Worklecy (JP/SN). Kupu komunikacije, kreatiwity a kultury su wčera we Worklecach přepodali. K tomu witaštaj wjesnjanosta Clemens Poldrack (njestronjan) a Christina Hozyna wjele wopytowarjow před nowym multifunkcionalnym twarjenjom. Holcy w serbskej narodnej ­drasće poskićištej na słowjanske wašnje chlěb a sól, Jette Njekec zahra na gitarje. Po słowach wjesnjanosty bě wčera za Worklecy historiski dźeń, na kotrymž móžachu nowowuhotowanu kupu skónčnje zjawnosći přepodać. Wón dźakowaše so předewšěm wobydlerjam, kotřiž su ze swojim angažementom projekt zmóžnili, kaž tež wšitkim na zwoprawdźenju wobdźělenym firmam.