Dźakowano srědkam nowy zachod wopomnišća
Budyšin (UM/SN). Sakska statna ministerka za kulturu Barbara Klepsch (CDU) je tydźenja srjedu bywše Budyske stasi-jastwo a dźensniše wopomnišćo wopytała, zo by tamnišej nawodnicy Silke Klewin zdźělenku wo spěchowanju wopomnišća z cyłkownej sumu 240 000 eurow přepodała. Wob lěto ma wopomnišćo něhdźe 90 000 wopytowarjow. Konkretne plany za wužiwanje financnych srědkow we wopomnišću hižo maja, tak zwurazni nawodnica. Garaže na dworje něhdyšeho stasi-jastwa Budyšin II chcedźa na centralny přijimowanski wobłuk přetwarić. „Dotal nimamy centralneho městna, na kotrymž móhli so wopytowarjo zhromadźić a na kotrymž hnydom spóznawaja: Tu je zastup do wopomnišća“, znazorni Silke Klewin. Mjez druhim změja wosrjedź noweho twara tež městna, na kotrychž móhli so šulske rjadownje na seminar abo přednošk schadźować. Tež serwisowy wobłuk budźe tu zaměstnjeny. Nowy zachod do wopomnišća zmóžni wopytowarjam bjezbarjerny přistup.
Wšědne serbowanje trenować
Hač do póndźele móža so zajimcy za konferencu „Domoj do přichoda – dwurěčna Łužica 2100“ 13. nowembra přizjewić. Hišće je swobodnych městnow za wuměnu wo wšědnym serbowanju.
Budyšin (SN/mb). Nawjazujo na někotre ćežišća swojeho akciskeho plana wuhotuje syć za serbsku rěč a regionalnu identitu ZARI w nošerstwje Domowiny tutu konferencu wo „wiziji, zamołwitosći, zhromadnej syći“ w Smochčanskim kubłanišću swjateho Bena. Wosebje prěnja a pjata dźěłarnička móhłoj tež maćernorěčnych Serbow z tak mjenowanych jadrowych kónčin zajimować. „Kak docpějemy dwurěčnu normalitu?“ rěka prěnja tema. Nawodnica ZARI Diana Pawlikowa na naprašowanje Serbskich Nowin na to skedźbni, zo je tež serbskim zarjadowarjam hustodosć ćežko, spokojacu dwurěčnosć zwoprawdźeć. Druhdy je wabjenje ryzy němske abo serbske přinoški na zarjadowanjach so prosće němsce wospjetuja, štož Serbam na čuwy pada. Tohodla je wuměna wo inteligentnišich formach wažna.
Krótkopowěsće (08.10.25)
Hohm bórze šef AfD-młodźiny?
Choćebuz. Předsyda Choćebuskeje AfD a zapósłanc braniborskeho krajneho sejma Jean-Pascal Hohm je medijam wobkrućił, zo chce za zastojnstwo předsydy młodźiny strony na zwjazkowej runinje kandidować. Zastupjerjo čłonow młódšich hač 35 lět chcedźa w nowembrje młodźinski zwjazk AfD znowa załožić. Hohma su w zańdźenosći wospjet kontaktow z neonacijemi dla kritizowali.
Na BTU nowačkow přijimali
Choćebuz. Dohromady něhdźe 2 000 studentow zahaji w tutych dnjach swój studij na Braniborskej techniskej uniwersiće (BTU) w Choćebuzu a Złym Komorowje. Hižo na naměsće před Choćebuskej měšćanskej halu su póndźelu žony w serbskich narodnych drastach nowačkow z chlěbom a selu powitali. Na přijimowanskej swjatočnosći je jich mj. dr. prezidentka BTU Gesine Grande postrowiła.
Wjace mzdy sobudźěłaćerjam
W kupjeli tež bjez wody rjenje było
Policija (07.10.25)
Šěsć wosobow so zraniło
Budyšin. Při wobchadnym njezbožu wčera rano na zapadnej tangenće w Budyšinje je so šěsć wosobow zraniło. Po informacijach policije chcyše 46lětna wodźerka Škody nalěwo na Přišečansku dróhu wotbočić, njewobkedźbowaše pak napřećo přijěducy Fiat 61lětneje šoferki, tak zo jězdźidle do so zrazyštej. Wobě wodźerce, sobujěducy w Škodźe kaž tež tři dalše wosoby w Fiaće, mjez nimi dwě dźěsći w starobje štyrjoch lět, so zdźěla ćežko zranichu. Při wobchadnym njezbožu nasta něhdźe 30 000 eurow škody.
Radźićeljo wuradźuja
Radwor. Přichodne posedźenje Radworskeje gmejnskeje rady budźe jutře, srjedu, we 18.30 hodź. w sydarni gmejnskeho zarjadnistwa. Mjez druhim informuja wo aktualnym stawje kołowokoło Radworskeho hrodu.
Dyrdomdej do zymy
Kulow. Wo swojej jězbje do sobu najzymnišeho sydlišća swěta, do wjeski Jučugaj w sewjerowuchodnej Sibirskej přednošujetaj Andy Winter a Ronald Prokein. A to štwórtk, 9. oktobra, w 19.30 hodź. w Kulowskim Jakubetzowym wustawje. Zastup płaći dwanaće eurow.
Pisany dźeń za swójby
Wjele pjenjez za Šibojski jězor
Město Wojerecy inwestuje do swojeho bliskowočerstwjenišća
Wojerecy (AK/SN). Zapadny pobrjóh Šibojskeho jězora chce město Wojerecy dale turistisce wuwiwać. Za to su měšćanscy radźićeljo na swojim zašłym posedźenju wažny twarski nadawk we wobjimje 5,3 miliony eurow zahrodniskej firmje z Brězowki w Dźěwinskej gmejnje přepodali. Mjez druhim maja wot statneje dróhi S 108 twarski puć natwarić, zbytki štomow wotstronić, sanitarne kontejnery nastajić a skłoniny zawěsćić. Twarske dźěła su spočatk tohole tydźenja zahajili.
Při zapadnym pobrjoze Šibojskeho jězora matej přichodnje wočerstwjenje a turizm w srjedźišću stać. Hižo wot 2023 hač do 2025 su wulke parkowanišćo, hrajkanišćo a sanitarne připrawy zhotowili. 685 hektarow wulki Šibojski jězor je takrjec domjacy jězor města Wojerecy. Wot lěta 2017 móžeš so při zapadnym pobrjoze kupać. Po 13 kilometrow dołhim kołopuću móžeš derje kolesować a skatować. Město Wojerecy wuda za wuwiće jězora dohromady nimale 30 milionow eurow. Najwjetši dźěl z toho su spěchowanske srědki z hornca za strukturnu změnu.
Kula Bula do nazymy koncertowała
Njebjelčicy. W nimale połnje wobsadźenej Njebjelčanskej „Bjesadźe“ dožiwi njedźelu wjace hač 80 wopytowarjow ze wsy a wokoliny dalši nazymski koncert. Organizowała je jón projektowa managerka Domowiny Katrin Młynkowa a spěchował je jón Załožba za serbski lud. Delnjoserbska skupina Kula Bula, w kotrejž hraje nimo Delnjoserbow – pochadźacych mjez druhim z Depska a Zabroda – Hornjoserb Joachim Jurenc z Pančic-Kukowa sobu, zahori přitomnych w nimale dwuhodźinskim koncerće. Z wulkotnej swingowej, jazzowej, folklornej a filmowej hudźbu pozbudźowaše k rejowanju a zbudźeše žiwu naladu.
