Budyšin (CS/SN). W měsće Budyšinje je wjace hač 200 aktiwnych towarstwow. Jich zastupjerjo běchu tele dny do Króny na dźakne zarjadowanje přeprošeli. Přetož, tak rjekny wyši měšćanosta Karsten Vogt, čestnohamtske dźěło samozrozumliwe njeje. Byrnjež towarstwa rozdźělne politiske nastajenja wotbłyšćo­wali, tak wšitkich tola jich angažement za město Budyšin zjednoća.

Wo třoch aspektach tohole prócowanja zastupjerjo towarstwow porěčachu. Tak Lars Bauer z wokrjesneho sportoweho zwjazka wuzběhny, zo so w měsće 7 000 ludźi dohromady 52 sportowym družinam wěnuje. Bauer přeje sej dosć modernych sportowych připrawow. ­Anke Knaak a Tobias Meyer-Uhma rozprawještaj wo wozelenjenju města. Cil ­sadźenja tysac štomikow a kerkow drje hišće docpěli njejsu. Wo to pak so klětu dale prócuja.

W Halštrowskej Holi pućowanske šćežki ze serbskim poćahom wuwili

Hory (AK/SN). Gmejna Halštrowska Hola je po płoninje druha najwjetša Budyskeho wokrjesa. Wona steji před wulkimi wu­žadanjemi. Hdźež su hač do spočatka 1990tych lět brunicu wudobywali, nastachu nětko mjez sobu zwjazane jězory, kotrež su hłowny dźěl turistiskeho přichoda regiona. Jězory a wodosportowe poskitki pak nimaja jeničke ćežišćo dalšeho wuwića być. „Chcemy mnohostronski poskitk wutworić, zo bychmy wopytowarjam kaž tež domoródnym runočasnje jónkrótnosć regiona zbližili. Wulki potencial widźimy tohodla we wuwiću syće pućowanskich šćežkow. Pućowar měł na rozdźělnych temowych pućach wšelakorosće zwěriny a rostlinow, mnohotnosć krajiny kaž tež serbsku kulturu na teritoriju našeje gmejny dožiwić“, podšmórnje wjesnjanostka Antje Gasterstädt (CDU).

Budyšin. Na wosebite dohodowne spěwanje přeprošuja jutře, pjatk, w 14 hodź. do Budyskeho dwórnišća. Tam chce rozhłosowy chór MDR hromadźe z dujerskim kwartetom adwentnu atmosferu pěstować a sej z publikumom zaspěwać. Tež serbske hodowne pěsnje w hakle ­njedawno wuznamjenjenym dwórnišću zaklinča, wšako su sej jako podpěru Prěnju serbsku kulturnu brigadu pře­prosyli. Wona přednjese wuběr swojich adwentnych kruchow. Jeje čłonojo wjesela so runja druhim akteram na čiłu mjezsobnu wuměnu. Dirigent rozhłosoweho chóra Howard Arman a wšitcy wobdźěleni nadźijeja so bohateho wobdźělenja. Wjedra dla su koncert wot Póstoweho naměsta do dwórnišća přepołožili.

Budyšin (CRM/SN). Kaž kóžde lěto na spočatku adwenta přeprošachu tež lětsa Budyskich serbskich katolskich wosadnych a dalšich hosćow prěnju adwentnu njedźelu na tematiski nyšpor do Cyrkwje našeje lubeje knjenje. Ze žónskej šolu, klarinetistom a saksofonistom Thomasom Siegmundom běše tachantski kantor Kamil Maksymilian Kulawik program přihotował, do kotrehož wotběha su tež wosadu zapřijeli.