Policija (25.11.24)
Paduši w bywšim jastwje
Budyšin. Bywše stasi-jastwo a dźensniše wopomnišćo w Budyšinje su sej njeznaći w nocy na sobotu za padustwo wupytali. Tam pokradnychu woni pjenjezy z jałmožnje kaž tež z awtomata za zakuski. Dohromady spakosćichu woni něhdźe 700 eurow. Načinjena wěcna škoda pak wučinja něhdźe 3 000 eurow, Zhorjelska policajska direkcija zdźěli. Policija pad nětko přepytuje.
Šokoladu sobu wzał
Běła Woda. Z kriminelnej energiju je pjatk popołdnju muž w Běłej Wodźe po wšěm zdaću hižo na hodowne dariki myslił. 38lětny z běłoruskim staćanstwom je z nakupowanišća na Berlinskej dróze 30 taflow šokolady pokradnył. Po informacijach policije bě rubizna 116 eurow hódna. Tuž drje najnowša dubajska šokolada mjez pokradnjenymi wěcami njebě. Sobudźěłaćerjo kupnicy tónle pad wobkedźbowachu a muža narěčachu. Kaž policija zdźěli, bě wón kooperatiwny. Přiwołani zastojnicy Běłowodźanskeho rewěra identitu muža zwěsćichu a chłostanske přizjewjenje wupisachu.
Štomy lětsa njezměja
Budyšin. Štóž je sej minjene lěta božodźěsćowy štomik z Budyskeho měšćanskeho lěsa wupytał a jón hakle krótko do hód podrězał, tónle tradiciju lětsa pokročować njemóže. Dobreho wothłosa w zašłych lětach dla su wobstatk młodych štomikow tak jara redukowali, zo lětsa žane štomiki pušćeć njemóža. Potrjeba bě w zašłosći wjetša hač wobstatk. Plantaža dyrbi w decembru tuž začinjena wostać, měšćanske zarjadnistwo zdźěli. Wone pak so nadźija, zo so wobstatk štomikow hač do hód 2025 zaso wožiwi.
Dźeń wotewrjenych duri a wiki
Hosći witaja w jich maćeršćinje
Budyšin (SN). Swoje ćišćane wudźěłki za turistiske wabjenje město Budyšin rozšěrja. Nimo woblubowaneho němskorěčneho dowoloweho magacina maja nětko tež dwě nowej brošurce, kotrejž wuńdźeštej stajnje w třoch rěčach. Pod hesłom „Budyšin – město wěžow při Sprjewi“ předleži jedna němsce, pólsce a čěsce a tamna jendźelsce, francosce a nižozemsce.
Z wurazliwymi a wulkoformatowymi wobrazami kaž tež z informatiwnymi tekstami podatej brošurce skutkowny prěni zaćišć wo sprjewinym měsće. Na 15 stronach móža so čitarjo wo měsće wěžow a jeho wosebitosćach informować. Brošurce njejstej jenož w Budyskej informaciji wupołoženej. Jej chcedźa tohorunja na mjezynarodnych wikach rozdźělić a politiskim hosćom přewostajić.
Drastu digitalnje zachować
We Wojerowskim ZCOM wčera wosebity projekt zahajili
Wojerecy (KD/SN). Serbska narodna drasta je jara mnohotna. Zdźěla je so w detailach wot wjeski k wjesce w Delnjej a Hornjej Łužicy rozeznawała. Nimo toho su žony za wšelake přiležnosće wšelake drasty měli. Nimo łužiskich muzejow tež Wjacławkec dom za serbske narodne drasty we Wojerecach tajku originalnu serbsku drastu hromadźi, zo by ju přichodnym generacijam zachował. Tam prócuja so tež, wědu wo prawym woblěkanju kaž tež techniki zhotowjenja zdźeržeć.
W tutym zwisku kročitaj Jakob Gruhl a Jan Lorenz ze swojej firmu ectoplastic hromadźe z Towarstwom za hajenje regionalneje kultury w srjedźnej Łužicy po cyle nowych pućach. Woni dźěłaja na digitalnym archiwje serbskich drastow, rozprawja čłonka předsydstwa towarstwa Kirsten Böhme, kotraž zdobom tež w Domje za serbske narodne drasty dźěła, na wosebitym zarjadowanju we Wojerowskim Zusowym kompjuterowym muzeju ZCOM.
Krótkopowěsće (25.11.24)
Serbski sejm: Dotal 400 wolerjow
Njebjelčicy. Za wólby 2. Serbskeho sejma je 33 kandidatow namjetowanych. To zdźěli předsyda wólbneje komisije Siegfried Kühn dźensa našemu wječornikej. Čas za zapodaće kandidaturow za 24 městnow Serbskeho sejma je nimo, wolerjo pak móža so hišće hač do klětušeho 23. februara přizjewić. Dotal je so w běhu poł lěta něhdźe 400 ludźi do lisćiny wolerjow zapisać dało.
Přećiwo antisemitizmej wustupili
Budyšin. Něhdźe 140 ludźi je so wčera na „pochodźe přećiwo antisemitizmej“ po Budyskim nutřkownym měsće wobdźěliło. Podłu čary bě pjeć stacijow z kopolakami, hdźež spominachu woni na wosudy Židow a Židowkow za čas nacionalsocializma w Budyšinje.
Hłowne myto Ladinjance
Grit Lemke z filmom w Kufa
Wojerecy. Zhromadnje z Medijowej syću Łužica přeprošuje Wojerowska Kulturna fabrika (Kufa) na zarjadowanje z předstajenjom filma serbskeje filmowče Grit Lemke „Pola nas rěka wona Hanka“ a to njedźelu, 24. nowembra, w 19 hodź. do rumnosćow Kufa na Piwarskej hasy 1 we Wojerecach. Z hosćom je tež serbski spěwotwórc Jacke Schwarz, kotryž před předstajenjom filma wustupi. Režiserka Grit Lemke přeprošuje na zhromadnu rozmołwu na kóncu zarjadowanja.
Na Chrysta krala do Chrósćic
Chrósćicy. Dekanatne dušepastyrstwo Worklecy přeprošuje serbskich katolskich młodostnych njedźelu Chrysta Krala, 24. nowembra, w 14 hodź. na nyšpor do Chróšćanskeje cyrkwje. Zajimcy njech přiwjezu sej swoje šmóratko sobu. Po tym su wšitcy na zhromadnu swačinu a překwapjenku na tamnišej farje přeprošeni.
Pochod přećiwo antisemitizmej
Cyble nalětnich kwětkow tykali
Nowe zetkanišćo rosće
W Rodecach zběhanku za wulke předewzaće gmejny swjećili
Rodecy (SN). Jedne z předewzaćow, kotrež we wobłuku strukturneje změny w dwurěčnej Łužicy zwoprawdźeja, je nowy kulturny a zetkawanski centrum w Rodecach w Bukečanskej gmejnje. Po šěsć měsacach twarskeho časa su jeho hrube kontury mjeztym jasnje spóznajomne. W přitomnosći zastupjerjow gmejny a kehelowanskeho towarstwa, sobudźěłaćerjow twarskich firmow kaž tež planowarjow swjećachu tam předwčerawšim zběhanku.
W nowym kulturnym a zetkawanskim centrumje budu kehelowanska připrawa ze štyrjomi čarami, rumnosće za techniku a skład a předewšěm žurla za zarjadowanja towarstwow, wobydlerske zhromadźizny a dalše najwšelakoriše zjawne zaměry zaměstnjene. We wobłuku inwesticiskeho zakonja brunicoweho regiona dósta Bukečanska gmejna za projekt w Rodecach 2,9 milionow eurow spěchowanja přizwolenych. To je 90 procentow cyłkowneje twarskeje sumy. Tak móže na městnje dotalneho a dodźeržaneho zetkawanišća nowe nastać.
Železnica po muzeju jězdźi
Wšitcy lubowarjo modelowych železnicow nadeńdu w tutych dnjach jónkrótny poskitk w Njeswačanskim domizniskim muzeju. Tam natwarichu zamołwići wosebitu wustajeńcu mjez druhim z miniaturnym swětom, w kotrymž so ćahi pohibuja.
Njeswačidło (ML/SN). Wosebitu dohodownu wustajeńcu z dohromady třinaće modelowymi železnicami je Wojerowske towarstwo modelowych železnicow wuhotowało. Wone zhladuje mjeztym hižo na 57 lět swojeho wobstaća. Wojerowscy hobbyjowi twarcy modelowych ćahow zhotowichu dźesać dioramow a jědnaće modelowych železnicow, kotrež móže wopytowar we witrinach wobdźiwać.
Mjez nimi je model w Němskej prěnjeje parneje lokomotiwy z mjenom „Saksonija“. W lěće 1838 w Drježdźanach twarjena, je wona hač do lěta 1849 ludźi z Lipska do Drježdźan wozyła. Nimo wjele dalšich modelow nadeńdźe wopytowar tu tež model dieseloweje lokomotiwy BR110 z wagonom. Wona bě wot 1960tych lět sem jara rozšěrjeny typ Němskeje železnicy NDR.
