Hudźba pod kožu šła
Hórki. Nazymski koncert staj Helena a Jan Brězan-Hejduškec minjenu sobotu na Smolic statoku w Hórkach wuhotowałoj. Městna běchu sčasom do koncerta hač na posledni stólčk wobsadźene. Wjace hač sto wopytowarjow bě na zarjadowanje přichwatało. Najebać mnoho ludźi knježeše přitulna atmosfera. Młodaj akteraj běštaj sej přezjednaj: „Byrnjež koncert wupředaty był – štož je naju wězo ekstremnje motiwowało – knježeše jara přijomna a swójbna atmosfera, nimale kaž w bydlenskej stwě“, Jan Brězan-Hejduška zwurazni.
Interpretaj prezentowaštaj wotměnjawy program ze serbskimi, němskimi a jendźelskimi spěwami. Tež spěw z Awstriskeje bě dźěl sobotnišeho repertoira. „Namaj dyrbja so spěwy lubić, hewak nimamoj žane wjeselo, a to připosłucharjo pytnu“, prajištaj. Spěwaštaj raz zhromadnje, raz kóždy sam, powědaštaj mjeztym małe stawiznički a spožčištaj koncertej z tym cyle wosobinski charakter.
W hornjołužiskich wosadach su wčera z wosebitym nyšporom a ...
Krótkopowěsće (12.11.25)
Šmórnu přiražku za wučerjow
Drježdźany. Sakski minister za kubłanje Conrad Clemens (CDU) chce wosebitu přiražku za wučerski dorost na zakładnych šulach we wjesnych kónčinach klětu wotstronić. Wuwzaćne rjadowanje płaći w šulskim wobwodźe Budyšin, hdźež ju dale wupłaća. Na šulach druhich družin w Sakskej nowi wučerjo přiražku tohorunja dale dóstanu.
Běrow za pop-kulturu załožili
Drježdźany. Sakskej ministerstwje za kulturu a za hospodarstwo spěchujetej z něhdźe 310 000 eurami nowy běrow za pop-kulturu a hudźbu, kotryž je w oktobrje swoje dźěło zahajił. Wón ma być centralne městno za podpěru hudźbutwórcow a za hudźbne institucije w Sakskej. Zaměr je, mjezsobne styki w branši na- a wutwarjeć, wuměłče a wuměłcow dźeržeć a scenu popoweje hudźby wožiwjeć, zdźěli kulturne ministerstwo.
Zahrjebany pokład namakali
Policija (11.11.25)
Tójšto hašiša plahował
Łuty. Kedźbliwym policistam je njedźelu we Łutach napadnyło, zo ze zahrody podhladnje za konopju wonješe. Nimo toho wuhladachu zastojnicy rostlinarnju, w kotrejž wočiwidnje konop rosćeše. Připadnje bě tež wobsedźer zahrodki přitomny. 35lětny přizna, zo hašiš plahuje. Do rostlinarnje pohladnyć pak zastojnicy njesmědźachu. Tuž wobstarachu sej dowolnosć za přepytowanje. Při tym namakachu policisća runje wotžnjate rostliny kaž tež dalše, kiž so hižo sušachu, a wšelki grat za jich předźěłanje. Po wšěm zdaću njeje Łutowčan hašiš jenož za sebje plahował, ale jón tež předawał. Zastojnicy wšitko sćazachu.
Meja z koncertom zabawjała
Radworski chór z pisanym programom připosłucharjow přeswědčił
Budyšin. Hižo z rjanej tradiciju je, zo přeprosy župa „Jan Arnošt Smoler“ na dnju Budyskeje Romantici do Serbskeho domu. Tež hdyž běchu starosće wokoło přihotow romantiskeje nocy w měsće wulke a jenož někotre wobchody, hosćency a Budyski měšćanski muzej so wotewrěchu, poskićachu w Serbskej kulturnej informaciji słódny kofej a běchu po chódbach Serbskeho domu lóštne zynki, wjesołe spěwy a zabawne hrónčka kaž tež radostne rozmołwy a juskanje dźěći słyšeć.
Chór Meja předstaji hosćom Budyskeho nazymskeho koncerta sobotu lóštny program z pjera Jurja Winarja „Pilnje dźěłaj – wjesle spěwaj“. Jurij Winar bě po Druhej swětowej wójnje Meju nawjedował. Nětčiši jara hibićiwy dirigent a wuspěšny solist chóra Pětr Cyž bě fragmenty z lěta 1955 w měšćanskej bibliotece namakał a wšitko ze spěwnym ćělesom akuratnje a pilnje nastudował a samo Radworsku młodźinu zapřijał. Po programje wjedźeše z krasnymi hrónčkami Jurja Winarja Jakub Wowčer.
Hwězdy fabriku wobswětlili
Hórnikecy (SN). Něhdźe 15 500 ludźi je so minjeny kónc tydźenja w Hórnikecach wobkuzłać dało, jako bě tamniša Energijowa fabrika z wjace hač tysac Ochranowskimi hwězdami wupyšena. Tři tydźenje do prěnjeho adwenta dožiwichu wopytowarjo fascinowacu měšeńcu legendarnych hwězdow a jónkrótneje kulisy něhdyšeje briketownje. Komentary w socialnych syćach swědčachu wo tym, kak spokojom zajimcy běchu.
Po měnjenju organizatorow bě koncept, po kotrymž smědźeše jenož 4 000 wopytowarjow wob dźeń na teren Energijoweje fabriki přińć, wuspěšny. Najwjetši dźěl hosći bě z Wojerec z shuttle-busom přijěł, tak zo w Hórnikecach k wobchadnemu chaosej dóšło njeje.
Klětu ma so tajke zarjadowanje spočatk nowembra zaso we Wochožanskim parku błudźenkow přewjesć. Pozdźišo maja Hórnikecy znowa na rjedźe być.
Zetkaja so w sakskej stolicy
Drježdźany. Poslednje lětuše Serbske blido w Drježdźanach wotměje so jutře, srjedu, we 18 hodź. Wobdźělnicy zetkaja so w Tages Bar Löwe na Hłownej dróze 46–48 (napřećo korčmje Am Thor, hdźež so schadźowanja minjene měsacy wotměchu).
Radźićeljo wuradźuja
Radwor. Wobhospodarjenje pěstowarnjow Radworskeje gmejny steji w srjedźišću přichodneho posedźenja tamnišeje gmejnskeje rady jutře, srjedu, we 18.30 hodź. w gmejnskim zarjadnistwje. Najprjedy podadźa informacije wo wudawkach za pěstowarnje. Dale póńdźe wo wjedźenje a financowanje dweju pěstowarnjow w Radworju a dalšeje w Minakale.
Wo serbskich naležnosćach
Budyšin. Ze swojimi dźěłowymi ćežišćemi za lěto 2026 zaběra so jutře, srjedu, přirada za serbske naležnosće města Budyšina na swojim posedźenju w 17 hodź. w radnicy. Dale póńdźe wo staw přihotow serbskeje powědkoweje šćežki. Na dnjowym porjedźe steji tohorunja rozprawa wo Małowjelkowskim sympoziju.
Wuzwola noweho princa
Hudźbnu šulu podpěrali
Budyšin. Wokrjesna hudźbna šula Budyšin trjeba dalše instrumenty, kotrež móhli wuknjacym wupožčić. Ale nic mjenje wažne je nowe křidło za koncertownju w nastawacym nowym domicilu na Tzschirnerowej dróze. Tuž rozsudźichu so zamołwići Rotary-kluba, swój beneficny koncert lětsa na dobro tuteje wažneje kubłanskeje institucije přewjesć. Minjeny pjatk bě Cyrkej Marije a Marty jara derje ze zajimowanymi pjelnjena. Prezident Rotary-kluba Budyšin Günter Beschel a superintendent na wuměnku Reinhard Pappai wšitkich powitaštaj. A tež Margitta Luttner ze spěchowanskeho towarstwa a nětčiša nawodnica institucije Camilla Jende so słowa jimaštej a dźak wuprajištej.
Nałožk spěwanja na swjateho Měrćina pěstowachu dźensa zaso ...
Serbscy koparjo „stareje gardy“ sej Prahu wotkryli
Kak woswjećiš dobyće koparskeho mišterstwa? Pola Sokoła Ralbicy/Hórki su so „stari knježa“ (abo „stara garda“, kaž je nawoda Jan Hrjehor złožujo so na čěske wašnje prajił) rozsudźili, Prahu wopytać. Dźewjatnaće zmužitych je sobotu, 8. nazymnika, do Serbskeho seminara dojěło. Skupina nóžkuje přez Karlowy móst na druhi bok rěki do Stareho města, hdźež změje nóclěh. „Lukášo, sy ty připadnje w měsće po puću?“, prašeja so někotři. „Ně, wšako mamy program přihotowany. Poskiću wam najlěpše piwo w Praze.“ Wokomik pozdźišo sedźimy w gotiskej pincy hosćena U Vejvodů.
