We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (12)

Ze swojej agilnej předsydku Annemarie Rentsch je sej před 15 lětami załožene stawizniske towarstwo RAK z.t. wužadowacy nadawk stajiło, so z přemysłowymi předewzaćemi a rjemjeslnikami před sto lětami w Rakecach zaběrać. Wulka wjes je tehdy něhdźe 1 300 wobydlerjow měła. Mjez nimi běše 348 zapisanych rjemjeslnikow, mjez nimi kowarjo, pjekarjo, rěznicy, zamkarjo, blidarjo a dalši. Cyłkownje sy měł 30 wšelakich přemysłow.