Policija (27.08.25)
Chwalba wobhladniwym staršim
Kulow. Póndźelu rano je wobydlerska policistka na Nowowješćanskim puću před Krabatowej zakładnej šulu w Kulowje wobchad přijězdźowacych staršich přepruwowała. Kontrolowała je wona wosebje, hač starši wobchadne předpisy kaž zakaz parkowanja abo zastaća dodźerža a hač su dźěći w awtach připasane. Wuslědk policistki: Hač na jeničke přeńdźenje su wšitcy starši wobchadne předpisy dodźerželi.
Alkohola dla znjezbožił
Klukš. 33lětny šofer je póndźelu nawječor w něhdźe 21.30 hodź. ze swojim wosobowym awtom typa VW Golf na dróze S106 blisko Słoneje Boršće znjezbožił. Do směra Rakec jěducy běše tam pozdatnje přespěšnje po puću. Tohodla je před kružnym wobchadom z jězdneje zjěł a do wobchadneho znamjenja zrazył. Při tym so awto na bok zwróći. Policija zwěsći 0,96 promilow alkohola pola muža. Wona je jeho mjeńšich zranjenjow dla do chorownje dowjezła. Budyska wobchadna słužba pad přeńdźenja wohrožowanja wobchada dla přepytuje. Wěcna škoda wučinja po prěnim posudku dohromady 5 000 eurow.
Zarjadniski zwjazk so zetka
Pančicy-Kukow. Přichodna zjawna zhromadźizna Zarjadniskeho zwjazka „Při Klóšterskej wodźe“ budźe wutoru, 2. septembra, w 19 hodź. w sydarni twarjenja zarjadniskeho zwjazka w Pančicach-Kukowje. Na dnjowym porjedźe stejitej mjez druhim rozprawa wo stawje lětušeho etata a wothłosowanje wo njeplanowanych wudawkach za projekt „Marijina hwězda INNOVATIV“.
Smolerjec kniharnja přeproša
Budyšin. Na knižnu premjeru knihi „Z Prahi do Palestiny. Reportaže z wichorojtych časow.“ přeprošuje Smolerjec kniharnja wšitkich čitarjow. Wudawaćel Friedrich Pollack a lektor Michał Nuk předstajitaj jutře, 28. awgusta, w 19 hodź. putace dožiwjenja serbskeho nowinarja a wšudźebyła Jurja Wićaza – wot Balkana přez Istanbul a Jerusalem hač k pyramidam při Nilu. W knize namakaće tež dotal njewozjewjene dopomnjenki na powójnski nawrót Jurja Wićaza do Europy.
Serbscy seniorojo škotowali
Pčołki, sad a tójšto hudźby
Nazymski program w Serbskim kulturnym centrumje Slepo steji
Slepo (JoS/SN). Z wulkimi kročelemi so nazyma bliži. Sobudźěłaćerjo w Serbskim kulturnym centrumje Slepo (SKC) so hižo na přichodne tydźenje a měsacy wjesela, wšako su swój program zarjadowanjow hač do hód derje planowali. Hakle njedawno su na žurli SKC pućowansku wustajeńcu „Město-kraj-pčołka“ wotewrěli. Zestajeli běchu ju sobudźěłaćerjo Parka přirody Barnim w Braniborskej. Cilowa skupina wustajeńcy su zajimcy młodeje kaž tež staršeje generacije. Wona podawa dohlady do žiwjenja pčołkow w našim susodstwje a po cyłym swěće na jara wobrazliwe wašnje. Mjez druhim zhonja wopytowarjo, čehodla a kak čłowjek mjedowu pčołku hižo přez lěttysacy jako wužitne zwěrjo plahuje a dźerži. Hač do kónca oktobra je wustajeńca w Slepom hišće „na wopyće“, tež na dnju tradicionalnych Slepjanskich nazymskich wikow. Te budu 5. oktobra.
Tutu lěćnu impresiju je fotograf Serbskich Nowin tele dny w swojej ...
Z kolesom sej zhromadnje wulećeli
Dohromady 26 Nowowješćanow je sej minjenu sobotu z kolesom do Tuchorskeho lěsa blisko Delnjeho Wujězda wulećało. Kolesowarjo wšitkich generacijow startowachu připołdnju při najkrasnišim pózdnjo-lěćnym wjedrje. Po puću zeznachu tež serbske wjeski regiona bliže.
Na prěnju staciju wšak dołho nječakachu: W Nuknicy mějachu přestawku z napojemi a nahromadźichu sej mocy za přichodnu etapu. Tuta wjedźeše kolesowarjow dale do Tuchorskeho lěsa. Tam wšitcy zhromadnje piknikowachu. Kóždy wobdźělnik běše doma rjanu chłóšćenku přihotował. Tak měješe skupina wosrjedź zeleneho nanajrjeńše, bohaće kryte blido.
Derje nasyćeni podachu so wulětnikarjo po tym na wodźenje přez něhdyši raketowy bunker, kotryž běše sowjetske wójsko we 80tych lětach w lěsu natwariło. Zajimawe a napjate dohlady do stawiznow regiona nastorčichu tójšto čiłych rozmołwow mjez wobdźělnikami.
Pytaja rumnosće za wustajeńcu
Budyšin (SN/MiR). Angažement za młodźinu w Budyskim wokrjesu spóznawaš na mnohe wašnje – na přikład pola Biskopičanskeje Syće za dźěło z dźěćimi a młodźinu (KiJu). Tam su pućowansku wustajeńcu „Młodźina skutkuje“ wuwili a chcedźa ju hač do kónca lěta po cyłym Budyskim wokrjesu wosebje młodostnym a wšitkim dalšim zajimcam předstajić.
Krótkopowěsće (27.08.25)
Brechowa dźiwadło wopytała
Budyšin. Społnomócnjena sakskeho statneho knježerstwa za naležnosće Serbow Franziska Brechowa je wčera Němsko-Serbske ludowe dźiwadło wopytała. Intendant Lutz Hillmann a zarjadniski direktor Ronald Kohrs jej dźiwadło předstajištaj a mjez druhim zhromadne dźěło ze serbskimi institucijemi a financne naležnosće dźiwadła wuswětlištaj.
Liča z wjace nadpadami wjelkow
Drježdźany. Fachowcy za wjelki liča z tym, zo w přichodnych tydźenjach nadpady rubježnych zwěrjatow na domjacy skót přiběraja. Přičina toho je biologija wjelkow, wšako maja w nalěću a lěću młodźata. W pózdnim lěću a nazymje trjebaja dale a wjac picy, čehoždla potom tež nadpady na domjacy skót přiběraja. Krajny zarjad za wobswět, geologiju a ratarstwo tuž plahowarjow skotu namołwjeja, zo wěstotne naprawy za škit dodźerža.
Europske spěchowanske srědki
Policija (26.08.25)
Fake-powěsće policije w medijach
Zhorjelc. Zastojnicy policajskeje direkcije w Zhorjelcu su zwěsćili, zo rozšěrjeja so tuchwilu w socialnych medijach falšowane zdźělenki policije, kotrež wěrnosći njewotpowěduja. Wjacore facebook-skupiny rozprawjeja wo zhubjenej sydomlětnej Lizy Vogel w Budyšinje, za kotrejž policija z psami a helikopterami pyta. Powěsć je „fake“ – njewěrna. Wobšudźerjo tajke zdźělenki wužiwaja, zo bychu sensibelne daty wužiwarjow dóstali. We wobłuku wopačneho přinoška běchu čitarjow mjez druhim namołwjeli, zo swoje facebookowe daty zapodadźa. Policija naležnje namołwja, zo čitarjo wopačnu powěsć njedźěla a swoje daty njezapodadźa.
Jubilej města sobu woswjećić
Běła Woda. Město Běła Woda woswjeći štwórtk, 28. awgusta, swój 90. jubilej spožčenja měšćanskeho prawa a přeprosy wšitkich zajimcow wot 15 hodź. na oficialny dźěl swjedźenja na tamniše torhošćo. W 19 hodź. předstaja w sociokulturnym centrumje Telux inscenaciju dźiwadłoweho krucha Shakespeara „Othello“ we wobłuku Łužiskeho festiwala. Zastupne lisćiki předawaja online pod: .
Informuja wo Krabaće
Wojerecy. We Wojerowskim Łužiskim centeru, napřećo Brězanec kofejowni, wotewri Krabatowe towarstwo zhromadnje z projektom ZARI – syću za serbsku rěč a identitu Krabatowu stwu. W tutym zwisku přeprošujetej projektna koordinatorka Krabatoweho towarstwa Simona Kurthec a rěčna motiwatorka projekta ZARI Marija Šołćic swójby z dźěćimi na čitanje z knihi „KRABAT und das Geheimnis der Schwarzen Mühle“ a to štwórtk, 28. awgusta, w 14 hodź. Nimo toho poskićuja tam dalše interaktiwne hry z postawami serbskich bajow kaž tež zhromadne paslenje. Wobdźělenje je darmotne.
Lětni koncert chóra Meja
