Policija (29.08.24)
Njesćerpnosće dla njezbožo zawiniłoj
Słona Boršć. Wopačne zadźerženje w situaciji kopjenja wobchada je wutoru rano njezbožo na zwjazkowej awtodróze A 4 zawinowało. 71lětny muž běše ze swojim wosobowym awtom typa Audi do směra Zhorjelc po puću. Před wotjězdku Budyšin-zapad kopješe so njezboža dla wobchad. Šofer Audija pak nochcyše čakać a zajědźe na za wobchad zakazane bóčne pasmo, zo by dale jěć móhł. Tohorunja njesćerpny běše 46lětny němski šofer, kotryž ze swojim awtom typa Tesla w kolonje steješe a na zakazane pasmo wujědźe. Tak zrazy do bližaceho so Audija. Zranił so při njezbožu nichtó njeje. Nasta pak wěcna škoda w rozměrje něhdźe 25 000 eurow. Wobaj šoferaj mataj so tohodla nětko zakazaneho wužiwanja bóčneho pasma dla před sudnistwom zamołwić.
Wuhotuja 31. raz jěchanski turněr
We wuhotowanju mišterstwow su čłonojo Konjaceho sportoweho towarstwa „Při Klóšterskej wodźe“ z Pančic-Kukowa kołowokoło předsydki Sandry Berndtoweje mjeztym sami mištrojo, wšako su lětsa hižo 31. raz z hosćićelom sakskeho mišterstwa w mnohostronskim jěchanju na arealu při Hórčanskim stadionje.
Nimo sakskeho mišterstwa młodych jěcharjow U 21 pak přewjedźe so tón raz tež wubědźowanje krajow w nowej kategoriji. Zhromadnje z dalšimi jěchanskimi towarstwami z wuchodneje Němskeje chcedźa tutón kónc tydźenja prěnje Wuchodoněmske mišterstwo za jednotliwcow a prěnje Wuchodoněmske mišterstwo za mustwa wuhotować. W tutymaj wubědźuja so jěcharjo z Berlina, Braniborskeje, Sakskeje, Durinskeje, Saksko-Anhaltskeje a Mecklenburgsko-Předpomorskeje. „Zaměr wubědźowanjow je, zo so jenož lěpje mjez sobu njezeznajomnimy, ale zo našim jěcharskim hosćom z druhich kónčin Němskeje pokazamy, kotre dobre wuměnjenja tu w krasnej krajinje Hornjeje Łužicy za jěchanski sport mamy“, praji organizator Pětr Bobka.
Ideje do přichoda nazběrali
Studenća Drježdźanskeje TU so z wuwiwanjom města Wojerecy rozestajeli
Wojerecy (AK/SN). Wojerecy móža so na zelene, ekologisce hospodarjace, do přichoda kmane město wuwić, nic naposledk z podpěru angažowanych měšćanow. To běše facit tamnišeje lětušeje mjezynarodneje lěćneje šule. Pod wodźacej temu „Skutkowne wuwiwanje města w změnje strukturow“ naćisny něhdźe 20 wobdźělnikow-studentow swoje ideje. Nošer projekta je město Wojerecy. Sakske ministerstwo za regionalne wuwiće je jón ze 160 000 eurami spěchowało. Hromadźe z partnerami, mjez nimi su TU Drježdźany, Institut Leibnitza za ekologiske wuwiwanje rumow abo Łužiski centrum technologije, organizowachu zamołwići města tutón tydźeń. Wobdźělnicy pochadźachu z Němskeje, Italskeje, Indiskeje, Chiny, Ugandy, Ghany a dalšich krajow. Woni studowachu w slědowacych fachowych wobłukach: wuwiwanje rumow/management přirodnych resursow, ekologiske systemy, architektura krajiny abo wodarstwo (Wasserwirtschaft).
Krótkopowěsće (29.08.24)
Wučerjo njech so požadaja
Budyšin. Předsydstwo Serbskeho šulskeho towarstwa (SŠT) namołwja serbskich wučerjow so požadać wo aktualnje wupisane dźěłowe městna. To su mjez druhim městno koordinatora za serbske naležnosće w krajnym zarjedźe za šulu a kubłanje (LaSuB) a wjednistwje Serbskeju zakładneju šulow Chrósćicy a Budyšin. Kaž předsydka SŠT Katharina Jurkowa zdźěli, móža so zajimcy z prašenjemi na SŠT wobroćić.
Braniborska přewza jězory
Podstupim/Zły Komorow. Kraj Braniborska je předwčerawšim mjezywužiwanske zrěčenje z Łužiskej a srjedźoněmskej towaršnosću hórnistwoweho zarjadnistwa (LMBV) za štyri jězory Łužiskeje jězoriny podpisała. Su to: Sedlišćanski a Rański jězor kaž tež braniborskej dźělej Parcowskeho a Lejnjanskeho jězora. Zrěčenje je zakład za wotewrjenje a wužiwanje jězorow wot lěta 2026.
Rakety měli Rusow zamylić
Na stajne serbske blido
Slepo. Rěčna motiwatorka projekta Domowiny ZARI Juliana Kaulfürstowa přeprošuje wšitkich, kotřiž maja zajim na serbskej rěči a kulturje, na stajne serbske blido w Slepjanskej piwarni při hosćencu Sportlerklause. Zarjadowanje wotměje so jutře, dnja 29. awgusta, w 20 hodź.
Štwórte zeńdźenje chórow
Čorny Chołmc. W Krabatowym młynje w Čornym Chołmcu zeńdu so njedźelu, 1. septembra, w 15 hodź. štwórty raz tradicionalnje chóry. Wšelake spěwne ćělesa z wokoliny wuhotuja wotměnjawy program. Wot 14 hodź. so wrota młyna publikumej wotewru. Zastupny lisćik za dorosćenych płaći tři, zniženy 1,50 eurow.
Pisany swjedźeń rěče
Slepo. Syć za serbsku rěč a regionalnu identitu ZARI přeprošuje dnja 19. septembra wot 15.30 hodź na rěčny swjedźeń do Slepo. Na farskej ležownosći poskićuja organizatorojo hudźbu, filmy, čitanje bajow, wustajeńcu a paslenski róžk k temje „pčołka“. Wopytowarjo móža słuchopisak BOOKii zeznać a so w serbskim kucharskim studiju wuspytać.
Staroměšćanski festiwal zaběži
Z wulkim zajimom so prašeli
Chcedźa krok po kroku rosć
Budyšenjo móža sej nětko na cyle njekomplikowane wašnje awto wupožčić
Budyšin (UM/SN). Tež Budyšin ma nětko carsharing-staciju. Před něšto dnjemi je carsharing-poskićowar TeilAuto nowe stejnišćo za małe a kompaktne awta blisko policajskeho rewěra na Dwórnišćowej zarjadował. „Hižo w lěće 2021 běchu so angažowani wobydlerjo iniciatiwy Carsharing, čłonojo klimoweho zwjazkarstwa a zastupjerjo wšelakich politiskich stron za carsharing-poskitk w Budyšinje zasadźowali. Woni su zajimowanych wužiwarjow narěčeli, informaciske zarjadowanje organizowali kaž tež za móžnymi parkowanišćemi pytali“, tak rozprawja regionalny nawoda předewzaća TeilAuto Martin Schmidt. Wosebje wažny běše tež kontakt z měšćanskim zarjadnistwom, kiž je jeho konstruktiwnje a wulkomyslnje přewodźało.
Eine Gedenktafel für Marie Simon
Nowy etat Wojerec „wužadacy“
Konsolidacija etata, strukturna změna a wuwiće města su ćežišća legislaturneju dobow 2024 a 2029 noweje Wojerowskeje měšćanskeje rady. Wuzwoleny gremij ma 30 čłonow.
Wojerecy (AK/SN). Wojerowski wyši měšćanosta Torsten Ruban-Zeh (SPD) rjekny wutoru na konstituowacym posedźenju gremija: „Přichodny dwójny etat 2025/2026 budźe wužadacy, předewšěm hladajo na čas a rozmyslowanje.“ Wot lěta 2021 pobrachuje městu w etaće 4,6 milion eurow. Dalši milion pobrachuje wot lěta 2023 wokrjesneho wotedawka dla. Nětko trjebaja za konsolidaciju zhromadne mocy. To nastupa tež změnu strukturow. Klětu w nalěću ma so prěni zaryw za slědźenski centrum awtomatizowaneho jězdźenja w Čornym Chołmcu přewjesć. Dwě lěće na to chcedźa Wojerecy zhromadnje z Drježdźanskej techniskej uniwersitu centrum za slědźenje a wědomosć wotewrěć. Za wopytowarjow ma dalša wuhladna platforma we Wojerecach nastać.
Wuběrk za wuwiće města chce zhromadnje z wobydlerjemi nowy koncept za drobnowikowanje wudźěłać a klětu w měrcu 2025 měšćanskej radźe předpołožić. Wyši měšćanosta chce marketingowu strategiju „#WHY!“ zachować.
Łoskoćiwy wotum rozdwoja
Społnomócnjena za wukrajnikow wostanje, abo snano tola nic
Budyšin (SN/MG). Dosćahnu Annu Piętak-Malinowsku při telefonje. Chwile wona nima, je runje po puću na termin. Wo mnohe problemy so wona jako społnomócnjena za wukrajnikow w Budyskim wokrjesu wočiwidnje starosća. Tohodla so jej hač do redakciskeho kónca tež njeporadźi na prašenja wotmołwić. „Tak spěšnje kaž móžno“, wona slubi.
Dźěłowe městno tuteje žony z tak wažnymi nadawkami za wukrajnikow we wokrjesu chce wokrjesny sejmik wotstronić. Na prěnim posedźenju hižo namjetowaše frakcija AfD zastojnstwo šmórnyć, wšako je wone „dobrowólne“. Přihłosowała je tomu wjetšina wokrjesneho sejmika we wuwzaćnje tajnym wothłosowanjom. Jasne je, zo słušachu do tuteje wjetšiny tež radźićeljo druhich frakcijow. Žórła we wokrjesnym sejmiku rozprawjeja, zo běchu mjez nimi radźićeljo prawicarsko-ekstremistiskeje strony zwjazk Hornja Łužica/ Swobodni Saksojo, ale tež CDU. Zjawna kritika na rozsudźe bě a je wulka.
