Woda w Budyskim spjatym jězoru je ­tuchwilu njewšědnje niłka. Tutón fakt wužiwa sakski krajny zarjad rěčnych ­zawěrow (LTV) za přepruwowanje ­techniskich systemow rěčnych zawěrow před jězorom.

Budyšin/Wownjow (UM/SN). Čiłe twarske dźěła dožiwiš w tutych dnjach, hdyž pućuješ přez móst za pěškow, kotryž wjedźe mjez Budyskimaj měšćanskimaj dźělomaj Wownjowom (Oehna) a Bórkom přez rěčnu zawěru před Budyskim spjatym jězorom. Na naprašowanje zdźěli nawoda wobłuka Sprjewja/Nysa pola LTV Stefan Jentsch: „Přewjedujemy tuchwilu přepruwowanske dźěła. Podobnje TÜV-pruwowanju za awta tež my swoje připrawy prawidłownje kontrolujemy“. K tomu słušeja připrawy z wocla, techniske připra­wy a twary z betona. Tež mostaj na krutosć přepytuja. „Po wuhódnoćenju wuslědkow potom postajimy, hač dyrbimy objekty saněrować“, přispomni Jentsch.

Ruban-Zeh w rjedźe „Prašej so wyšeho měšćanosty“ z młodostnymi rěčał

Wojerecy (KD/SN). „Wojerowska mło­dźina sej w našim měsće swój přichod twori. Tak dyrbjało być. Tola mnozy du na wukubłanje abo na studij do cuzby a so chiba hakle po lětdźesatkach nawróća. To je městu na škodu“ – tutón fakt zwurazni Wojerowski wyši měšćanosta Torsten Ruban-Zeh (SPD) póndźelu na wurjadnym za­rjadowanju w rjedźe „Prašej so wyšeho měšćanosty“ w měšćanskej bibliotece. Wón skedźbni hosći – přewažnje młodostnych a w mło­dźinskich zarjadnišćach skutkowacych fachowcow – na to, zo w regionje runje nětko 6 000 nowych dźěłowych městnow nastawa. Z přitomnymi su zastu­pjerjo měšćanskeho zarjadnistwa kaž tež měšćanskeje wědomostneje přirady za kubłanje rozjimali, pod kotrymi wuměnjenjemi by wjace młodostnych we Wojerecach wostało.

Próstwje wotpowědowało

Radwor. Radworska gmejna smě dalše tři lěta městno klimoweho managera wobsadźić. Próstwje gmejny wo spěchowanje městna je zwjazkowe ministerstwo za hospodarstwo a energiju wotpowědało. Mjeztym dwě lěće Marcel Bellmann nadawki wukonja. Tuchwilu dźěła wón zaměrnje na tym, w gmejnje energijowu towaršnosć załožić. Dale zaběra so wón z tym, kak móhli wjeski gmejny z ćopłotu zastarać.

Wjace pjenjez zwěrjatownjam

Drježdźany. Zwěrjatownje w Sakskej dóstanu w přichodźe wjace pjenjezy. Tole je sakski kabinet wobzamknył, zdźěli wčera ministerstwo za strowotnistwo a socialne Swobodneho stata. Spěchowanske srědki maja wob lěto wot dotal 1,3 miliony eurow na dwaj milionaj eurow stupać. Sakske knježerstwo hódnoći tak zamołwitosć zwěrjatownjow, kotrež wažny nadawk towaršnosće wukonjeja.

Ukrainsku chorhoj paruja

Liška njezbožo zawiniła

Załom nad Sprjewju. 18lětna młodostna běše njedźelu wječor ze swojim awtom marki Opel na B98 na směr Wołbramecy (Steinigtwolmsdorf) po puću. Blisko Wjernarjec (Wehrsdorf) njejapcy liška na jězdnju skoči. Młoda žona spěšnje reagowaše a borzdźeše. Za njej jěduca 19lětna šoferka pak njezamó ze swojim awtom marki Škoda sčasom borzdźić a do Opela zrazy. Wona so lochce zrani – liška pak wućekny njezranjena. Wěcna škoda wučinja něhdźe 15 000 eurow.

Frontalna zražka z třomi zranjenymi

Zemicy-Tumicy. Na křižowanišću we Wjelkowje (Wölkau) stej póndźelu dopołdnja dwě wosobowej awće frontalnje do so zrazyłoj. 18lětna šoferka Audija běše po Budyskej dróze na směr Biskopicy po puću. Na křižowanišću z Delnjowujězdźanskej dróhu chcyše młoda žona na­lěwo do směra Zemic-Tumic wotbočić. Přewidźa pak napřećo jěduce awto marki Škoda a do njeho zrazy. Při njezbožu so šoferka Škody, šoferka kaž tež 17lětny ­sobujěducy Audija lochce zranichu a dyrbjachu na přepytowanje do chorownje. Wěcna škoda wučinja něhdźe 30 000 ­eurow.