Chrósćicy (lmc/SN). Składnostnje tury po młodźinskich klubach wopyta zapósłanča Elaine Jenčec (CDU) minjeny pjatk mjez druhim młodźinski klub w Chrósćicach. Přewodźał je ju prezident sakskeho krajneho sejma Alexander Dierks (CDU). We wobłuku tury po klubach, kotraž steji pod hesłom „Tykanc ja sobu přinjesu – wy pak temy“, zetkachu so angažowani młodostni z krajnymaj politikarjomaj w přijomnej atmosferje.

Ze serbskim postrowom „Wjeselu so jara dźensa tu być, na dobru rozmołwu“, Elaine Jenčec koło zahaji. W srjedźišću rozmołwy stejachu centralne wužadanja regiona. Hnydom na spočatku dźěše wo městnosć, kotraž mnohich Chróšćanow, předewšěm młodostnych zaběra. W „Jednoće“ njesportuja jenož stari kaž tež młodźi, ale tam wotměwaja so tež kulturne zarjadowanja, kaž ptači kwas abo dźiwadłowe předstajenja. Młodostni skedźbnichu na chětro špatny twarski staw wjacezaměroweje hale, kotraž je zetkawanišćo generacijow.