Sposrědkuja rěč a kulturu
Wojerecy (KD/SN). Popołdnjo za swójby Wojerowskeje župy „Handrij Zejler“ sposrědkuje hižo dlěši čas młódšim a staršim wopytowarjam serbsku rěč a kulturu dwurěčneje Łužicy. Z tymle zaměrom wopytuja čestnohamtscy akterojo stajnje rozdźělne městna w regionje. Tak běchu hižo w Ćisku a Kulowje, rozprawja co-županka Gabriela Linakowa. Minjenu njedźelu wotmě so tajke popołdnjo za swójby w „La Galeria“ w Němcach.
Spočatnje holcy a hólcy Němčanskeje Witaj-pěstowarnje Pumpot nazornje pokazachu, kelko serbskeho su z pomocu metody dospołneje imersije hižo nawuknyli. Jedyn z jich spěwow jednaše wo žiwjenju husaceje swójby w běhu lěta. W dalšej – dwurěčnej – pěsni předstajichu wšelake powołanja. Starši, dźědojo a wowki so wočiwidnje nad wuspěchami swojich małych lubuškow wjeselachu. Předewšěm dźěći z dwurěčnych swójbow z pomocu Witaj-koncepta rěč a kulturu swojich prjedownikow nawuknu, rozłoži młoda mać Katharina Korchowa.
Nuk: Njetrjebamy pesimistiscy być
Drježdźany/Budyšin (SN/mb). Domowina bě CDU, BSW a SPD sposrědkowała wulki katalog žadanjow serbskeho ludu na koaliciske jednanja (SN su je dospołnje dokumentowali). Tola po tym, zo je BSW sonděrowanje mjez tutymi třomi stronami nahle skónčił, tajka koalicija njebudźe. Nětko drje CDU z SPD dale jedna, ale wšojedne, štož budu na kóncu do koaliciskeho zrěčenja pisać: Přichodne mjeńšinowe knježerstwo budźe za wšo, štož so kompetency krajneho sejma dótka, znajmjeńša dźesać zapósłancow druhich frakcijow přeswědčić dyrbjeć. Serbski abo šulski zakoń na přikład móžeš jenož po tutym puću změnić.
Krótkopowěsće (12.11.24)
Přechodne rozrisanje našli
Kamjenc. Spěchowanska šula w Bambruchu wot jutřišeho přechodnje do Kamjenskeho Lessingoweho gymnazija přećehnje. Tole su zamołwići zastupjerjo Budyskeho wokrjesa z krajnym zarjadom za šule a kubłanje a šulskim nawodu organizowali. Šulerjo změja tuž wot jutřišeho zaso prezencnu wučbu. Na twarskich dźěłach při woknach su dźěłaćerjo minjeny tydźeń škódnu maćiznu zwěsćili, čehoždla njebě twarjenje šule hižo přistupne.
Tunl jutře dospołnje zawrjeny
Budyšin. Tunl zwjazkoweje awtodróhi A4 pod Limasom jutře wot 8 do 17 hodźin dospołnje zawru. Přičina toho su hladanske dźěła. Wobchad chcedźa zamołwići po znatych wobjězdkach wodźić. Dźěłaćerjo tunl tuchwilu saněruja. Tohodla je jedna z dweju čarow zašlahana. Jutře pak stej wobě čarje potrjechenej.
Wjele přidružnikow přistajili
Policija (11.11.24)
Lochkomyslnosće dla lawbu přisadźił
Lubij. Palaceje lawby dla chwatachu sobotu wječor zastojnicy Lubijskeje wohnjoweje wobory kaž tež policije k zahrodce na dróze Martina Luthera. 36lětny muž běše tam w swojich kachlach bjezposrědnje pódla lawby mjaso abo rybu kurił, so pak potom na dlěši čas wotsalił. Jako so nawróći, so lawba hižo mócnje paleše. Dohromady 32 wobornikow płomjenja zhašachu. Cyłkowna škoda wučinja něhdźe 2 000 eurow.
Hižo wčera „pjaty počas“ zahajili
Na přednošk „Lóšo wuknyć“
Smjerdźaca. Serbske šulske towarstwo přeprošuje wšitkich zajimcow na přednošk wo temje „Lóšo wuknyć“, a to jutře, 12. nowembra, we 18.30 hodź. do Serbskeho kubłanskeho srjedźišća LIPA w Smjerdźacej. Tema je wosebje za staršich dźěći w předšulskej starobje zajimawa. Wuknjenska poradźowarka Kerstin Šěnowa předstaji móžnosće spěchowanja wuknjenja. Wobdźělenje płaći dźesać eurow na wosobu.
Gmejnska rada w Radworju
Radwor. Wjesnjanostka Radworskeje gmejny Madeleine Renčowa přeprošuje srjedu, 13. nowembra, na zjawne posedźenje gmejnskeje rady. Wone wotměje so tónraz w domje gmejnskeho zarjada w Radworju na Dróze Alojsa Andrickeho čo. 2 we 18.30 hodź. Na dnjowym porjedźe steji mjez druhim wobzamknjenje wo wužiwanju směrnicow w zwisku z płoninami za fotowoltaikowe připrawy na gmejnskim teritoriju.
Młoda awtorka z hosćom
Z wotměnjawym programom zahoriłoj
Hórki (MiJ/SN). Minjenu sobotu je Domowina na dalši nazymski koncert přeprosyła, tónraz do Hórkow. Wuhotowałoj stej jón spěwarce Weronika Kalinučcyna ze Žičeńka a Hanka Wowčerjowa z Kozarc – a to pod mjenom indiwiDUAL. Wjace hač 50 wopytowarjow běše na Smolic statok přichwatało. ,,Naša hudźba je jara indiwiduelna, a dokelž smój dwě, smój so za mjeno ,,indiwiDUAL“ rozsudźiłoj, Weronika Kalinučcyna spočatnje rozłoži. Zwjetša spěwaštej kuzinje zhromadnje, zwjetša Hanka Wowčerjowa tamnu k spěwej na klawěrje přewodźeše.
„Budźće dale solidarni!“
Sylna namołwa k dalšej pomocy za Ukrainu na beneficnym koncerće
Budyšin (CRM/SN). Hižo štwórć hodźiny do započatka zakónčaceho koncerta Budyskeje chóroweje akademije generacijow běchu sobotu nawječor w Cyrkwi Marije a Marty nimale wšitke městna wobsadźene – tak sylny wothłós měješe tutón mjeztym štwórty ewent, kotryž steji pod patronatom Budyskeho Rotary-Cluba a měšćanskeho zarjada. Pod nawodom cyrkwinskohudźbneho direktora na wuměnku Friedemanna Böhme běše 60 spěwarkow a spěwarjow w starobje 16 do 78 lět tydźensce zwučowało, zo móhli naročny program předstajić. Sobuskutkowacym přisłušeštaj tež profilowana sopranistka Romy Petrick a młody wobhnadźeny organist Johannes Krahl.
Předšulske dźěći redakciju překwapili
Krótkopowěsće (11.11.24)
Knježerstwo bjez wjetšiny
Drježdźany. Prěni raz po nowozałoženju Sakskeje 1990 dóstanje swobodny stat mjeńšinowe knježerstwo: CDU je kónc tydźenja rozsudźiła, po wustupje BSW z jednanjow spytać, koaliciju jeničce z SPD tworić. Jeli so to njeradźi, by CDU sama knježiła, kaž frakciski předsyda strony Christian Hartmann w „Sachsenspiegel“ telewizije MDR praješe (čitajće prošu dale na 2. stronje).
Na pogromowu nóc spominali
Zhorjelc. Towarstwa, iniciatiwy a angažowani wobydlerjo Sakskeje su zawčerawšim na namóc přećiwo Židam w pogromowej nocy 9. nowembra 1938 spominali. Mjez druhim w Zhorjelcu zarjadowachu nyšpor w cyrkwi Našeje knjenje. Tam wopominachu přitomni tež powalenje murje 9. nowembra 1989. Po nyšporje běžachu ludźo ze swěčkami ke kulturnemu forumej Zhorjelskeje synagogi.
Jězdźenki su darmotne
