Tež w nowym lěće so kóždu póndźelu wječor na Budyskej Bohatej ...
Krótkopowěsće (07.01.25)
Pokročuja z wuznamjenjenjom
Budyšin. Wuznamjenjenje angažowanych sakskich wobydlerjow ze Sakskej kartku za čestnohamtskich so pokročuje. To zdźěli Budyski měšćanski zarjad, w kotrymž móža so namjety a próstwy za wuznamjenjenje zapodać. Mytowani maja z kartku na přikład potuńšeny zastup w muzejach, kupjelach abo w kulturnych zarjadnišćach. Wot spočatka programa je Swobodny stat hižo wjac hač 21 000 kartkow za čestnohamtskich wustajił.
Wjele padow trochowali
Drježdźany. Pobrachowacych deklaracijow za ležownostny dawk dla su financne zarjady w Sakskej hač do kónca nowembra 135 000 trochowanjow přewjedli, zdźěli nětko sakske financne ministerstwo na naprašowanje. Wjace hač 1 673 000 zdźělenkow bu w Sakskej wobdźěłanych a mějićelam ležownosćow sposrědkowanych. Nimale 600 000 znapřećiwjenjow je dóšło.
Wosebitu listowu znamku wudali
Epilepsija psa pokazuje so w formach atakow
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (48)
Jednotliwe nerwy přenošuja signale na přichodne čuwy a k myškam. Přez wšelake mechanizmy dóńdźe k wuměnje informacijow mjez mozami a organami. Wot hłowy hač do małeje pazory su ćěła cycakow překasane wot wšelakich typow nerwow. Kóždy ma swój nadawk.
Wobškodźi-li so jednotliwa mała čuwa w ćěle, registruja mozy snano jenož nachwilnu ból. Hinak pak so ma, wobsteji-li defekt w mozach. Epilepsija psa je chorosć, kotraž pokazuje so we wšelakich formach atakow, nastawacych přez wjacore mylenja wotpjeća (Entladungsstörung) w mozach. Epileptiska ataka z widlišćemi (Krämpfe) nastanje, jeli skupina nerwow we wulkomozach (Großhirn) njenormalnje wotpina.
Pitna woda dróša
Běła Woda. Něhdźe 25 000 domjacnosćow w Běłej Wodźe a wokolnych gmejnach dyrbi wot noweho lěta za pitnu wodu wjace płaćić. Kubikny meter płaći nětko 1,68 eurow a z tym 20 centow wjace hač do toho. Tež zakładna płaćizna je so powyšiła. Domjacnosć ze štyrjomi wosobami a přetrjebu 120 kubiknych metrow wob lěto dyrbi nětko něhdźe šěsć eurow wob měsac wjace płaćić. Poprawom mějachu płaćizny we wobłuku zaměroweho zwjazka Srjedźna Nysa-Šepc lětsa konstantne wostać. Předsyda zaměroweho zwjazka Jörg Funda wopodstatni zwyšenje z přiběracymi personalnymi kóštami a z wotedawkami za klumpanje dnowneje wody.
Zhromadnje spěwaja
Budyšin. Wšitcy, kotřiž rady spěwaja, su tež w lěće 2025 zaso na zhromadne spěwanje přeprošeni. Kaž Lubina Žurec-Pukačowa w mjenje Zwjazka serbskich spěwarskich towarstwow zdźěli, wotměje so lětuše prěnje spěwne zetkanje jutře, 7. januara, we 18 hodź. w chórowej rumnosći Serbskeho ludoweho ansambla w Budyšinje. Njech lubowarjo serbskeho spěwa w prawje bohatej ličbje přińdu. Terminy dalšich zetkanjow so sčasom wozjewja.
Nowe lěto w Praze witali
Skupina Serbow sej do čěskeje stolicy wulećała
Praha (SN/WŽ). Na Karlowym mosće w Praze je lětsa skupina Serbow zhromadnje nowe lěto witała. Wjac hač 40 zajimcow, mjez nimi horstka młodostnych, wobdźěli so na silwesterskej wuprawje towarstwa Cyrila a Metoda do čěskeje stolicy. Bus Šmitec wozydłownistwa dowjeze jich do města, hdźež mějachu swój kwartěr centralnje w hotelu blisko Wjacsławskeho naměsta. Zhromadnu wječer wobrubi farar Praskeje katolskeje němskorěčneje wosady Lothar Vierhock ze zajimawej přehladku wo swojim duchownym skutkowanju. Prjedy hač je nazymu 2023 do Prahi přišoł, bě dlěši čas w Hongkongu a Moskwje za tam bydlacych němskorěčnych katolskich wěriwych zamołwity. Tola tež Łužica a tudyše křesćanske žiwjenje farar Vierhock derje znaje a tak so w bjesadźe ze Serbami ta abo tamna anekdota dopowěda. Danko Handrik, kiž bě jězbu zhromadnje ze swojej mandźelskej Danielu spřihotował, zmóžni zajimcam dohlad do studija ARD, hdźež ma jako wukrajny korespondent sćelaka swoje dźěłowe městno.
Wobdźělnicy spěwohry „Z TOBU – Bohu swjećene lěto“ w ...
Swědčenja hodowneho poselstwa
Chrósćicy. W k hodom nadobnje wupyšenej Chróšćanskej cyrkwi bě wčera k nyšporej lědma městna nańć. Přetož po lětdźesatki trajacej tradiciji – z časa kantora Handrija Wjenka – wuhotuja jón prěnju njedźelu noweho lěta spěwarjo Chróšćanskeho cyrkwinskeho chóra a instrumentalisća z hodownej hudźbu.
Krótkopowěsće (06.01.25)
Premjeru dožiwili
Sulšecy. Towarstwo Bratrowstwo Kulowskeje wosady je zawčerawšim w Sulšečanskim kulturnym domje swój lětny swjedźeń wotměł. Tam dožiwichu přitomni premjeru dźěćaceho dźiwadła towarstwa. Tohorunja bu tam dźiwadłowe zetkanje připowědźene. Wjace nadrobnosćow zhonja čitarjo zajutřišim w dźeniku.
Towarstwo prosy wo přizjewjenja
Drježdźany. Předsyda towarstwa „Stup dale“ Christoph Cyž skedźbnja na wohroženu serbsku dnjowu skupinu w Drježdźanskim Nowym měsće. Dokelž dohromady pjeć dźěći lětsa skupinu wopušći, hrozy strach, zo jón měšćanske zarjadnistwo rozpušći. Nowe přizjewjenja dotal njepředleža. Na poskitku zajimowani starši njech so rady pola towarstwa přizjewja.
Towaršnosć bilancuje
Město a gmejna matej stawnistwo nětko zhromadnje
Hodźij/Budyšin (SN). Za najrjeńši dźeń w žiwjenju młodych ludźi, mjenujcy za zmandźelenje, kročitej město Budyšin a gmejna Hodźij wot noweho lěta po zhromadnym puću. Po wobzamknjenju w měšćanskej resp. w gmejnskej radźe wutworištej wobě komunje zhromadny stawniski wobwod. Krótko do hód staj Budyski wyši měšćanosta Karsten Vogt a Hodźijski wjesnjanosta Gerald Meyer wotpowědne zrěčenje podpisałoj.
