Informuja wo wětrnikach
Chrósćicy. Zjawne informaciske zarjadowanje wotměje so wutoru, 12. awgusta, w 19 hodź. w Chróšćanskej wjacezaměrowej hali „Jednota“. Planowanski běrow za wobnowjomne energije přednošuje wo móžnym nastajenju milinowych wětrnikow na teritoriju Chróšćanskeje gmejny. Wšitcy zajimowani wobydlerjo su wutrobnje přeprošeni.
Radźićeljo wuradźuja
Radwor. Přichodne posedźenje Radworskeje gmejnskeje rady wotměje so srjedu, 13. awgusta, we 18.30 hodź. w sydarni gmejnskeho zarjadnistwa. Radźićeljo rozsudźa mjez druhim wo saněrowanju wjacebydlenskeho domu w Minakale a wo změnje ležownosćow.
Policija (11.08.25)
Z alkoholom awto wodźił
Budyšin. Wobchadnu kontrolu přewjedźechu policisća sobotu popołdnju na Nagelowej w Budyšinje. Při tym zadźeržachu 39lětneho wodźerja Fiata za alkoholowy test. Nastroj pokaza 1,2 promilej. Muž njedyrbješe na to jenož krej wotedać, ale tež swoju jězbnu dowolnosć. Wón změje so nětko sudnisce zamołwić.
Lětsa mjenje serbšćinarjow
Nowy šulski nawoda je so swojim nowym kolegowkam dźakował
Budyšin (SN/MiR). Wot dźensnišeho ranja sedźa šulscy nowačcy wćipni w swojej rjadowni a so na šulski čas wjesela. Na serbskich a serbšćinu wuwučowacych šulach alfabetizuja w tutym nowym šulskim lěće 2025/2026 w cyłku 245 šulerjow 1. lětnika po koncepće 2plus. Porno šulskemu lětu 2024/2025 je to wo wjace hač sto šulskich nowačkow mjenje.
Na swjatočnosći sobotu popołdnju w Chróšćanskej „Jednoće“ su wšitcy přitomni tež noweho šulskeho nawodu Aleksandera Kozaka zeznali, kotryž pak tež zakładnu šulu „Ćišinskeho“ w Pančicach-Kukowje dale nawjeduje. Na jedne lěto Kozak budźe nětko z podpěru wučerki Hilže Kandtoweje w Chrósćicach wotežki w rukomaj dźeržeć. Wón rjekny, zo so na nowy nadawk přewšo wjeseli. Zdobom so wón hnydom tež wšitkim swojim nowym kolegowkam dźakowaše, kóždej wosobinsce, wšako su jeho w přihotach na zahajenje šulskeho lěta w šuli kaž tež hladajo na jeho nowy nadawk podpěrali. Wšitcy šulerjo 2. do 4. lětnika su nowačkow z pisanym programom do swojeho kruha witali.
Wuměnjenja za wukubłanje lěpše
Zakładne wukubłanje młodych dobrowólnych wohnjowych wobornikow z gmejnow zarjadniskeho zwjazka Při Klóšterskej wodźe wotměwa so nětko prěni raz w Smječkecach.
Smječkecy (SN/MWj). Před gratownju Smječkečanskeje wohnjoweje wobory sy minjeny tydźeń młodych ludźi wobkedźbował, kotřiž zwučowachu woheń hašeć a z ručnymi hašakami wobchadźeć. 14 młodych muži a žonow z Pančic-Kukowa, Miłocic, Njebkelčic, Róžanta a Jitra so tam tuchwilu na zakładnym wukubłanju wohnjowych wobornikow wobdźěla.
Kajki bě to pisany kónc tydźenja w Radworskim młodźinskim klubje: ...
Krótkopowěsće (11.08.25)
Měrliwje swjećili
Grodk. Wjac hač 30 000 wopytowarjow je so kónc tydźenja na domizniskim swjedźenju w Grodku wobdźěliło. Z tym běše tradicionelny event zaso jedyn z najwjetšich ludowych swjedźenjow w južnej Braniborskej. Najebać přiběrace wušparanja z prawicarjemi w měsće njeje k mylenjam dóšło. Wjeršk běše laserowa show z wohnjostrojom, hudźbu a 12 000 přihladowarjemi.
Mjenje nowačkow hač loni
Drježdźany. Za dohromady něhdźe 534 000 šulerkow a šulerjow je so dźensa w Sakskej zaso šulski čas zahajił. Mjez nimi bě 37 000 šulskich nowačkow. Cyłkowna ličba šulerjow zwyši so přirunujo loni wo 10 000, šulskich nowačkow pak je 3 500 mjenje. Wo tym informuje kultusowe ministerstwo. (Wjace wo tym na 4. stronje.)
Šulerjo za sprawnosć dźěłali
Drježdźany. Akciski dźeń „genialsozial – twoje dźěło přećiwo chudobje“ je lětsa w cyłku 900 000 eurow za „globalnu sprawnosć“ wunjesł. 36 500 šulerjow z 271 šulow w Sakskej je jedyn dźeń na dobro socialnych projektow dźěłało. Šulerjo su tež rozsudźili, komu chcedźa pjenjezy darić. Mjez druhim projektej za prawa indigenych ludźi na Phillippinskej a nowotwarej předšule w Ugandźe.
Kedźbu gymnaziasća!
Budyšin. Přijězd za nowačkow do internata Serbskeho gymnazija Budyšin budźe njedźelu, 10. awgusta, wot 17.30 do 21 hodź. Póndźelu po wučbje w 13.30 hodź wotměje so za nowych wobydlerjow zahajenska zhromadźizna. Dokelž dóstanu tam wažne podłožki a wobšěrne informacije, maja so wšitcy wobdźělić.
Na pućowanje a swjedźeń
Wuhotuja 21. raz hornčerske wiki
Policija (08.08.25)
Swětły dźeń bager pokradnyli
Biskopicy. Nic w ćěmnej nocy, ale na swětłym dnju su njeznaći wutoru w Biskopicach kradnyli. W času mjez 7 a 14 hodź. zadobychu so woni na ležownosć a pokradnychu z njeje zamknjeny minibager. Nimo toho wzachu skućićeljo mašinu za syčenje kaž tež 200 litrow hydrawliskeho wolija sobu. Cyłkowna škoda wučinja nimale 17 000 eurow.
Pčołki dla kontrolu zhubiła
Brěžki. Zo njesměš so wot pčołki w awće zamylić dać, wě nětko 35lětna žona, kotraž bě srjedu popołdnju na Mučowskej dróze w Brěžkach po puću. Kaž policija rozprawja, je so wona pčołki nastróžiła a kontrolu nad swojim Opelom zhubiła. Jězdźidło zajědźe z puća, zrazy do płota a wosta hakle w přirowje stejo. Na zbožo so šoferka zraniła njeje. Wěcna škoda na jeje awće a na płoće pak wučinja dohromady něhdźe 8 000 eurow.
Přehladka wo lajskim dźiwadle na klóšterskim swjedźenju
Tójšto lět stej so w klóštrje Marijina hwězda klóšterski swjedźeń a zelowa njedźela na rozdźělnymaj terminomaj wotměwałoj. Lětsa su so rozsudźili, wobě zarjadowani prěni raz samsny dźeń přewjesć.
Pančicy-Kukow (SN/MWj). W klóštrje Marijina hwězda w Pančicach-Kukowje změja njedźelu, 17. awgusta, dwójce přičinu so wjeselić. Woblubowany klóšterski a swójbny swjedźeń Budyskeho wokrjesa woswjeća prěni raz hromadźe ze zelowej njedźelu, kotraž wotměwa so stajnje njedźelu po swjedźenju Marije donjebjeswzaća. Na wobě zarjadowani abatisa klóštra Gabriela Hesse a Budyski krajny rada Udo Witschas (CDU) wutrobnje přeprošujetaj.
