Slepo (AK/SN). Ze šćežku zmysłow, wjesku tipijow za šulski hort a zjawnymi wotpočnišćemi je gmejna Slepo zaměrnje swoju wjes porjeńšiła. Na to skedźbnja gmejnski zarjad na swojej internetnej stronje.

Šćežka zmysłow wudospołnja nětko wonkowny wobłuk ležownosće Němsko-serbskeho šulskeho centruma. Wona ma šulerjow k tomu pohnuwać, so wjace na čerstwym powětře pohibować a sej tu najwšelakoriše přirodne materialije wotkrywać. Materialije su na wšelakich stacijach abo drjewjanych budkach instalowane. Cyle wědomje stimuluje šćežka čłowječe zmysły: widźenje, čuchanje, słyšenje a tasanje. Dźěći na tute wašnje kompleksny swět wědomje zaznawaja a jón lěpje zrozumja. Projekt z mjenom „Šćežka zmysłow hort Slepo“ bu ze srědkami z programa LEADER spěchowany.

LEADER-program je tež financowanje natwara zjawnych wotpočnišćow na wšelakich městnach we wsy zmóžnił. Tajke městno wabi młodych a staršich wopytowarjow, na přikład njedaloko cyrkwje z hrajkanišćom, ławkomaj a blidom, na přebywanje.