Serbskich wučerjow wukubłał
Wjace pjenjez wohnjowym wobornikam schwalene
Rakecy (JK/SN). Rakečanska gmejna je dóstała z budgeta za „Komunalnu energiju a klimu“ Swobodneho stata Sakskeje připokazanku we wobjimje 20 000 eurow. Pozadk připokazanki wujasni wjesnjanosta Swen Nowotny (CDU) na zašłym posedźenju gmejnskeje rady z tym, zo je Zwjazk krajam přepodał pjenjezy za komunalne projekty nastupajo energiju a klimu. Sakska dósta z toho budgeta dwaj milionaj eurow. Połojca toho nałožuja za nadawki kraja, tamnu połojcu rozdźělichu na komuny. Z tym je tež Rakečanska gmejna něšto dóstała. Mjenowana suma hodźi so aktualnje do instalacije fotowoltaikoweje připrawy na třěše Rakečanskeje radnicy inwestować. Radźićeljo tele postupowanje jednohłósnje schwalichu.
Syriski lěkar prěni raz wustaja
We Łazowskim Domje Zejlerja a Smolerja su pjatk nowu wustajeńcu wotewrěli. W njej widźeć su wobrazy Badieja Makhloufa z Běłeho Chołmca, předstajace krajiny, zwěrjata a ludźi.
Łaz (AK/SN). Zo bydli w Běłym Chołmcu lěkar Badie Makhlouf, kiž bě wjele lět chirurg we Wojerowskim łužiskim klinikumje a je nětko wuměnkar, je mnohim ludźom tamnišeje wokoliny znate. Zo pak rodźeny Syričan tež z wulkej radosću a wušiknje moluje, wědźa wot minjeneho pjatka wšitcy ći, kotřiž su wotewrjenje noweje wustajeńcy we Łazowskim Domje Zejlerja a Smolerja sobu dožiwili. Tam wustaja Badie Makhlouf wuběr swojich akrylowych mólbow, kotrež su zašłe lěta nastali.
Lubosć k molowanju je 69lětny hižo jako dźěćo spóznał. Wotrostł je wón w syriskim měsće Latakia při Srjedźnym morju. Tam je jabłuka, ryby a dalše motiwy takrjec do powětra molował. „Mojej staršej staj mój zajim za molowanje sčasom spěchowałoj“, wón powěda. Prěnja prawa rysowanka nasta z wołojnikom a pokaza čakacu holcu při woknje.
Sedmjo wot spočatka pódla
W Slepom 25. raz wiki jutrownych jejkow přewjedli
Slepo (JoS/SN). Lětuše wiki jutrownych jejkow w Slepjanskim Serbskim kulturnym centrumje (SKC) běchu wosebite. Wone wotměchu so 25. raz. Korony dla drje dyrbjachu je dwójce wupadnyć dać, to pak njebě na škodu tradicionalneho zarjadowanja. Nawopak. Zajim wopytowarjow minjeny kónc tydźenja bě wulki kaž na wšitkich dotalnych wikach. Dohromady zličichu 4 000 wopytowarjow.
Prěnje wiki jutrownych jejkow wotměchu so w lěće wotewrjenja kulturneho centruma 1998. Tak dołho tež Sylvia a Panošina SKC nawjeduje. W lětach do toho so wona druhdźe na tajkich wikach wobdźěleše a so rozsudźi, tajke něšto tež w Slepom organizować. Na wsach Slepjanskeho regiona dźě ma debjenje jutrownych jejkow wosebitu tradiciju, kotruž chcychu wopytowarjam a hosćom zbližić. To zwjazachu z kulturnymi přinoškami chórow a ansamblow.
Krótkopowěsće (18.03.24)
Kubłanske doporučenja
Drježdźany. Po wuprajenju kultusoweho ministerstwa přibliža so ličby kubłanskich doporučenjow aktualnje zaso niwowej do koronoweje pandemije. Tak dóstachu k połlětu 51 proc. šulerkow a šulerjow doporučenje za gymnazij a 49 proc. za wyšu šulu. 2019 a 2020 ležeše procentualny podźěl pola 48 za gymnazij a 51 za wyšu šulu. Za čas koronoweje pandemije wuda so wjace kubłanskich doporučenjow za gymnazij.
Deklaraciju zaměrow podpisali
Žitawa. Sakski ministerski prezident Michael Kretschmer (CDU) je so sobotu z maršalom wojewódstwa Delnja Šleska kaž tež z hejtmanom regiona Liberec w Žitawje zetkał. Woni su deklaraciju zaměrow nastupajo mjezy překročacu kooperaciju w procesach změny strukturow w róžku třoch krajow podpisali.
SmartGuide při pućowanju
Biografiju wo spisowaćelce předstajił
20 lět awtomatiska technika wohenje spóznawa
Wojerecy (KD/SN). Tež hdyž wonkownje hišće ničo na to njepokazuje, móže we łužiskich chójnowych lěsach z jich suchej a pěskojtej pódu kóždy čas lěsny woheń wudyrić. Sobudźěłaćerjo lěsnistwa dyrbja tuž kaž kóžde lěto situaciju a koordinaty lěsneho wohenja spěšnje spóznać móc, zo móhli wohnjowi wobornicy woheń zaměrnje hašeć. Jenož tak hodźi so wjetšim škodam za ludźi a přirodu zadźěwać. Tole wuzběhnyštaj Wojerowski měšćanosta Mirko Pink a nawoda dispatchernje Stefan Schumann srjedu we Wojerowskej centralnej dispatcherni. Mjeztym 20 lět wužiwaja tam awtomatiski spóznawanski system lěsnych wohenjow (AWFS).
Policija (15.03.24)
Wobhrodźenje skóncował
Rakecy. Wěcna škoda we wobjimje něhdźe 3 000 eurow je wutoru popołdnju při wobchadnym njezbožu w Rakecach nastała. Nakładna awto jědźeše ze směra B 96 po Dwórnišćowej. Jako šofer nalěwo wotboči, šmórny so zadni dźěl jězdźidła wobhrodźenja, kotrež ma pěškow před nimo jěducymi awtami škitać. Na zbožo so žane wosoby zranili njejsu. Wodźer nakładneho awta dyrbi pokutny pjenjez zapłaćić, kaž Zhorjelska policajska direkcija informuje.
Kołbaski w srjedźišću
Na zhromadne dźěło z nawodu zwjazka zhladowali
Radwor (SN/MkWj). Bilancu swojeho zhromadneho dźěła z Radworskej gmejnu sćahnył je dotalny předsyda wopłóčkoweho zwjazka „Mała Sprjewja“ na posedźenju tamnišeje gmejnskeje rady předwčerawšim, srjedu. Andreas Skomudek, wot lěta 2012 nawoda wopłóčkoweho zwjazka, poda so 1. junija na wuměnk. Natwar centralneje syće wopłóčkow w Radworju bě wažny wobstatk dźěła bywšeho Hućinjanskeho wjesnjanosty.
Wotpowědnje swojim dožiwjenjam rozprawješe Skomudek dosć nadrobnje wo realizowanju 2013 zahajeneho twara centralneje syće wopłóčkow, kotraž je wšo dohromady wjace hač jědnaće milionow eurow płaćiła. Dźensa moderna připrawa wopłóčki na kromje Młynskich chěžow rjedźi. Skomudek předstaji radźićelam a hosćom 46lětneho Swena Jatzkeho jako swojeho naslědnika. Tón je sej toho wědomy, zo dalše naročne projekty na njeho čakaja.
Debatowali su wo njerozrisanym problemje busoweho wobchada po wuskich gmejnskich dróhach a wo njespokojacej rozmołwje ze zamołwitymi wobchadneho zwjazka. Schwalili su zhromadny koncept regionalneho wuwića z Malešanskej a Wulkodubrawskej gmejnu.
