Mam projekt za wuběrny dyrdomdej (10)
Domowina je spočatk apryla we Wulkich Zdźarach rěčny projekt DOMOJ zahajiła. To je intensiwny kurs serbšćiny, kotryž dźewjeć měsacow traje. Dohromady dwanaće wobdźělnikow wuknje zhromadnje w tak mjenowanym rěčnym hnězdźe. Woni so w našim wječorniku předstajeja. Jana Šlechtová z Budyšina měni, zo je so na prawy dyrdomdej podała.
Rěkam Jana Šlechtová a we Łužicy bydlu hižo wosme lěto. Za mój přećah do Budyšina su bjezdwěla Chróšćanscy muzikanća zamołwići, kiž běchu před něhdźe dźesać lětami do Štětí (Čěska) na hudźbny festiwal přijěli. Tam sym so něšto dnjow jako přewodnica wo nich starała. Su mje wuzwolili, kapału „z Němskeje“ přewodźeć, ale cyły kónc tydźenja njejsmy ani němske słowo rěčeli. Na to jědźech husćišo do Budyšina na wopyt, doniž njenasta z lubosće k hudźbje serbskeje kapały rjane mandźelstwo a šikwanej dźěsći Hanka a Józef. Młódši syn Józef chodźi do serbskeje pěstowarnje a naša Hanka je wot lětušeho šulerka w 1. lětniku A-rjadownje w Budyšinje. Na to sym jara horda.
Krótkopowěsće (25.09.25)
Sprjewiny hotel za Ukrainjanow?
Budyšin. Krajnoradny zarjad pruwuje, hač njemóhł Sprjewiny hotel pak za požadarjow wo azyl pak za Ukrainjanow dale wužiwać. To je wčera na naprašowanje našeho wječornika zdźělił. Liča z přichadom tydźensce 40 Ukrainjanow, telko bě jich dotal w běhu měsaca. Přičinje za stupacu ličbu Ukrainjanow stej šmórnjenje socialnych wukonow za nich w Pólskej a rozsud ukrainskeho knježerstwa, zo smědźa 18- do 22lětni mužojo kraj wopušćić.
Přihotuja festiwal dudakow
Slepo. Na wčerawšim posedźenju předsydstwa župy Jakub Lorenc-Zalěski su župnu hłownu zhromadźiznu 29. oktobra přihotowali. Dalšej temje běštej 10. festiwal dudakow wot 19. do 21. junija 2026 a wubědźowanje wo najsłódniši štrajzlowy tykanc 20. nowembra, kotrež chcedźa nimo dalšich projektow přewjesć. Županka Diana Maticowa so čłonam gremija za jich angažement dźakowaše.
Spěchuja wopomnišćo
Stare ležownostne mjena na tafli zachowane
Trjebin (JoS/SN). We wobłuku jubileja Trjebinskeje Domowinskeje skupiny přepodachu minjeny kónc tydźenja zajimawu nowosć. Tam maja nětko taflu z wjesnej kartu a zapisanymi městnymi mjenami. Wotkryłoj stej taflu předsydka Domowinskeje skupiny Angelika Balccyna a Juliana Kaulfürstowa.
Prěni raz je so Trjebin w lěće 1382 pisomnje naspomnił. Jako so prěni ludźo tule zasydlichu, bě kónčina wot hoberskich lěsow wobdata. Ze zasydlenjom bě městno za statoki a domy trěbne. Tuž dyrbjachu lěs trjebić, tak wuwi so skónčnje pomjenowanje wsy. Tež jednotliwe statoki mějachu swoje mjeno a z nim wšitcy wobydlerjo, wšojedne kotre swójbne mjeno su měli. Druhdy dóstachu statoki tež noweho wobsedźerja, ale pomjenowanje statoka wosta samsne.
Přihotuja nowe wustawki
Delanscy radźićeljo wo wjace kompetencach wjesnjanosty diskutowali
Nowoslicy (JK/SN). Hłowne wustawki gmejny Ralbicy-Róžant su z lěta 2005. Wot toho časa so gmejnske zarjadnistwo po nimi ma. Mjeztym wšelake rjadowanja a postajenja hižo načasne njejsu. Tak je předsyda zarjadniskeho zwjazka Při Klóšterskej wodźe Stefan Anders nowe wotrězki a korektury dotalnych paragrafow naćisnył. Při tym je so na zakonske rjadowanja w aktualnych porjadach za gmejny w Sakskej złožował. Wo tym je gmejnska rada wčera w Nowoslicach wuradźowała. Předewšěm diskutowachu wo kompetencach wjesnjanosty. Dotalne móžnosće a swoboda wjesnjanosty chcedźa aktualnym poměram připodobnić. Wobjim sumow, wo kotrychž wjesnjanosta sam rozsudźa, dyrbja na kóždy pad zwyšić, wšako su so hospodarske a poměry płaćiznow wokoło gmejny bytostnje změnili. Z nowymi prawami móže wjesnjanosta spěšnišo a zaměrnišo na wšelake njedostatki reagować.
Policija (24.09.25)
Wjele pjenjez zhubił
Wojerecy. Wobšudnicy su mužej we Wojerecach nimale 41 000 eurow wulišćili. Wón bě pjenjezy na akcijowe konto přepokazał a so wulkeho dobytka nadźijał. Jako chcyše, zo jemu diwidendu wupłaća, sej skućićeljo za to popłatki žadachu. Tež te Wojerowčan přepokaza. Slubjeny dobytk pak wón njedósta. Wosebitosć bě, zo su wobšudnicy z woporom wšón čas kontakt na whatsapp wudźeržowali, kaž policija zdźěli.
Nowej wohnjowej woborje dojěłoj
Do piwarnje pohladnyć
Kulow. Mjeztym hižo 33. swjedźeń piwarnje swjeća wot pjatka do njedźele, 26. do 28. septembra, w Kulowje. Tři dny změni so piwarnja na městno wjesela, kulinariskich wosebitosćow a njezapomnitych dožiwjenjow. Na wopytowarjow čaka čerstwe točene Kulowske piwo wšitkich družin. Kóždy dźeń změja live-hudźbu. Sobotu wot 14 hodź. móža sej zajimcy piwarnju wobhladać. Tam jim mjez druhim rozłoža, kak piwo warja. Samsny dźeń w 15 hodź. zahaja piwarniski wjacebój ze žortnymi wubědźowanjemi. Njedźelu popołdnju poskićuja kofej a tykanc.
Druhim žiwjenje wuchować
Łaz (AK/SN). Při twarjenju domizniskeho a kulturneho towarstwa we Łazu pódla tamnišeje šule maja wot njedawna zjawny defibrilator. Z nim w nuznym padźe druhemu žiwjenje wuchowaš. 2 000 eurow drohi nastroj financowaše towarstwo ze swójskimi srědkami a z pomocu Wuchodosakskeje lutowarnje.
Njejsu ničo wobzamknyli
Slepo (AK/SN). Milinowe wětrniki wostanu w Slepjanskej gmejnje brizantna naležnosć. Póndźelu na wurjadnym posedźenju gmejnskeje rady chcyše wjesnjanosta Jörg Funda (CDU) přećiwo wobzamknjenju radźićelow wot 2. septembra wustupować. Tehdy běchu woni wobzamknjenje wo přetwarje lěsa cofnyli. Nětko pak parlament scyła ničo wobzamknyć njemóžeše, dokelž bě wot 15 gmejnskich radźićelow jenož sydom přitomnych. Wosmjo běchu so zamołwili. Tuž njebě rada wobzamknjenja kmana.
„Wobzamknjenje wot 2. septembra so prawniskim předpisam spřećiwja“, Jörg Funda rozłoži. Sprěnja njewotpowěduje wobzamknjenje zrěčenju mjez gmejny a inwestorom. A zdruha njewotpowěduje wone tohorunja zarjadniskemu prawu. Wšako njesměš do wotzamknjenych jednanjow hižo zasahnyć, tak wjesnjanosta.
Nimale 90 šulerkow a šulerjow je so wčera w Slepom na 4. ...
Krótkopowěsće (24.09.25)
Statnik: Cyž a Hančik do prezidija
Budyšin. Předsyda Domowiny Dawid Statnik namjetuje zwjazkowemu předsydstwu (ZP), zo njech Bjarnata Cyža a Marka Hančika jako dalšeju čłonow prezidija třěšneho zwjazka powołaja. To wuchadźa z předłohi wobzamknjenja za pjatkowne wuradźowanje w Nowym Miłorazu. Po wustawkach měłoj prezidijej nimo předsydy a městopředsydow dalšej čłonaj ZP přisłušeć.
Hudźbna šula z nowym designom
Budyšin. Wokrjesna hudźbna šula Budyšin prezentuje so wotnětka z nowym logom a modernizowanym layoutom swojeje internetneje strony. Po słowach fachoweje wjednicy kubłanišća Camille Jehde matej přiměrjeni „moderne wusměrjenje a wotewrjenosć našeje šule posrědkować kaž tež staršim, šulerkam a šulerjam přistup k našim poskitkam wolóžeć“.
Přepytuja mordarstwa dla
