Nowu gratownju klětu dotwarja
Hory (AK/SN). Twar noweje gratownje dobrowólneje wohnjoweje wobory w Zabrodźe w gmejnje Halštrowska Hola pokročuje. Tole zdźěli planowar a architekt Ronny Brantzko z Choćebuza wutoru na posedźenju gmejnskich radźićelow na Horach. „Hruby twar je hotowy, wokna a durje su zatwarjene. Tež třěcha je nimale hotowa. Spočatk lěta maja wrota slědować“, wón rozłoži. Elektriku tohorunja w januaru zatwarja, w februaru pak sanitarne připrawy. Nowotwar ma hač do awgusta 2026 hotowy być. Po tym chcedźa wobstejace twarjenje modernizować, štož ma šěsć do sydom tydźenjow trać. Na te wašnje zasadźensku hotowosć wobornikow tak mało kaž móžno wobmjezuja.
Runje tak kaž w starym měsće maja tež we Wojerowskim nowym měsće ...
Krótkopowěsće (18.12.25)
Přichod Łužicy rozjimali
Budyšin. Na druhej regionalnej konferency wuchodneje Sakskeje su zastupjerjo hospodarstwa, komunow a wědomosće wčera wo tym wuradźowali, kak móhł so region „centralny stołp europskeje industrijneje a inowaciskeje politiki“ stać. Tole přeje sej Zhorjelski krajny rada Stephan Meyer, kotryž je so ze swojim Budyskim kolegu Udom Witschasom a ministerskim prezidentom Michaelom Kretschmerom na konferency wobdźělił.
Ideje za wozrodźenje rěče
Choćebuz. „Best Practice für die Niederlausitz? Internationale Erfahrungen, Methoden und Ansätze zur Revitalisierung bedrohter Sprachen“ je titul dźesateho zešiwka, kiž je Serbski institut w rjedźe Sorabistiske źěłowe papjery wudał. Publikacija zjima slědźenje Anastasije Kostiučenko mj. dr. wo naprawach a teorijach, kotrež móhli z přikładom za planowanje rewitalizacije delnjoserbšćiny być.
Čěscy wikowarjo radšo w Žitawje
Žiwy adwent we wobchodźe
Multimedia w cyrkwi
Policija (17.12.25)
Wopity na awtodróze
Budyšin. Swojeho njewěsteho wašnja jězdźenja dla je póndźelu 55lětny wodźer nakładneho awta na awtodróze A 4 mjez Słonej Boršću a Budyšinom druhim šoferam napadnył. Po tym zo běchu policiju informowali, zastojnicy pólskeho šofera zadźeržachu. Při kontroli so wukopa, zo měješe wón 2,14 promilow alkohola w kreji.
Wjace pjenjez wjesnym radam
Kulowscy radźićeljo hospodarski plan města wobzamknyli
Kulow (AK/SN). W lěće 2026 wočakuje město Kulow 435 000 eurow mjenje dochodow z klučowych připokazanjow Swobodneho stata Sakskeje. Tole zdźěli komornik Mathias Kockert na zašłym posedźenju měšćanskeje rady. Nimo toho změja mjenje srědkow za hladanje wodźiznow. Město dóstanje jenož hišće połojcu dotalnych přiražkow. Personalne wudawki porno tomu klětu wo 81 000 eurow rozrostu a wokrjesny wotedawk budźe wo 43 000 eurow wyši. „Při wšěch tutych ćežkich wuměnjenjach pak mamy tež pozitiwne wuwića“, komornik připowědźi. Tak dóstanu klětu z dochodoweho dawka 160 000 eurow wjace a z wobrotoweho dawka 30 000 eurow wjace hač lětsa. Dochody z ležownostneho dawka A a B wostanu stabilne a tež dochody z přemysłoweho dawka budźeja podobne kaž lětsa. „Sadźby za tele tři wobłuki so njezměnja“, praji Kockert. Ličby su wobstatk hospodarskeho plana, kotryž su radźićeljo wobzamknyli.
Adwentnu hudźbu interpretował
Budyšin. W mnohoće kulturnych podawkow wopokaza so cyrkwinohudźbny poskitk „Pišćelowa hudźba k non“ minjenu třeću adwentnu njedźelu w tachantskej cyrkwi zaso jako jara kedźbyhódny poskitk. Stefan Kießling z Lipska běše wuběrny interpret pišćeloweje hudźby serbskich komponistow. Swobodnje skutkowacy organist a cembalist je po maćeri serbskeho pochada. Zajimujo so tuž tohorunja za pišćelowe twórby Serbow je wón před něšto lětami w Lipsku na modernym instrumenće w nowej propstowskej cyrkwi za cejdejku „Serbska pišćelowa hudźba“ sep wubranych twórbow nahrał. Nětko móžachmy po wšěm swěće agěrowaceho wuměłca bjezposrědnje tudy na Kohlowych pišćelach dožiwić.
Mičkec statok we Worklecach je třeću adwentnu njedźelu mnohich ...
Krótkopowěsće (17.12.25)
Łužica je „Net Zero Valley“
Drježdźany/Podstupim. Po wčerawšim pisomnym přihłosowanju hospodarskeju ministrow Sakskeje a Braniborskeje, Dirka Pantera a Daniela Kellera (wobaj SPD) je Łužica prěni Net Zero Valley Europy. Tole je wosebity region za hospodarske wuwiće technologijow bjez wustorkowanja klimje škodźacych płunow. Dokładniše informacije wo projekće na stronje: www.netzerovalley.eu.
Posledni wagon zawod wopušćił
Zhorjelc. Posledni dwuposchodowy wagon je wčera produkcisku halu francoskeho předewzaća Alstom w Zhorjelcu wopušćił. Klětu w měrcu chce Alstom wšitke dźěle zawoda nowemu mějićelej, brónjenskemu koncernej KNDS, přepodać. Wot dohromady 700 sobudźěłaćerjow je 170 nowe dźěło w Budyskej wotnožce Alstom našło. KNDS je připowědźił, něhdźe 350 dźěłaćerjow přewzać.
Čěski adwent w serbskich šulach
