Wobydlerjow prawidłownje wo stawje dźěłow informuja

Łaz (AK/SN). Ponowjenje wjesneje dróhi we Łazu so dlije. Aktualny twarski wotrězk wot nakupowanišća Penny hač ke křižowanišću při nalutowarni budźe po wšěm zdaću hakle 23. julija hotowy. To je tři tydźenje pozdźišo hač předwidźane. Tole zdźěli wjesnjanosta Thomas Leberecht (CDU) srjedu na rozšěrjenym zjawnym posedźenju wjesneje rady. „Komdźenje ma wjacore přičiny“, wón wuswětli. „Twarscy dźěłaćerjo su na fundament stareje dróhi storčili. Tam ležachu hišće medije w zemi, kiž pak njeběchu porjadnje zapisane. Twarska firma dyrbješe je dokładnje zwěsćić a potom přepołožić“, wón najwjetši problem rysuje.