Na dnju měšćanskeho lěsa čerwjeny dub jako štom lěta sadźili

Lubjeńc (CS/SN). Kaž zo bychu to hižo před wjace hač sto lětami wědźeli: 1913 je město Budyšin na Žmórcu (Schmoritz) južnje Budyšina na 0,7 hektarach čerwjene duby sadźić dało. Nětko je čerwjeny dub štom lěta 2025. Wón je rezistentny přećiwo suchoće a z tym takrjec dobyćer klimoweje změny. Dźensa su štomy na Žmórcu něhdźe 30 metrow wysoke a dawaja wobstajnje dobre symjo. Hdys ­a hdys zamołwići štom podrězaja. Jeho drjewo hodźi so mjez druhim za zhotowjenje meblow.