W Čornochołmčanskim Krabatowym młynje knježeše sobotu podobna atmosfera kaž w telewizijnym wusyłanju, w kotrymž pytaja talenty za wulku wuměłsku karjeru.

Čorny Chołmc (KD/SN). „Z wodychom nawróta“ je titul lětušeje Krabatoweje sagi, kotruž w lěću w Čornochołmčanskim Krabatowym młynje inscenuja. Nimo wosom powołanskich dźiwadźelnikow skutkuje 60 lajskich akterow sobu. Třećinu z tychle městnow lětsa z nowymi hrajerjemi wobsadźa. „Kóždy z nich ma wulku zamołwitosć za cyłkowny ansambl, ale předewšěm za publikum“, rozłoži produkciski nawoda Anton Fuchs.