Dokal ze starej drastu?
Ležownostny dawk zniža
Město Kulow inwestuje mjez druhim do towarstwoweju domow
Kulow (AK/SN). Prawniski dohladowanski zarjad Budyskeho wokrjesa je hospodarskemu planej 2025 města Kulowa přihłosował. Kaž měšćanski komornik Mathias Kockert zdźěli, móža lětsa 571 000 eurow za inwesticije a wjetše reparatury wudać, a to hačrunjež hišće wšitke dochody wěste njejsu.
Pjenjezy chcedźa předewšěm za wohnjowu woboru, za wjesnej towarstwowej domaj, za sportnišćo a za infrastrukturu nałožować. „Najwažniše je, zo wupisamy nowe wohnjowoborne jězdźidło HLF 20, z kotrymž stare jězdźidło narunamy“, Mathias Kockert rozłoži. W Sulšecach a w Dubrjenku chcedźa wjesnej towarstwowej domaj ponowić. Kopanišćo při Kulowskim starym dwórnišću, kotrež dźěći rady wužiwaja, ma nowu zwjeršnu worštu dóstać. Nimo toho ponowja w Kulowskej sportowni smuhi, z kotrymiž su wšelake hrajnišća woznamjenjene. Dale chcedźa nowy móst na Zdźarowskej dróze planować započeć.
Swjedźeń susodstwa so poradźił
Druhi raz po lěće 2007 wotmě so na Budyskej Sukelnskej minjenu sobotu nadróžny swjedźeń. Wuhotowali su jón wobydlerjo dróhi kaž tež wjacore na njej zaměstnjene wobchody a pjeć towarstwow sprjewineho města.
Budyšin (los/SN). Podźakowawši so wšitkim podpěraćelam a sobuskutkowacym zjima Aileen Böhm, kotraž bě zarjadowanje sobu organizowała, „poradźeny swjedźeń susodstwa“, kiž móhł zazběh noweje tradicije być: „Smy stajnje wotewrjeni za ideje a wjeselimy so nad namjetami. Komuž so chce, njech so pola nas přizjewi, chcemy-li swjedźeń klětu wospjetować.“
Při słónčnym wjedrje je minjeny pjatk dohromady 26 šulerjow ...
Krótkopowěsće (24.06.25)
Marathon do přestawki
Drježdźany. Sakski krajny sejm ma do lětnjeje přestawki hišće marathon posedźenjow zmištrować. Jutře a štwórtk chce parlament doskónčnje wo dwójnym etaće wuradźować. Dźensa wobjednawaja najprjedy druhe temy. W aktualnej hodźinje so zapósłancy wo wuskutkach horcoty kaž tež wo slědźenju w swobodnym staće dorozumja. Po tym frakcije wo wjacorych próstwach stronow rozsudźa.
Železniska čara je zawrjena
Kamjenc. Twarskich dźěłow na nastupišću Bischheim-Gersdorf dla wostanje čara linije S8 mjez Połčnicu a Kamjencom hač do 8. awgusta dospołnje zawrjena. Kaž Němska železnica zdźěla, zarjaduja za potrjecheny wotrězk narunanski transport z busami. Městna w tychle jězdźidłach su wobmjezowane, tak zo kolesa sobu njebjeru.
Serbski institut podpěrać
Muski chór Delany přeprošuje
Konjecy. Serbski muski chór Delany přeprošuje wšitkich lubowarjow hudźby na zjawnu probu spěwneho cyłka a to jutře, 24. junija. Započatk je wječor w 19 hodź. na dworje Konječanskeho towarstwoweho domu Delany. Čłonojo chóra postaraja so wo ćělne derjeměće.
Ponowja dróhu do Wudworja
Chrósćicy/Wudwor. Twarskich dźěłow dla je wokrjesna dróha mjez Chrósćicami a Wudworjom wot dźensnišeho hač do 8. awgusta dospołnje zawrjena. Přijězd do Kozarc je nadal móžny. Přichodny kónc tydźenja, wot pjatka, 27. hač do njedźele, 29. junija, budźe dróha folklorneho festiwala dla wuwzaćnje wotewrjena. Dołhož budźe dróha zawrjena powjedźe wobjězdka přez Pančicy-Kukow do Wudworja. Runočasnje chcedźa busowej zastanišći při wotbóčce na směr Kozarcy jako bjezbarjernej wutwarić. Busy pak wobě zastanišći hač do spočatka lěćnych prózdnin posłužuja.
Zjawna proba chóra Lipa
Pančicy-Kukow. Tež čłonojo chóra Lipa přeprošuja jutře, 24. junija, w 19 hodź. na zjawnu probu, kotruž chcedźa wonka w komunikaciskej arenje w Pančicach-Kukowje přewjesć. Zajimcy njech přinjesu sej stólčk sobu.
Młode baćony wopjeršćenjene
Gmejna Trjebin nadal bjez dołha
Trjebin (AK/SN). „Gmejna Trjebin móže dźakowano solidnemu hospodarjenju w přichodnymaj lětomaj něhdźe 1,1 milion eurow inwestować“, to wuzběhny gmejnska komornica Dana Piehl zašłu srjedu na posedźenju gmejnskeje rady. W inwesticiskim planje steja mjez druhim: wjacegeneraciski dom, hala z pultowej třěchu, nowe nastroje na zjawnym wjesnym hrajkanišću a saněrowanje Sprjewineho mosta při Trjebinskim młynje. Z jednym přećiwnym hłosom je wjetšina radźićelow dwójny etat 2025/2026 wobzamknyła.
Za lětsa je gmejna dohromady 248 000 eurow za inwesticije w etaće zaplanowała. Mjez druhim chce gmejna elektroniski zawěranski system při sportnišću instalować, za Trjebinsku dobrowólnu wohnjowu woboru nuzowy milinowy agregat wobstarać, dom towarstwow z fotowoltaikowej připrawu wuhotować a na Namjeznym puću nadróžne wobswětlenje ponowić. Za 2026 je gmejna 850 000 eurow za inwesticije w etaće zaplanowała. Najwažniša naprawa budźe klětu twar multifunkcionalneho twarjenja za wšitke generacije – jako přitwar při wohnjowej woborje w Trjebinje.
Wjesnu zhromadnosć hajili
Bórkhamor (JoS/SN). Składnostnje zawróta słónca minjenu sobotu běše wjesne towarstwo w Bórkhamorje na mjeztym hižo 28. wjesny swjedźeń přeprosyło. Wjele wopytowarjow, tež ze susodnych wjeskow, běše najebać horcoty do Jantaroweje areny přišło. Najmłódši hosćo nadeńdźechu wulki poskitk zabawy na swjedźenišću. Dźěći móžachu so šminkować dać, na kopańcowe wrota třěleć, na skakanskim hrodźiku skakać abo jantar z pěska wusawać.
W kofejowym času zahudźi Grodkowska dujerska gilda. W swjedźenskim stanje a w chłódku štomow běše horcota znjesliwa. Tykanc běchu žony z Bórkhamora kaž tež ze susodnych wsow napjekli. Najrjeńši to wuraz mjezsobneje zwjazanosće mjez wjesnjanami w gmejnje Sprjewiny Doł. Tykancowy bazar organizuje hižo wot prěnjeho wjesneho swjedźenja w lěće 1996 – potajkim 28 lět – Ute Köhler z jeje teamom.
Wjeršk na pózdnim popołdnju běše potom wosebite wurisanje – wubědźowanje kačkow – na Małej Sprjewi, na kotrymž so dohromady 100 tutych małych žołtych zwěrjatkow wobdźěli. Kački je wjesne towarstwo wjesnjanam předało, na kóncu běchu wšitke rozebrane.
„Prěnje wulke žně“ domchowali
W Chrósćicach maturantow Budyskeho Serbskeho gymnazija rozžohnowali
Chrósćicy (JP/SN). Z přewodom pěsnje „Viva la vida“ skupiny Coldplay zaćahnychu sobotu popołdnju maturanća Budyskeho Serbskeho gymnazija na swojej wotchadničce do Chróšćan „Jednoty“. Z afriskim spěwom „Adiemus“ zahaji 1. serbska kulturna brigada swój kulturny program, z kotrymž w běhu zarjadowanja dohromady něhdźe 200 hosći zahori. Šulski nawoda René Wjacławk gratulowaše 47 maturantam k wobstaću swojich pruwowanjow.
