Krótkopowěsće (14.02.25)
Přizjewjenska doba so skónči
Drježdźany. Towarstwa, zwjazki a institucije maja jenož hišće hač do 1. měrca chwile, so za Dźeń Saksow a z tym zwisowace spěchowanske srědki w projektnym běrowje w Sebnitzu přizjewić a požadać. Dźeń Saksow wotměje so lětsa wot 5. do 7. septembra. Po zakónčenju přizjewjenskeje doby njemóža organizatorojo hižo próstwy wo spěchowanje wobkedźbować. Formulary su na wotpowědnej internetnej stronje wozjewjene.
Pomocnikow nadpadnyli
Budyšin. W Budyšinje je zawčerawšim skupina šěsć wosobow wólbnych pomocnikow Lěwicy nadpadnyła. Pomocnicy běchu informaciske stejnišćo strony posłužowali. Po słowach Lěwicy běchu skućićeljo z prawicarskeje sceny. Policija nětko pad přepytuje. W běhu wólbneho boja je w Sakskej wospjet k nadpadam na wólbnych pomocnikow Lěwicy dóšło.
Němske firmy profituja
Nowe předsydstwo wolili
Nowa Wjeska. Nowowješćanske wjesne towarstwo je kónc januara na wólbnej zhromadźiznje Jana Hellnera jako noweho předsydu woliło.
Dubrjenske bahno a wuměłstwo
Kamjenc. Muzej zapadneje Łužicy w Kamjencu přeprošuje pjatk, 14. februara, w 19 hodź. wšitkich zajimcow na wotewrjenje wosebiteje wustajeńcy „TERRA INCOGNITA Dubrjenske bahno – wuměłstwo zetka přirodu“ w tamnišim elementariju. Wuměłski kružk z wokrjesa Hornje Błóta-Łužica je so do Dubrjenskeho bahna podał a so z krajinu wuměłsce rozestajał. Nastali su cyle rozdźělne wurazliwe twórby w najwšelakorišich barbach, strukturach a materialijach. Kuratorka Julija Baumbachowa je wuběrk twórbow, kotrež su wot lěta 2021 nastali, za wustajeńcu zestajała.
Serbska přirada wuzwolena
Budyšin (CS/SN). Dokelž běchu Budyscy měšćanscy radźićeljo hižo na swojim poslednim posedźenju před dwěmaj njedźelomaj konstituowanje přirady za serbske naležnosće wobrěčeli, běše jeje wobzamknjenje na wčerawšim posedźenju jenož hišće formalny akt. Hač na jednoho, kotryž běše so hłosa wzdał, wuprajichu so wšitcy radźićeljo za to.
Za štyri krute městna w přiradźe běchu poprawom pjeć kandidatow namjetowali. Na kóncu pak frakcija CDU swojeho přidatneho kandidata cofny. Přirada ma nětko sćěhowacych čłonow: Maika Baiera za frakciju AfD – jeho zastupnica je Nicole Scharpe, Daniela Měrćinka za frakciju CDU – jeho zastupjer je Heinrich Schleppers, Andreju Kubank za frakciju Socialny naslědny Budyšin (SNB) – jeje zastupjer je Jonas Löschau, a Dennyja Krause za frakciju Swobodnych wolerjow – jeho zastupjer je Mike Hauschild.
Přeprošuja na wulke hejsowanje
Ponowjeja třěchu cyrkwje
Najebać minus etat schwalili
Radwor (SN/MiP). Sydarnja w Radworskim gmejnskim zarjedźe běše połnje wobsadźena. Nimo radźićelow běše wčera tež něhdźe 20 wobydlerjow gmejny na posedźenje gmejnskeje rady přišło. Hłowna tema na dnjowym porjedźe drje běše wobzamknjenje lětušeho hospodarskeho plana.
Z komentarom „tež w našej gmejnje je financna situacija lěto a ćeša“, poda komornica Melanie Mijanowa radźićelam nazorny přehlad k jednotliwym pozicijam na boku wudawkow kaž tež dochodow etata z cyłkownej sumu 6,8 milionow eurow. Pod smužku steješe w přehladce šwarna suma 740 000 eurow w minusu. „Za lětsa móžemy minus z financnymi rezerwami gmejny wurunać“, praji komornica, „hladajo na přichodne lěto pak mam tróšku brjušebolenja“, wona doda. Wšitcy radźićeljo su na kóncu etatej přihłosowali. Najebać minus chce gmejna wjace hač 1,3 miliony eurow inwestować, mjez druhim 50 000 eurow do wutwara reservoirow za hašensku wodu.
Atmosfera w muzeju putała
Dujerski kruh Consonare wosebite sakralne hudźbne dožiwjenje poskićił
Budyšin (CRM/SN). W rumnosći sakralneho wuměłstwa w Budyskim Měšćanskim muzeju poskići minjenu njedźelu popołdnju dujerski kruh Consonare wosady swj. Pětra k tam wustajenym eksponatam jara wotpowědowacu hudźbu – a to předewšěm serbsku. Mnoholětna nawodnica instrumentalistow, bywša hornistka w Serbskim ludowym ansamblu Evelyn Fiebiger, poda k wustajenym dźělam křidłowych wołtarjow z pózdnjeho srjedźowěka, kotrež maja wysoku wuměłsku hódnotu, trěbne wujasnjenja.
Do zakładneje šule přećahnyli
Worklecy (JK/SN). Dalši krok před přetwarom Worklečanskeje wyšeje šule su wučerjo a šulerjo póndźelu a wutoru sčinili. W zaměrnej, derje organizowanej akciji su wšitku šulsku potrjebu kaž ławki a stólcy kaž tež trěbne wučbne materialije z rumnosćow wyšeje šule do rumnosćow zakładneje šule přenjesli. Póndźelu wěnowachu so wjetšim nastrojam kaž ławkam a stólcam a znosychu je do nowych rjadowniskich rumnosćow. Wutoru zrumowachu jenož hišće zbytny material do składa. Nětko je tak daloko wšo zaměstnjene, zo móža wučerjo na nowym městnje hižo wot srjedy zaso prawidłownu šulsku wučbu podawać. W zakładnej šuli maja po wuprajenju nawodnicy šule Diany Šołćineje, samo jednu rumnosć wjac. Wona je dźakowna, zo je wšo tak derje bjez komplikacijow wotběžało. Kak budźe so w nowych, přechodnych rumnosćach wučić a wuknyć, zhonimy po tym, zo su so wučerjo kaž tež šulerjo po zymskich prózdninach porjadnje zažiwili.
