Policija (16.07.24)
Značce na policiskim awće pokradnył
Žitawa. 23-lětny je njedźelu w nocy wobchadnej znamješce na policiskim awće lokalneho policiskeho rewěra w Žitawje pokradnył. To sčini w času, jako zastojnicy policije runje pada kaženja měra dla w domje přebywachu. Jako so wróćichu jim falowacej značce njenapadnyštej. Hakle swědk njeskutka jich na to skedźbni. Zastojnikam poradźi so, skućićela wuslědźić a w susodstwje popadnyć.
Korčma – pjekarnja – hospoda
We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (11)
Stawizny šulstwa předstajene
Handrij Wirth je njedźelu w Njeswačidle wosebitu wustajeńcu wotewrěł
Njeswačidło (ML/SN). Wulka pisana karta wita hosći na 53. wosebitu wustajeńcu wo šulstwje w Njeswačanskej wosadźe z časa reformacije hač do lěta 1945 do domizniskeho muzeja. Wona bu minjenu njedźelu wotewrjena. Handrij Wirth, syn bywšeho wosadneho fararja a druheho serbskeho superintendenta Gerharda Wirtha, je přehladku z wjele prócu zestajał a ju tež wotewrěł. Něhdźe sto zajimcow běše njedźelu popołdnju do tamnišeho domizniskeho muzeja přichwatało. Handrij Wirth je skupinki hosći přewodźał a přewšo zajimawje do šěsć witrinow rjadowanu přehladku rozłožował.
Krótkopowěsće (16.07.24)
Nowa zamołwita powołana
Baršć. Nowa zamołwita za serbske naležnosće w delnjołužiskim wokrjesu Sprjewja-Nysa je powołana. Po połlětnym zadźěłanju přewza Romy Ruffowa z Janšojc prěnjeho awgusta zastojnstwo wot dotalneje zamołwiteje Kerstin Kosakoweje, kotraž so na wuměnk poda. W přihoće na nowu poziciju je Romy Ruffowa tež delnjoserbski rěčny kurs projekta Zorja wopytała.
Saksojo z lěsom wusko zwjazani
Drježdźany. Ludźo w Sakskej lubuja swój lěs a wužiwaja jón prawidłownje, zo bychu so wočerstwjeli. Woni widźa sćěhi změny klimy a podpěruja tohodla wobhospodarjenje a přetwar lěsa we wjetšinje. Woni su zaznawali, zo so staw lěsa škodow a skórnika dla pohubjeńši, a přeja sej wjace informacijow wo lěsnych temach. To wuchadźa z druheho woprašowanja ludnosće zawoda Sakski lěs.
Wišnje zastarske?
Mylenja jědźenja (2)
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (49).
Pod hołym njebjom šach hrać
Budyšin. Budyska bydlenjotwarska towaršnosć přeprošuje w kooperaciji z wokrjesnym šachowym zwjazkom Budyšin a SC Jednotu Budyšin na 3. mjezynarodny šachowy turněr „Bautzener Türme open“. Jutře zahaja mjezynarodne wubědźowanje, kotrež hač do njedźele traje, w Budyskej Krónje. W cyłku měrja so wobdźělnicy w dźewjeć přeběhach. Srjedu su wšitcy zajimcy wot 10 do 16 hodź. na XXL-šach na Budyskich Žitnych wikach před Měšćanskim muzejom přeprošeni. Njedźelu so zarjadowanje z mytowanjom najlěpšich hrajerjow zakónči.
Spominanje w bibliotece
Wojerecy. Wojerowska měšćanska biblioteka zarjaduje składnostnje narodninow Brigitty Reimann wot 15. hač do 21. julija filmowe předstajenje, čitanje a literarne wuchodźowanje po měsće. Tutu srjedu w 16 hodź. pokazaja DEFA-film „Naše krótke žiwjenje“. Film wopřija Reimannowu knižnu předłohu „Franziski Linkerhand“. Zastup je wot 15.30 hodź. móžny a darmotny.
Na Serbske blido
Drježdźany. Předsydstwo towarstwa Stup dale přeproša wšitkich zajimcow na Serbske blido w Drježdźanach a to srjedu, 17. julija, we 18 hodź w korčmje Am Thor na Hłownej dróze 35.
Policija (15.07.24)
Njezboža dla tunl přez Limas zawrěli
Zhorjelc. Před zapadnym zajězdom do tunla přez Limas sta so sobotu dopołdnja njezbožo, kotrehož dla je jón policija na dwě hodźinje dospołnje zawrěć dyrbjała. Pólski staćan běše ze swojim awtom typa Renault Kangoo na jězdni awtodróhi A4 do směra Zhorjelc po puću. Krótko před tunlom zajědźe z dotal njeznatych přičin na lěwy bok čary a zrazy do wodźaceje planki. Při tym so awto masiwnje wobškodźi, tak zo móžeše je hakle wotwlečenska słužba wot jězdnje wottransportować. Wuchowanska słužba wotwjeze 51lětneho šofera do chorownje, kotryž běše so wočiwidnje jenož lochce zranił. Wěcowna škoda wučinja po prěnich trochowanjach něhdźe 6 000 eurow. Fachowa firma je so wo wurjedźenje městna njezboža postarała.
Pytanska akcija wuspěšna
Na wikach spěwachu wopytowarjo
Na synje přenocować
Helmec swójba w Jitku móže skónčnje swoje plany zrealizować
Jitk (UM/SN). Wobhospodarjer Krabatoweho statoka w Jitku Sven Helm je wjesoły, wšako móže nětko z twarskimi dźěłami za dawno planowany natwar „synoweho hotela“ započinać. „Planowanske zadźěwki za twar hotela smy wotstronili“, wón praji.
W lěće 2022 běše wón z mandźelskej Korneliu prěni raz wo planowanej, jednorej, rustikalnej móžnosći za přenocowanje w bywšim hospodarskim twarjenju statoka rozprawjał. Tehdy je Sven Helm nadźiju zwuraznił, zo tute předewzaće w lěće 2023 dokónči. „Nětko je tola trochu dlěje trało, dokelž dyrbjachmy twarski plan wjace króć změnić, zo bychmy twarsku dowolnosć dóstali“, wón powěda a doda: „Njejsmy móhli runočasnje wjacore ideje zwoprawdźić a zdobom z twarjenjom započinać.“ Nimo toho dyrbjachu Helmecy wočaknyć, zo łastojčki lehnyć přestanu. Hakle po tym su twarske dźěła móžne. A łastojčkow maja na dworje dosć a nadosć. Wone maja tu idealne žiwjenske wuměnjenja a su sebi tohodla Jitkowski burski statok za swój domicil wupytali.
Wšitko dyrbi won
Mały Wjelkow (SN/MiR). Mike Salomon je z Małowjelkowskich sotrownjow tworił domicil za zajimcow wuměłstwa, zwonka wulkeje kultury. Kulturne wjerški wotměwaja so zwjetša pod hołym njebjom na nostalgisce skutkowacej ležownosći. Nětko pak so tam tójšto změnja. „Wšitko dyrbi won“ – z tutym hesłom namołwja Mike Salomon ludźi sej do sotrownjow dóńć. Towarstwo Remise z.t. jako załožer projekta, kotrehož wotpohlad je z kulturnymi poskitkami projekt Małowjelkowskich sotrownjow wuchować, so nětko wot wšeho inwentara dźěli. Tutón běchu entuziasća w zašłych lětach z wulkej lubosću a akribiju zběrali. Zdobom rozpušća wone historisce zarjadowane apartmenty za dowolnikow, mjez kotrymiž bě přenocowanje w pastyrskej budce na słomje móžne. Nětko su wšitcy witani, kotřiž su na ležownosći njezapomnite koncerty, rejowanske popołdnja a filmowe nocy dožiwili. Štóž trjeba jónkrótnu a rjanu nadobu, meble abo tež jenož impozantny dekoraciski objekt, ma wot julija hač do septembra, kóždu póndźelu wot 14 do 18 hodź.
