Online je přichod nakładnistwa
Zetkam 23lětnu Jadwigu Šołćic w jeje běrowje. Zašłe tři lěta je wona tu, w Ludowym nakładnistwje Domowina, swoje wukubłanje na překupču w e-commerce absolwowała. Što to poprawom je? Přećelna młoda žona mi powěda, zo tča jeje nadawki w digitalnym překupnistwje. Tak stara so wona na přikład wo online-shop nakładnistwa. Ale tež digitalne nawěški a tróšku zjawnostneho dźěła wona nětko tu sobu zastaruje. Jadwiga je 2020 maturowała. W Drježdźanach je wona po tym swobodne ekologiske lěto absolwowała. Zo wona nětko tu jako online-překupča dźěła, to je skerje připad, powěda. 2021 bě wona w Serbskich Nowinach nawěšk za wukubłanske městno w LND našła a tak je so jeje puć w medijowym domje započinał.
Krótkopowěsće (22.07.24)
Nóc hrodow swjećili
Drježdźany. Šěsć tysac ludźi, mjez nimi tež wjele z Łužicy, je sobotu 14. Drježdźansku nóc hrodow swjećiło. Zarjadowanja běchu wupředate. Jědnaće hodźin hudźby su hosćo dožiwili, wjac hač 300 wuměłcow je na 18 jewišćach wustupiło. Z tym bywachu parki hrodow Albrechtsberg, Lingnerschloss, Eckberg a Saloppe z wulkim openair-swjedźenišćom. Spektakl bu 2009 załoženy.
Pralěs w Hornjej Łužicy
Dubo. W Dubjanskim lěsu ma krok po kroku pralěs nastawać. Sakske statne ministerstwo za wobswět a Zwjazkowa załožba za wobswět (DBU) stej pjatk wotpowědne zrěčenje podpisałoj. Załožbje słuša wot 2008 tysac hektar wulki areal, kiž je dźěl biosferoweho rezerwata hornjołužiskeje hola a hatow. Něhdyše wojerske zwučowanišćo NVA steji dźensa pod škitom přirody.
Dźeń Hornjeje Łužicy so bliži
Policija (19.07.24)
Blisko Budyšina bě jězba ke kóncej
Budyšin. Zastojnicy Budyskeje slědźenskeje jednotki su srjedu rano 42lětneho šofera pokradnjeneho bydlenskeho mobila typa Fiat Challenger na A 4 krótko po parkowanišću „Am Wacheberg“ popadnyli a zajeli. Paduch ignorowaše spočatnje namołwu policije zadźeržeć. Krótko před wotjězdom Šiborćicy (Nieder Seifersdorf) zastojnicy pólskeho staćana zajachu. Přepytowanja dopokazachu, zo běše so Fiat Challenger w nocy do toho w Lipsku pokradnył. Krejny test na drogi pola skućićela reagowaše pozitiwnje na amfetaminy.
Płót pokradnyli
Budyšin. Njeznaći skućićeljo su minjeny tydźeń něhdźe 40 do 50 metrow płota, kotryž areal firmy na Nowej promenadźe w Budyšinje wobdawaše, pokradnyli. Wěcna škoda wučinja něhdźe 3 000 eurow. Lokalna kriminalna słužba přepytuje.
Awto zaso namakali
Do cirkusa w měsće
Budyšin. Ze swojim programom „Surprise“ chce Circus Probst wot dźensnišeho hač do 29. julija na Budyskim Třělnišću małych a wulkich wopytowarjow zakuzłać. Z teje přičiny je naměsto za zjawny wobchad zawrjene. Wotewrjene pak su parkowaniske móžnosće za busy a wosobowe awta při Spěchowanskim centrumje w susodstwje.
Prózdniny w młynje
Čorny Chołmc. Mały rapak přihotuje w Čornochołmčanskim Krabatowym młynje hry a paslenje za dźěći. 23. a 24. julija steji zarjadowanje pod hesłom „Magiske rapaki“. Wot 10 do 16 hodź. poskićuja tam sobudźěłaćerjo pod hołym njebjom njedaloko pjecy magiske hry. Mjenowane hry su dźěći hižo před mnohimi lětami hrali, na nje pak je so mjeztym pozabyło. Mały popłatk maja dźěći za material zapłaćić, kotryž při paslenju w domje Jurja Brězana trjebaja. Přichodny poskitk pod hesłom „Křinja pokłada“ přewjedźe so 30. a 31. julija.
Z gitaru přewodźeć
Dźěło na dobro łastojčkow mytował
Z wjeselom w přirodźe so zabawjeć
Slepo (AK/SN). Ze šćežku zmysłow, wjesku tipijow za šulski hort a zjawnymi wotpočnišćemi je gmejna Slepo zaměrnje swoju wjes porjeńšiła. Na to skedźbnja gmejnski zarjad na swojej internetnej stronje.
Šćežka zmysłow wudospołnja nětko wonkowny wobłuk ležownosće Němsko-serbskeho šulskeho centruma. Wona ma šulerjow k tomu pohnuwać, so wjace na čerstwym powětře pohibować a sej tu najwšelakoriše přirodne materialije wotkrywać. Materialije su na wšelakich stacijach abo drjewjanych budkach instalowane. Cyle wědomje stimuluje šćežka čłowječe zmysły: widźenje, čuchanje, słyšenje a tasanje. Dźěći na tute wašnje kompleksny swět wědomje zaznawaja a jón lěpje zrozumja. Projekt z mjenom „Šćežka zmysłow hort Slepo“ bu ze srědkami z programa LEADER spěchowany.
LEADER-program je tež financowanje natwara zjawnych wotpočnišćow na wšelakich městnach we wsy zmóžnił. Tajke městno wabi młodych a staršich wopytowarjow, na přikład njedaloko cyrkwje z hrajkanišćom, ławkomaj a blidom, na přebywanje.
800 idejow za 800lětnu róčnicu
Měšćanski jubilej Kamjenca so z wulkimi krokami bliži
Kamjenc (UM/SN). Přihoty na jubilej města Kamjenca su naročne. Před něšto dnjemi je countdown-časnik ličbu 200 podkročił. Za měšćanske zarjadnistwo dobry to wokomik, aktualny staw přihotow a planowanjow předstajić.
We wobłuku kampanje idejow „800 lět Kamjenc“ su Kamjenčenjo mysličku zrodźili, zo chcedźa 800lětny lěsk stworić. Po wothłosowanju iniciatorow kampanje z měšćanskim zarjadnistwom a ze zamołwitymi fachowcami su so wšitcy na městnosć w Kamjenskej Boršći za sadźenje štomow dojednali. Płonina je wulka dosć za projekt. Podpěraćeljo móža za minimalnje wosom eurow sadźenk kupić. Wo wšitko dalše stara so měšćanske zarjadnistwo zhromadnje ze statnym lěsnym zawodom Sachsenforst. Terminy wosadźenja město hišće wozjewi. Darićeljo su přeprošeni so na sadźenju štomow wobdźělić.
Wojerecy: K hatej bjez kopolenja
Mnohim Wojerowčanam je gondlowy hat při Łužiskej kupjeli přijomne wočerstwjenišćo. Tež turisća tam rady přebywaja. Wšako je w bjezposrědnim susodstwje parkowanišćo za karawany z móžnosćemi za grilowanje pod hołym njebjom.
Ratarjam tele dny wjele dźěła do rukow hlada. Žito je po ...
Krótkopowěsće (19.07.24)
Na prócowarjow spominali
Slepo. Něhdźe 50 zajimcow je so wčera w Slepom na přeprošenje tamnišeje župy kaž tež rěčneje motiwatorki Juliany Kaulfürstoweje zešło, zo bychu składnostnje jeho 150. narodnin na najwuznamnišeho serbskeho spisowaćela 20tych lět Jakuba Lorenca-Zalěskeho kaž tež jeho 125. narodnin na Pawoła Lejnika, prěnjeho předsydu župy Běła Woda, spominali.
Prěni atleća w olympiskej wsy
Paris. Wosom dnjow do starta olympiskich hrow w Parisu su prěni atleća a sobudźěłaćerjo do olympiskeje wsy na sewjeru metropole zaćahnyli. Za sportowcow su tam 82 nowych twarjenjow natwarili, kotrež so po 52 hektarow wulkej ležownosći rozpřestrěwaja. Olympiska wjes w Pariskim předměsće Saint-Denis ma so pozdźišo do štwórće z bydlenjemi, běrowami a wobchodami přeměnić.
Zimmermann bjez zboža
