Dokelž je Wojerowska wyša šula w minjenych lětach wulku ličbu šulerjow přidatnje přiwzała, maja tam rumnostne problemy. Z wjetšej twarskej naprawu chcedźa je rozrisać.

Wojerecy (AK/SN). Spočatk šulskeho lěta 2020/2021 wotewrjenu Wojerowsku ­wyšu šulu z přitwarom rozšěrja. Twarski nadawk je wjetšina měšćanska rada ­wutoru přepodała. Dwuposchodowy twar, wobstejacy z přihotowanych modulow, budźe twarske předewzaće z města Wissen w Porynsko-Pfalcy natwarić. W meji chcedźa twarić započeć. „Nadźijamy so, zo budźe twar hač do februara 2026 hotowy. Hač do lěća 2026 slěduja wonkowne připrawy“, praji twarski zamołwity města Wojerecy Dietmar Wolf. Projekt płaći dohromady 3,5 milionow eurow. Jednu połojcu zapłaći město ­Wojerecy, tamnu Swobodny stat Sakska spěchuje.