Na krajnej domchowance zhromadnosć wjesneho žiwjenja ...
Kak zhromadne žiwjenje we wjesnych kónčinach funguje, je 26. sakska krajna domchowanka we Wojerecach pokazała. Wjacore zarjadowanja su tole minjeny kónc tydźenja wotbłyšćowali.
Krótkopowěsće (15.09.25)
Scholze kandidaturu cofnył
Njeswačidło. Jenički kandidat za wólby hłownohamtskeho wjesnjanosty w Njeswačidle je pjatk swoju kandidaturu cofnył. Martin Scholze z Bóšic bě w prěnim wólbnym kole z 48 proc. trěbnu absolutnu wjetšinu skomdźił. K druhemu kołu njedźelu, 28. septembra, wón hižo njenastupi. Kaž nawodnica wólbow Katrin Ullrich wobkrući, dóstanu wolerjo prózdnu wólbnu cedlku a smědźa – kaž w prěnim kole – mjeno napisać. Tehdom je Juliane Mazalla z Łuha ze 105 hłosami najlěpši wuslědk wšěch 56 wosobow docpěła, kotrež buchu napisane. Wjele hłosow bě njepłaćiwych, dokelž njejsu ludźo nimo předmjena a swójbneho mjena wjesku napisali. Scholze njebě drje za sebje wabił, wjele ludźi pak jeho znaje, tež jako wobdźělnika demonstracijow při B 96.
Kowar znowa w předsydstwje
Wustajeńca wo serbskim inženjerje
Njedźelu do muzeja
Budyšin. Njedźelu, na Dnju wotewrjeneho pomnika, předstaji wuměłča Carla Pohl w 15 hodź. w Serbskim muzeju wuslědki swojeje dźěławosće. Jako digitalnu prezentaciju projekta „Korjenje zemje – stražowarki ze Slepoho“ pokazaja tam portrety žonow, kotrychž region charakterizuja hórnistwo, změna strukturow a zhubjenje serbskeje rěče a kultury. Muzej je tón dźeń wot 10 do 18 hodź. wotewrjeny a zastup je darmotny.
Prěni přednošk po přestawce
Budyšin. Po lětnjej přestawce zahaji stawizniska sekcija Maćicy Serbskeje zaso swój rjad přednoškow we wobłuku Maćičneje akademije. Na prěni přednošk w nowej sezonje přeprošuja wšitkich zajimcow srjedu, 17. septembra, do žurle Serbskeho domu w Budyšinje. Referent dr. Franc Šěn porěči wo temje „Prěni lětdźesatk nakładnistwa Maćicy Serbskeje. Projekty, problemy, wunoški“. Započatk je w 19 hodź. Hižo wot 18.30 hodź. wotměje so na samsnym městnje wurjadna hłowna zhromadźizna Maćicy Serbskeje.
Tafla za zamordowane žony
Nowy poskitk w klóštrje
Pančicy-Kukow. Z „Wječorom swětła za přećelow“, kotryž 20. septembra w klóšterskej kofejowni swj. Michała swoju premjeru woswjeći, rozšěri kruh přećelow klóštra Marijina hwězda w Pančicach-Kukowje swój poskitk zarjadowanjow. „Prěni raz zwažimy so z tym na wječorne zarjadowanje. Tak ma so naš přećelski kruh hišće atraktiwniši za našich čłonow stać. Runočasnje chcemy z tutym formatom ludźi narěčeć, kotřiž nas snano hišće tak derje njeznaja, ale so z klóštrom zwjazani čuja“, wuswětla předsyda kruha přećelow Alojs Mikławšk.
Na premjerje smědźa so hosćo na přednoškaj direktora Drježdźanskeho Zeleneho wjelba dr. Mariusa Winzelera a sotry Tadeje wo klóštrje a jeho jandźelach wjeselić. Nimo toho předstaja cyle wosebiteho małeho jandźela, kotrehož restawrowanje chce přećelski kruh rady z pomocu mnohich darow financować. A wězo budźe tež wjele informacijow kołowokoło dźěła přećelskeho kruha.
Drjewo tónraz w srjedźišću wikow
Stróža (SN/MWj). Tradicionalne němsko-serbske nazymske wiki přirody wotměja so jutře, sobotu, na dworje zarjadnistwa biosferoweho rezerwata Hornjołužiska hola a haty w Stróži pola Hućiny. Wot 10 do 17 hodź. domizniske towarstwo Radiška a zarjadnistwo biosferoweho rezerwata na pisane wiki přeprošujetej.
Wjace hač 80 regionalnych producentow předstaji šěroki poskitk sezonalnych žiwidłow a rjemjeslniskich wudźěłkow. Wopytowarjo smědźa někotrym wikowarjam přez ramjo hladać a wobkedźbować, kak woni kosu klepaja, truža abo wołmu předźěłaja. Wězo budźe tež dosć poskitka jědźe a napojow. Ratarjo, hatarjo a hosćencarjo chcedźa šěroki kulinariski spektrum ryby, twarožka, kołbasy a poliwkow poskićeć.
Trjeba město dalše kupnicy?
We Wojerecach znowa wo koncepće drobnowikowanja diskutowali
Wojerecy (KD/SN). Maja w bywšim Wojerowskim bydlenskim kompleksu IX blisko zwjazkoweje dróhi B 97 zaso bydlenja za něhdźe 250 ludźi a nakupowanišćo „Nowa Kinajchtska hola“ nastać? A što woznamjenjeja 4 000 kwadratnych metrow wjace předawanskeje płoniny za nakupowanišćo Treff 8 napřećo klinice Łužiska jězorina a za tamne měšćanske nakupowanišća? Z tutymaj a z dalšimi prašenjemi zaběra so koncept drobnowikowanja, kiž je město loni zhotowić dało. Zdźěłałoj stej jón poradźowanskej předewzaći Drees & Sommer a BBE. Minjene dny su druhi raz z wobydlerjemi wo tym diskutowali.
Krótkopowěsće (12.09.25)
Naprašowanje zahajili
Budyšin. Budyska Allendowa štwórć ma so wožiwić, dale wuwiwać a porjeńšić. Měšćanski zarjad je nětko anonymne naprašowanje zahajił, kotrež je mjez druhim w rušćinje a arabšćinje přistupne. W naprašowanju na internetnej stronje www.mitdenken.sachsen.de/1056903 su konkretne prašenja wo měšćanskej štwórći podate. Hač do 27. septembra móža je zajimcy wupjelnić.
Prezentuje so wospjet w Praze
Praha. Z postrowom zahaji dźensa sakska ministerka za kulturu a turizm Barbara Klepsch lětni swjedźeń Kontaktneho běrowa Swobodneho stata Sakska w Praze. Zarjadowanje, na kotrymž so sakska kultura a hospodarstwo w čěskej stolicy prezentujetej, wotměwa so jónu wob lěto. Partneraj stej lětsa wokrjes Šwikawa a turistiski zwjazk regiona Kamjenica-Šwikawa. Sakska a Čěska mjez sobu nadal wuske styki pěstujetej, štož swjedźeń w Praze wospjet symbolizuje.
Wojerska pomoc Pólskej
Axel Thielman čita stawizny a stawiznički z domizny
Mjezybilanca pozitiwna
Hamorska gmejna z ličbu přenocowanjow spokojom
Hamor (AK/SN). W turistiskim wobłuku je bilanca prěnjeho połlěta 2025 Hamorskeje gmejny pozitiwna. Tole wuzběhny wjesnjanosta Hendryk Balko (Hamorske wolerske zjednoćenstwo) póndźelu na posedźenju gmejnskeje rady. Statistika zapřija 14 městnow přenocowanja z dohromady 428 hóstnymi łožemi. Hač do 30. junija zličichu tam 23 819 přenocowanjow. Tuta ličba wopřija tež přenocowanja na stanowanišćach. To je 2,5 procentow wjace hač w prěnim połlěće 2024. Přerěznje přebywaja wopytowarjo při Bjerwałdskim jězoru tři dny. To je runje telko kaž loni.
