Orchidejowu łuku posykli a trawu zrumowali
Ćisow (HS/SN). Kóžde lěto spočatk awgusta přewjedźe Kulowska přirodoškitna skupina NABU wosebitu akciju w přirodoškitnej kónčinje Dubrjenske bahno. Jónu wob lěto mjenujcy syku a rumuja orchidejowu łuku pola Ćisowa, kotraž je we wobsydstwje mjenowaneje skupiny. Wjele dešća w minjenych tydźenjach dla bě łuka jara włóžna, tak zo trjebachu wobdźělnicy nimo kmaneho gratu tež gumijowe škórnje.
Byrnjež 1,2 hektarow wulku łuku z mašinu za syčenje a z motorskej kosu syc napinace ćělne dźěło było, je něhdźe 20 čestnohamtskich pomocnikow, čłonow towarstwa a dalšich dobrowólnikow při rumowanju łuki pomhało. Ze synowymi hrabjemi woni trawu hromadźe hrabachu, na stabilne folije nasypachu, je z ruku hač ke kromje łuki ćehnjechu a tam składowachu. Někotre awtowe připowěšaki połne trawy jako picu za skót wotwjezechu.
Policija (06.08.25)
Z městna njezboža ćeknył
Budyšin. Wobchadne njezbožo je so póndźelu popołdnju na awtodróze A 4 mjez Budyšinom a Wósporkom stało. Tam je njeznate jězdźidło do wobchadneju znamjenjow na twarnišću zajěło. Při tym nasta něhdźe 600 eurow škody. Pozdatny zawinowar pak z městna njezboža ćekny. Nětko pytaja swědkow, kotřiž su snano něšto wobkedźbowali. Pokiwy přijimuja pod 03591/ 36 70.
Radźićeljo wuradźuja
Smjerdźaca. Čłonojo techniskeho wuběrka gmejnskeje rady Ralbicy-Róžant zeńdu so jutře, štwórtk, we 18 hodź. w něhdyšim Smjerdźečanskim žłobiku. Jenički dypk zjawneho dźěla dnjoweho porjada je poradźowanje wo změnje wužiwanja něhdyšeho žłobika. Tomu přizamknje so njezjawny dźěl posedźenja. Wobydlerjo su wutrobnje přeprošeni.
Do kina do wowčernje
Stróža. Zarjadnistwo biosferoweho rezerwata Hornjołužiska hola a haty přewjedźe w awgusće kinowe wječory w starej wowčerni w Stróži pola Hućiny. Hromadźe z Budyskim Kamjentnym domom organizuja tele zarjadowanja mjeztym pjaty raz. Jako prěnje pokazaja pjatk, 8. awgusta, w 20 hodź. kriminalnu komediju „Zwei zu Eins“. K tomu poskićuja napoje a słódnosće z grila. Dalše předstajenja wotměja so 15., 22. a 29. awgusta.
Nowa gratownja spěšnje rosće
Stróža (UM/SN). 27. razow dyrbješe Rakečanski wjesnjanosta Swen Nowotny (CDU) z hamorom bić, prjedy hač je so posledni hózdź w hrjedźe třěchi noweje wohnjowoborneje gratownje w Stróži zhubił. Hosćo njedawneje zběhanki mytowachu to z přikleskom, wšako druzy twarscy knjezojo zwjetša wjace razow trjebaja. A tež tempo Swena Nowotneho bě respektabelny.
Žonop nětko w srjedźišću
13 hosćencarjow Budyšina wobdźěla so na žonopowych tydźenjach
Budyšin (SN/MWj). Mjeztym 20. raz wotměwaja so w Budyšinje žonopowe tydźenje. Hač do 31. awgusta přeprošuja hosćencarjo na kulinariske dožiwjenja wosebiteho razu. W srjedźišću steji wězo po cyłej Němskej kaž tež zwonka našeho kraja znaty žonop. Tež we wosebje wupyšenej žonopowej manufakturje na Mjasowych wikach pódla radnicy poskićuja žonop, a to w najwšelakorišich kreacijach. Tam su wčera žonopowe tydźenje oficialnje zahajili.
Krótkopowěsće (06.08.25)
Sorabija znowa w minusu
Nowoslicy. Róžeńčanska agrarna AG Sorabija měješe wčera swoju 33. hłownu zhromadźiznu. Na njej bilancowachu lěto 2024. Nawoda předsydstwa Chris Fabig, kiž wot 1. januara w tutej funkciji skutkuje, wozjewi, zo njeje Sorabija loni dobytka nadźěłała. Akcionaram tuž diwidendy wupłaćić njemóža. Nadrobniše informacije namakaće w jutřišim wudaću SN.
Widejo wo wuznamje Ochranowa
Budyšin. „Sydlišća Ochranowskeje bratrowskeje wosady“ rěka animěrowany krótkofilm, kiž w pjeć mjeńšinach pozadki transnacionalneho swětoweho namrěwstwa a cyłoswětny wuznam městačka wobswětluje. W nadawku Marketingoweje towaršnosće Hornja Łužica-Delnja Šleska (MGO) produkowany pask je na YouTube přistupny. Na mjezynarodnych podtitlach hišće dźěłaja.
Wjac policije při mjezy
Pytaja młodych přirodoškitarjow
Budyšin (SN). Štóž je znajmjeńša sydom lět stary, je rady wonka a chce přirodu lěpje zeznać, tón móže so z młodym přirodoškitarjom stać. Tajkich pyta přirodowa centrala Budyskeho wokrjesa. To je w nowinskim wozjewjenju zdźěliła. W Budyskim wokrjesu je pjeć krutych skupin, kotrež so wobstajnje zetkawaja. Wone wobsteja w Kinsporku, Höckendorfje, Wjazońcy, Njeswačidle a Wojerecach. Jich adresy nadeńdu zajimcy internetnje pod www.naturzentrale-bautzen.de.
Zaměr młodych přirodoškitarjow je, wutworić rum za młodych ludźi, hdźež móža so z přirodoškitnym temami zaběrać a swoje nazhonjenja wuměnjeć. Pod nawodom nazhonitych fachowcow dóstanu wobdźělnicy dohlad do přirodnych procesow a nawuknu, kak móža so za přirodoškit praktisce angažować. Za to organizuja w mjenowanych skupinach dźěłarnički, ekskursije a prózdninske lěhwa. Sakska krajna załožba za přirodu a wobswět program „Młodźi přirodoškitarjo Sakskeje“ koordinuje a pjenježnje podpěra.
Jedne lěto sej hižo awće dźěla
Za hladanje jězdźidłow pytaja dale čestnohamtskich pomocnikow
Budyšin (SN/MWj). Zo wobsedźa swójby na wsy znajmjeńša jedne awto, je dźensa samozrozumliwe. Zwjetša je to wuměnjenje za to, zo sej na dźěło dojědu a tež hewak nadawki wšědneho dnja zmištruja. W městach z lěpšim zjawnym bliskowobchadom sej wobydlerjo mjeztym tež jězdźidła dźěla. Carsharing rěka alternatiwa, kotruž su před lětom tež w Budyšinje zmóžnili. Na Dwórnišćowej čo. 21 móža sej zajimcy dwě jězdźidle wupožčić. Awće wužiwa mjeztym 60 zajimcow a jich ličba dale přiběra, kaž regionalny nawoda předewzaća teilAuto Martin Schmidt wuswětla.
Při pomniku rjedźa
Wobora je srjedźišćo wsy
Zo bychu so ludźo před wohenjemi škitali, su před něhdźe połdra lětstotkom tež w Hornjej Łužicy wohnjowe wobory załožeć započeli. W našej lětnjej seriji chcemy někotre z nich předstajić a jich stawizny rozłožić. (11)
Salowska wohnjowa wobora je poměrnje młoda. „Wona je hakle 1960 nastała. Nastork za nju je ze wsy přišoł“, powěda Jurij Szczepanski, kiž bě wot 1985 hač do 2018 nawoda wobory. Jeho nan Józef Szczepanski, Jurij Woko, Werner Hantke, Jurij Kral, Joachim Bulank, Jurij Lipič, Jan Šołta a dalši wobydlerjo běchu mjez prěnimi kameradami. „Wobornicy sami su tež prěnju gratownju twarili. Cyhelernja we wsy je jim material za to přewostajiła“, Jurij Szczepanski powěda. Dźensa su wot 180 wobydlerjow 37 dźěl wobory. 16lětna Mia Pröhlec je jenička žona. Hižo za čas NDR mějachu wohnjowobornu sportowu skupinu. Tuchwilu dwanaće kameradow kóždy tydźeń zwučuje. „Wobdźělamy so na mnohich wubědźowanjach a jězdźimy za to hač do Zella-Mehlisa w Durinskej“, praji 31lětny Michał Mróz. Wón Salowskich wobornikow wot lěta 2023 nawjeduje.
