W statnej kencliji ministerskemu prezidentej ptači kwas předstajili
Tydźenje dołho hižo knježeše we Worklečanskej pěstowarni „K wódnemu mužej“ mjez našimi předšulskimi dźěćimi napjate předwjeselo. Za tradicionalny ptači kwas wšitcy pilnje zwučowachu, spěwy wuknjechu, reje nazwučowachu a kóždy detail luboznje přihotowachu. K tomu dóńdźe powěsć, kotraž samo najwjetšu fantaziju dźěći přetrjechi – přeprošenje ministerskemu prezidentej Michaelej Kretschmerej do Drježdźanskeje statneje kenclije, zo bychmy tam naš ptačokwasny program předstajili.
Rozbudźenosć bě přewšo wulka! Skónčnje zaso wulka jězba z busom, woprawdźity dyrdomdej za dźěći. Jako bu potom tež hišće znate, zo nas Serbska telewizija za wusyłanje „Wuhladko“ tutón wosebity dźeń přewodźa, njeznaješe zahoritosć hižo hranicy. Hižo dny do toho bě napjatosć w dźěćoch hoberska.
W Kinsporku zaso kamelije kćěja. Tohodla domizniske towarstwo ...
Krótkopowěsće (23.01.26)
Próstwa čitarjam SN
Budyšin. Ludowe nakładnistwo Domowina prosy swojich čitarjow dźensa a přichodne dny wo zrozumjenje. Techniskich přičin transportneje firmy dla njehodźa so Serbske Nowiny sčasom dodawać. Je móžno, zo dóstanu čitarjo nowinu hakle přichodny dźeń. Transportna firma zaměrnje na rozrisanju dźěła.
Chcedźa w regionje zwučować
Kamjenc. Zwjazkowa wobora chce kónc tydźenja wokoło Běłeje Wody, Kamjenca, Wojerec a Grodka zwučować. We wobłuku zwučowanja z mjenom „Colder Iron“ dyrbja wobydlerjo mjenowanych kónčinow z tym ličić, zo přichodne dny wojakow abo wojerske jězdźidła wuhladaja. Zwučować chcedźa wonu taktisku direktnu komunikaciju. Mjez druhim je předwidźane, zo wojacy z pomocu balonow lětaki rozdźěla.
Dalše pjenjezy dóstali
Za ptačokwasne wjesela
Jeničce hišće tři dny a potom swjećimy ptači kwas. Předewšěm dźěći w serbskich pěstowarnjach a na zakładnych šulach su wćipne, hač su pyšne serbske drasty za jich kwasny ćah spřihotowane. Serbske šwalče su kubłanišćam poboku, hdyž nowu drastu trjebaja abo hdyž ma so tón abo tamny dźěl narunać.
Prěni raz wšědnu drastu za dźěći zešiła
Policija (22.01.26)
Rentnarja wobšudźili
Kamjenc. Kaž policija srjedu zhoni, je so w Kamjencu wuměnkar z woporom wobšudnikow stał. Muž bě pozdatnje wot swojeje banki mailku dla pruwowanja identity dóstał. Jako wón na nju wotmołwi, so wobšudnicy telefonisce přizjewichu a muž jim swoje kontowe daty přeradźi. Pozdźišo wón zwěsći, zo bě so z jeho konta 12 000 eurow zhubiło.
„Zerzawy hozdźik“ atraktiwniši
Zły Komorow (SN/MWj). Jedna z najznaćišich a najwoblubowanišich wuhladnych wěžow Łužicy ma w přichodźe hišće atraktiwniša a zajimawša być. Tuchwilu při tak mjenowanym Zerzawym hozdźiku při Sedličanskim jězoru blisko Złeho Komorowa twarja a wokolinu wuhladnišća porjeńšuja. Kaž w nowinskim zdźělenju zaměroweho zwjazka Łužiska jězorina Braniborska rěka, maja tam mjez druhim wotpočnišćo za ludźi, kotřiž z čołmikom po łužiskich jězorach pućuja, schód k Žornowskemu kanalej, hrajkanske nastroje a třěcha za škit před słóncom nastać. Za to je kraj Braniborska 1,2 milionaj eurow přewostajił. Zerzawy hozdźik je woblubowany wulětny cil. Loni je jón wjace hač 140 000 wulětnikarjow wopytało.
Z wjerška 30 metrow wysokeje a 111 tonow ćežkeje wěže maš rjany wuhlad na Sedličanski a Lejnjanski jězor. Tam Braniborska a Sakska we łužiskej jězorinje mjezujetej.
Gratownju lětsa přepodadźa
Depot wohnjoweje wobory w Stróži pola Rakec bórze hotowy
Rakecy (JK/SN). Rakečanska gmejnska rada je so wčera k swojemu prěnjemu posedźenju w tymle lěće zetkała. Na dnjowym porjedźe steještej jenož dwě wobzamknjeni, a tola bě wuradźowanje dosć zajimawe.
Wokrjes sport dale spěchuje
Zběrka basnjow změje premjeru
Wjesela so na wustup w sukelnicy
Aktiwni a spěchowacy čłonojo chóra Budyšin su so póndźelu w klubowni Serbskeho ludoweho ansambla k swojej hłownej zhromadźiznje zešli. Předsyda chóra Benjamin Wirth analyzowaše w swojej rozprawje zašłe lěto. Při tym zhladowaše na chórowe lěhwo w Ochranowje, na šěsć wustupow, tři nahrawane spěwy a tři chórowe swjedźenje. Wón wuzběhny wuspěšny koncert ćichu sobotu w Budyskim Serbskim muzeju, tradicionalne lětne spěwanje na Čornoboze, beneficny koncert Rotary-kluba w Marije Marćinej cyrkwi na dobro Budyskeje wokrjesneje hudźbneje šule, wobrubjenje kermušneho nyšpora w Zdźěrjanskej cyrkwi, zahajenje Wjacławskich wikow w Budyšinje z mjezynarodnymi hodownymi spěwami a wustup na adwentničce župy „Jan Arnošt Smoler“ w Serbskim domje.
Na zhromadźiznje witachu noweho čłona Michała Šołtu a počesćichu dwě jubilarce: Dagmar Pawolska je chórej hižo 25 lět swěrna, Anja Krawcowa pak 15 lět. Dirigent chóra Michał Janca so chorosće dla wobdźělić njemóžeše. Cyły chór jeho postrowi a jemu dobre polěpšenje přeješe.
