Njeswačidło (SN/MWj). Z gumijowymi škórnjemi a runje tajkimi cholowami běchu sobudźěłaćerjo spěchowanskeho towarstwa Njeswačanskeje Sakskeje přirodoškitneje ptačernje wutoru hižo krótko po 5 hodź při Holešowskim haće po puću. W rohodźi a we wodźe nastajichu ­woni 16 sakow, zo bychu ptački popadnyli a je wopjeršćenili. Šěsć razow stajnje z wotstawkom jedneje hodźiny saki kontrolowachu, zdźěli Budyska přirodowa centrala w nowinskim wozjewjenju. Při tym přewodźachu sobudźěłaćerjow spěw sołobika (Nachtigall) a wołace zwuki humpaka (Rohrdommel).