimawe, wotměnjawe a pohnuwaja do rozmołwy. Zo by publikum w přichodźe tež ćiche zwuki lěpje zrozumił, je wone njedawno bibliotece 800 eurow dariło, zo by sej nowu zwukowu připrawu kupić a instalować móhła. „Smy technisku móžnosć za najwšelakorišu potrjebu pytali a namakali. Wona tež w posłužowanju překomplikowana njeje“, měni předsyda towarstwa dr. Wolfgang Melzer. Wón je tež jako awtor znaty, kotrehož knihi w polcach biblioteki namakaš.
Wyši měšćanosta města Kamjenca Roland Dantz (Swobodni wolerjo) so jara nad pjenježnej podpěru wjeseli. „Lessingowa biblioteka je wot časa swojeho wotewrjenja na nowym městnje w lěće 2022 nowe rekordy hladajo na ličby wopytowarstwa docpěła. Wona je z tym woprawdźe ‚měšćanske wukładne wokno‘. Na tutym wuwiću ma tež spěchowanske towarstwo ze swojimi mnohimi aktiwitami wulku zasłužbu.“
Krótkopowěsće (07.11.24)
Amplowe knježerstwo na kóncu
Berlin. Amplowe knježerstwo SPD, Zelenych a FDP je zwrěšćiło, po tym zo je zwjazkowy kancler Olaf Scholz (SPD) wčera wječor financneho ministra Christiana Lindnera pušćił. Mjeztym sej předsyda CDU Friedrich Merz žada, zo měł Scholz w zwjazkowym sejmje hnydom prašenje dowěry stajić a nowowólby zmóžnić. Scholz pak chce z tym hač do srjedź januara 2025 čakać. (Hlej 2. str.)
Koalicija CDU a BSW z blida
Drježdźany. Móžna koalicija CDU, SPD a Zwjazka Sahry Wagenknecht (BSW) w Sakskej je z blida. Zastupnicy BSW su sonděrowanja wčera přetorhnyli a připowědźili, zo chcył BSW wotnětka w opoziciji dźěłać. Ministerski prezident Michael Kretschmer (CDU) reagowaše přesłapjeny. Po zakonju dyrbi hač do spočatk februara nowe knježerstwo stać. (Hlej 2. str)
Požadanje wčera wotedali
Policija (06.11.24)
Wopojenaj z awtom po puću
Šiborćicy. Zastojnicy policije su minjenu njedźelu na awtodróze A 4 na směr Drježdźany šofera awta typa VW Golf spodźiwneho jězdźenja dla blisko wotjězda Šiborćicy (Nieder Seifersdorf) kontrolowali. Test pólskeho staćana na drogi dopokaza amfetaminy. Policisća zakazachu jemu dale jěć. Po zdaću běše so tež sobujěducy na drogach wuspytał – hišće w přitomnosći zastojnikow sydny so za wodźidło a wotjědźe z awtom, hačrunjež ani płaćiweje jězbneje dowolnosće njeměješe. Po tym zo běchu policisća to zwěsćili, tež jeho zadźeržachu a test na drogi přewjedźechu. Tón dopokaza substancu konop.
Wotewrja nowu knihowničku
Slepo. Juliana Kaulfürstowa, motiwatorka za serbsku rěč w projekće ZARI, přeprošuje na wotewrjenje noweje serbskeje knihownički składnostnje jubilejneho lěta 150. narodnin Jakuba Lorenca-Zalěskeho, załožerja prěnjeje serbskeje knihownički w Slepom. Zarjadowanje wotměje so jutře, 7. nowembra w 15 hodź. w gmejnskej bibliotece w Němsko-serbskim šulskim kompleksu Slepo.
Přihoty na 150. schadźowanku
Budyšin. Wšitcy, kotřiž chcedźa so z přinoškom na programje lětušeje schadźowanki wobdźělić, njech zdźěla temu nanajpozdźišo hač do njedźele Stanisławej Wowčerjej, zamołwitemu za organizaciju, tel. pod 03591 550-304 abo z mejlku na . Hladajo na 150. jubilej schadźowanki prosytaj režiseraj, zo přińdźeće w serbskej drasće abo w modernej interpretaciji serbskeje drasty.
Rozjimataj prašenja našeho časa
Wojerecy. Ludowa uniwersita we Wojerecach přeprošuje dźensa we 18 hodź. na nowu „Rozmołwu na hrodźe“ do Wojerowskeho hrodu. Něhdyšej fararjej Peter Paul Gregor a Frank Richter wěnujetaj so w dialogu aktualnym prašenjam w našej towaršnosći. Zastup je darmotny.
Hońtwjerske róžki zaklinčeli
Přidatnej milionaj za wopłóčki
Wo smjerći a žarowanju
Na temu „radiski wotdeleka“ w rozmołwje cyle rozdźělnje zhladowali
Wojerecy (SiR/SN). W předposlednim měsacu lěta křesćenjo wšelako na swojich zemrětych spominaja. Mjez druhim so w ramiku wosebitych nyšporow na kěrchowach rowy požohnuja, kaž minjene dny w Chrósćicach a Radworju. Smjerć a žarowanje běštej njedawno tež temje we Wojerowskej měšćanskej bibliotece.
Tam so wotbłyšćowaše, zo so bjeze wšeho zadani, wo smjerći rozmyslować a so takrjec na nju přihotować. Zarjadowanje wotměwaše so w ramiku hesła „Etika a literatura“ a nošeše trochu prowokantne napismo „Radiski wotdeleka – je wumrěće něšto rjaneho?“. We wotewrjenej dźěłarničce za demokratiju pod nawodom Julije Kieschnick bě šeflěkar Wojerowskeho klinikuma Frank Dietrich z hosćom. Christian Völker-Kieschnick zarjadowanje moderěrowaše. Wjace hač třiceći zajimcow bě přichwatało, městna runje tak dosahachu.
Kermuša ze sakralnej hudźbu
Baćoń (CRM/SN). Na hudźbny nyšpor běchu wěriwi minjenu njedźelu do farskeje cyrkwje w Baćonju přeprošeni. Běše dźě to za cyłu wosadu, kotrejž Baćoń, Haslow, Liboń, Čornecy, Pozdecy, Nowy Łusč a katolscy křesćenjo wokolnych wsow přisłušeja, kermušna njedźela. Na poswjećenje Božeho domu w lěće 1887 dopomni tež wosadny farar Gerat Wornar, kiž přednjese wšelake teksty a modlitwy.
Zyma so bliži a z tym so tež krosnowanska sezona nachila. Minjenu ...
Krótkopowěsće (06.11.24)
Trump jasny dobyćer wólbow
Washington. Kandidat republikanow Donald Trump je wólby prezidenta USA dobył. Po dotalnym wuličenju je sej wón 279 hłosow tak mjenowanych wólbnych muži zdobył. Jeho demokratiska kontrahentka Kamala Harris je hladajo na to jasnje podležała. Mjeztym su statni a knježerstwowi šefojo ze wšeho swěta, mjez nimi zwjazkowy kancler Olaf Scholz (SPD), Trumpej k dobyću gratulowali. (Hlej 2. str.)
2 700 ludźi ewakuěrowali
Wikow (Elsterwerda). Při twarskich dźěłach we Wikowje su dźěłaćerjo zawčerawšim bombu namakali. Je to něhdźe 250 kilogramow ćežka, ameriska lětarska bomba, kotruž mějachu fachowcy dźensa znješkódnić. Postajili su woni radius 1 000 metrow, kotryž dyrbja ludźo wopušćić. Něhdźe 2 700 ludźi je potrjechenych.
Zarjaduja nětko rěčne hodźiny
